اهلا يا رواء ازيك وازاى النونوات بتوعك

ازيك يا لولوكاشا ايه اخبارك

عاوزة اقوللكم على خبرين احلى من بعض من وجهة نظري

اولا السعودية فتحت باب منح تاشيرات سياحة (يعني ممكن نعتمر ونحج براحتنا ان شاء الله)
ثانيا بقى المكتب عندي جزاهم الله خير على طول جمعوا ظرف ولفينا على بعض وعملنا مبلغ الحمد لله ان شاء الله يكون كويس وهنبعته على بنك قناة السويس علشان فلسطين

يلا همتكم بقى كرروا التجربة كل واحد في مكانه

واستحضروا النية اطعام مسلم وفك كربة مسلم

السلام عليكم و رحمه الله و بركاته
يا الله أخيرا خلصت و قريت كل اللى كتبتوة فى يومين لما ضهرى خلاص هيقوم يمشى من قدام الكمبيوتر و يسبنى
ازيكم كلكم عاملين ايه؟ والله وحشتونى الكام يوم دول و كنت حاسه إن فى حاجه نقصانى بجد
بس ما شاء الله فى حاجات كتير جميله مكتوبه جزاكم الله خيرا عليها
و كمان برحب بكل البنات الجداد
إينا أخيرا طمنتينا عليكى معلش يا حبيبتى ربنا معاكم و يوسع رزقكم يا رب و أهم حاجه الصبر مافيش احسن منه و طبعا الثقه بالله قبل أى حاجه و إن شاء الله ربنا يوسعها عليكم و يرزقكم بما فيه الخير لكم
هبهوبه وحشتينى والله و على فكرة انا نفسى بحب إسم مسلمه دة جدا و إن شاء الله المقابله بتاعتك تكون عدت على خير
دون يا دون الفراخ غليت يا دون ماما جابتها إمبارح و كمان فراخ بيضاء لأن مافيش فراخ بلدى و الكيلو ب 11 جنيه و البانيه ب 22 تقريبا
أم أبيها جزاكى الله خيرا على تذكيرنا بموضوع فلسطين دة و إن شاء الله نقدر كلنا نعمل زيكم و ربنا يغنينا و يغنيهم من فضله يا رب
رواء إزيك يا جميله عامله ايه؟ بتنورى المضيفه لما بتدخليها و بتكتبيلنا حاجات مفيدة جزاكى الله عنا خيرا يا رب
هى نودى فين يا بنااات ؟ يا رب يكون خير
لولو كاشا و لؤلؤة و ام يوسف و منى و كلكم كلكم وحشتونى

السلام عليكم
خالة الأمورة (ماحدش عبرنى الا الحبيبة "هبهوبة"...هبهوبة ازى احوالك ياحبيبتى؟؟؟؟) ..أنتى قصدك هبهوبة أنا ولا حد تانى ومعذرة لأنى أعجز عن قراءة الملفات كاملة .... خالة متعرفيش أمتحانات أخر السنة فى أداب أمتى ؟؟؟؟؟؟؟؟؟؟
أختك هبهوبة

ميل جالى و حبيت تشاركونى أرائكم :42:

اعرفي عريسك بدري بدري.. من طريقة أكله ....؟؟؟؟

1- إذا كان عادي يعني لا بياكل بسرعة ولا ببطء ولا دايمًا شبعان ولا
مفجوع على طول.. يبقى شخص معتدل في عواطفه وقراراته ويبقى ده آخر
الرجال المحترمين.. كلبشي.. واستعجلي الزفاف والحياة هتبقى بمبي

2- إذا كان بيحب الأكل زي عينيه.. وأول ما يدخل من الباب وقبل ما يقول
لك ازيك يقول لك ريحة التقلية تجنن ياروحي إنتوا عاملين ملوخية على
أرانب؟؟.. أموت أنا.. ويقعد ياكل ويحشر لحد ما يغمى عليه.. يبقى إنسان
طفس.. وهوائي.. وطايش.. وأوعي تتجوزيه أحسن ياكلك وانتي نايمة....؟

3- أما إذا كان مش مهتم بالمرة.. لايقولك ده حلو ولا ده عادب ولا مالح
ولا مستوي ولا لسه ني ولا بيعلق أي تعليق.. وعمره مايقولك جعان أو
شبعان يبقى إنسان مالوش لزمه.. وزي قلته.. وأنصحك بدل ما تتجوزيه
إتبنيه.. وهاتعيشي إنتي الراجل والست ف وقت واحد واعملي حسابك
هاتركبيه وتدلدلي رجلييكي.

4- أما إذا كان بياكل زى مايكون حد بيجري ورااااه وساعة الأكل بيجيله
حالة صرع معوي.. ويقوم من ع الأكل قبل أي حد تاني يبقى متسرع.. ومتهور
في اتخاذ قراراته وممكن بعد الجواااز يكتشف إنك لست ملهمته..ولست فتاة
أحلامه ولستِ حلمه.. ويروح مطلقك بالتلاتة.. إخلعي إنتي بدري أحسن
لكرامتك.

5- أما إذا كان بياكل على مهله.. ويمزمز.. ف كل صنف لوحده.. ويسأل عن
كل صنف إيه مقاديره ومعمول إزاااي ويقعد يستطعم ف الأكل من العصر
>للمغرب حاسبي منه يا اختي ده النوع اللي له مخ.. وبيوزن الأمور بطريقه
تفقع المرارة.. ولو في يوم طلبتي منه يقولك كلمة حلوة هايقولك مش عامل
حسابي ويقعد يفكر 3 سنين وبعدين يقول لك بحبك ويقعد يشوف وقعها عليكي
إيه؟؟ نظااااام شلل رعاش بدري.... بدري.... إخلعي يا أمي...

6- أما إذا كان بيقعد يقطع ف الأكل زي مايكون ف خناقة ويخبط فطبق
من الغل.. ويقطع حتة اللحمة زي ما يكون
بيدبحها.. ويتفتف.. ويتكلم.. طول ماهو بياكل لما يغرق وشك أكل.. ده
شخص عصبي جدًاااا.. ومع أول خناقة هايروح مناولك بالكرسي ف راسك أو
بالسكينة ف عينك يعمل لك عاهة مستديمة وبعدين.. يهدى.. ويقول لك:
"سوووري ياروحي هي جت فيكي.. معلش"
""معلش برَّه يا حبيبي وخد الباب ف أيدك""

7- أما إذا كان دايمًا قرفاااان دايمًا مش عاجبه العجب ولا الصيام في رجب.. يع.. الملوخية تقيلة.. ياي.. السمنة كتيرة على وش الشوربة..
ياساتر.. دا محشي ولاصوابع مووووز.. أووووف.. الرز محصويل.. يامَّه
المكرونة معجنة.. إذا كان كده توكلي على الله وهاتي أحمى ساطووووور
عندك وأنا أعرف لك واحد محامي
هايطلعك منها زي الشعرة م العجيييين

والأحسن من ده كله..... مالها القعدة ف بيت أبووووووووكي؟؟:hahaha: :hahaha: