اولا شكرا جزيل لكل من ساعدني في اقتراحات لحل مشكلتي
والله يفرج لكم في الدنيا ويفرج عليكم كرب يوم القيامة ويرزقكم من حيث لا تحتسبون وان يلبسكم ومن تحبون لباس الصحة والعافية ويبلغكم ما تتمنون ويبارك لكم في ذرياتكم ويصلحهم وازواجكم ويحسن خواتيم اعمالكم ولكل من بيرد بعدكم


وثانيا كنت اول امشي بالجدول وكانت اوضاعي ما شية شوي بس يوم جبت ولدي الصغير ما عاد اعرف امشي على نظام لاني ما احب اشتغل وهو معي وراي وراي وخصوصا في المطبخ اخاف عليه من زيت ولا ماء حار ولا احيانا انا اغسل المواعين وهو ينزل المواعين اللي في الدروج كلها بس اهاوشة بس يروح لشي اخطر فاحيانا اتركه والحين عمرة سنتين وبثر الله يهديه يحب يفتح البراده ويخرب علي ولا الثلاجة فاحب انوم واسوي اشغالي واذا كانو خوانه معه كويس اخليه يلعب عندهم فالصغير مشكلة الشغل وهو صغير


للي قالو اكثري استغفار فانا ولله الحمد كل ما جتني فرصة استغفر واسبح واهلل واكبر واعرف فوائدها ولله الحمد يمكن لولا ها الاشياء اللي اسويها ومحافظتي على صلاتي ان كان انجنيت من زمان بس الحمد لله اذا حسيت انه ضايق صدري مرة من المسؤليات دعيت اللهم اجل القران الكريم ربيع قلوبنا ونور صدورنا وجلاء همومنا وغمومنا وبعدها انسى كل شي وارجع اكمل اشغالي وفي المطبخ مشغلة اذاعة القران بشكل دائم علشان وانا اشتغل اسمع شي مفيد



وانا هذي مشكلتي انا عارفة ان الحل في قومة الصبح بس انا وحده متعوده على السهر من وانا في المتوسط والحين لي سنين متزوجه دايم اسهر اعدل نومي شوي ويرجع يخرب وكنت دايم اقول للحريم الكبار اللي اقول لهم وش يقومكم من صبح الله نوموا وارتاحوا ويضحكون علي الحين صرت اقول لهم ماشاء الله عليكم تعرفون كنتوا تمشون انفسكم وتلاقون لكم شي تسوونه اثاريكم
لاني اذا قمت الصبح زينت كل اشغالي وبيتي يطلع على سنقت 10 ومبسوطة واخر مرة واطولها كنت معدله نومي شهر بعد عيد الفطر صرت منظمة مرة الكل مستغرب ما عاد صرت مع الناس الكل يدورني وينك لاني اصحى الفجر وانام بعد العشاء مباشرة كلنا انا وعيالي وزوجي وحسيت اننا مرتاحين حتى زوجي يحب السهر وعجبة الروتين بس ما اقدر استمر عليه

رايكم اخذ حبوب منومة كل ما خرب نومي لانه هذا هو الحل الوحيد مع اليوميات اللي تفضلتوا فيها جعل يديكم تحرم عن النار

لا مانصحك بالحبوب
لاسمح الله لو راحت عليك نومه والصغير صحي وانتي بسبب الحبوب نمتي نومه وماسمعتي صوته
الحال من بعضه انا مو مجنني بشغل الاولدي عمر سنه و8 شهور مهبل بي المطبخ الثلاجه الدولايب يمشي ويطلع يمشي ويحوس
ماراح نتعدل الا اذا كبروا الله يحفظهم من كل سوء والله يعينا عليهم

حل مشكلتك صدقيني بتعديل نومك ... انا كنت مثلك لكن لما عدلت نومي كل شي تعدل حتي نفسيتي ونفسية الصغار تعدلت...
صحيهم بدري عالساعه 8 الصباح ولما يجي 8 بالليل تلاقيهم دايخين يبون ينامون وانسي شي اسمه قيلوله لان الصغار اذا اخذو قيلوله سهرو ... نامي عالساعه 11 بالليل وبتصحين الساعه 8 معاهم لان الاطفال يحتاجون وقت اطول لنوم..

ثانيا اول ماتصحين من النوم فطريهم كلهم اللي يروح للمدرسه يروح والصغار دخليهم بعد مايفطرون وحمميهم ولبسيهم وجيبيلهم شي يلهون فيه العاب يلعبون فيها او شغلي لهم كرتون ... وانتي ابدأي تنظيف حمامات سريع سريع وامسحي الارضيات ونظفي اهم شي المكان اللي تجلسون فيه يوميا .. المجالس وقسم الضيوف يتقفل .. نظفيه مره بالأسبوع او مره كل اسبوعين واذا جاك ضيوف فقط انسيه ..لانك ماراح تقدرين تلحفين على كل شي ...
علمي اعيالك يساعدونك وكافئيهم على هالشي .. اول مايصحون يعدلون مفارشهم ويرتبون اسرتهم .. وكل واحد مسؤل عن مكانه ..
اذا خلصتي تنظيف وتمسيح .. بخري البيت
وادخلي المطبخ طلعي لحمتك ولا دجاجتك وجهزي اكلك واستخدمي بالمطبخ الصحون البلاستيك والملاعق للخلط للجبن والمربي وعلطول ارميها .. واستخدمي قدر الضغط اوفر للوقت للطبخ سوا مكرونه ولا رز ولاجريش كله استخدم قدر ضغط
ثالثا خصصي لك بالأسبوع 3 أيام لغسيل الملابس ... ملابس البيت مايحتاج تكوينها صفطيها تصفيط مرتب وبالدولاب مع الضغط بالدولاب بتنكوي لحالها :)
ملابس الطلعات اكويها قبل لاتطلعين من بدري وجهزيها ..
غسيل الملابس خليه دائما الصباح حطي الملابس بالغساله وعلبال ماتمسحي الارضيات وتنفضين الغبار قد خلص الغسيل اغسلي وحطيه بالنشافه وانشريه والحمدلله
جهزي الغداء من بدري وخليه عالنار قصري عليه .. لين يجون وتتغدون
بعد ماتتغدون وترتبي المطبخ ادخلي تحممي وتبخري وبخري بيتك وسوي قهوه وروقي
من بعدها بيكون عندك وقت كبير ... تقعدين تلعبين مع الصغار وتقعدين مع زوجك وتكملين تجارتك عالنت
بس لما تصحين بعد العصر ماراح يكون عندك اي وقت تسوين شي ونفسيتك ونفسيت اعيالك تعبانه
حرااااااااااااااااااام
حل مشكلتك بتعديل النوم فقط
وبالنسبه لولدك الصغير حطيه بكرسي الاكل وربطيه بحزام وخليه عندك بالمطبخ وعطيه بسكوته ولا اي شي يلهى فيه
او حطيه بالمحبس وعنده العابه لين تخلصين اشغالك وهو بيتعود على كذا بس مايصير وراك وراك وطبخ وزيت ومويه حاره لاسمح الله
دعواتك