هبة حبيبتي، فعلا زبدة كاكاو فروتيني تحفة زي بقية منتجاته، انا جبت منها نكهتين واحدة شيكولاتة و التانية جوز هند و موز. على فكرة هي ماركة الماني. بس أنا مؤخرا بدأت اقرف من أروبا بكل منتجاتها و أحس اننا لازم نقاطعها كلها هي كمان، لان مش فارقة المانيا من فرنسا من الدنمارك من السويد من رومانيا لايطاليا، كلهم كلهم بيساندوا اسرائيل و كلهم كلهم نيتهم سيئة تجاه الاسلام و المسلمين حتى لو كانوا اعلاميا بيظهروا العكس. و ربنا يقدرنا بقى اننا فعلا نقاطعهم كلهم. على فكرة يا هوبا فيه ماركة سيبيل مصرية منها زبدة كاكاو تحفة فعلا بنكهة التفاح الاخضر و الفراولة و بجد ريحتها تجنن و كمان ملمسها عالشفايف احسن من ماركات اجنبية كتير جربتها و كانت عادية. فكرة تعليم الخياطة لوجه الله حلوة اوي يا هبة، جزاكي الله خيرا و بارك فيكي يا حبيبتي و ربنا يزيدك من فضله و يسعدك. نصيحتك وصلت يا هبة و استوعبتها و متخافيش يا ماما انا مش ناوية اني أظلم أي طرف على حساب التاني و لا ناوية أميل لطرف بانفعال زايد، لان مفيش حد باقي لحد لا أخ و لا زوج و لا ابن و لا أي حاجة، يعني كل واحد و عمله هو اللي بينفع في الاخر. و حتى لو اخواتي قرروا يقاطعوني انا مش حاقاطعهم لاني مش ناوية اكون انا سبب قطع صلة الرحم، حافضل احاول معاهم و ادعي ربنا يهديهم و يصلح ذات بيننا و يألف بين قلوبنا. و بعدين تعالي هنا!!!! صاحبة المضيفة ده ايه؟؟؟!!!! لا يا ماما، انا فتحت لكم باب المضيفة و سبت الشاي عالنار و قلت بقية الشركاء ييجوا يكملوا و انتم بقية الشركاء!!! يعني لو انا غبت محدش يشيل البراد من عالنار، لا تعالوا صبوه و اشربوه و كملوا القعدة :27:

ام زياد القمر، وحشتيني جدا، ايه اخبار الاولاد؟؟ يا رب تكونوا بخير. متشكرة اوي على دعوتك جزاكي الله خيرا و يا رب تكمل على خير. على فكرة اسوان فعلا حلوة اوي، انا رحتها من سنتين او تلاتة تقريبا بس كنت لوحدي مش رحلة و قعدت كام يوم عن صديقة ليا هناك و كنت باعمل جولات ميدانية و بجد انبسطت اوي اوي من المناظر الجميلة هناك، و لما رجعت كنت مصورة فيلم كامل مناظر طبيعية و انا مش طالعة غير في صورتين بس :icon28: و كمان رسمت على ايدي حنة هناك و راجعة من هناك عاملة زي باكاكاداسا و سمرا و لابسة عقود غريبة لدرجة ان اخويا معرفنيش و هو مستنيني على محطة القطر :27: قال انا شفت واحدة افريقية نازلة بشنط كنت حاسألها مشفتيش اختي معاكي في القطر :30: نفسي بقى اروح الاقصر كمان، بس اسمع انها معابد بس مفيش مناظر طبيعية حلوة كتير زي اسوان و الله اعلم

ام ابيها فطومة، ربنا يخليكي ليا و جزاكي الله خيرا على النصيحة. انا الحمد لله باستخير ربنا في كل قرار مصيري باخده و باحاول اني اكون معتدلة في قراراتي، و ربنا يسهل و ييسر لي الامور و مخدش قرار غلط او متسرع في اي حاجة مستقبلية، دعواتك معايا يا فاطمة. ازاي ياسمين يا طمطم؟؟ وحشتني خالص و عاوزة اشوفها تاني :)

يا منمن، صباح الفل، الشاي عالنار اهه، و انا قاعدة اكلمكم و معايا مج ينسون يهدي الجمجمة. معلش يا منمون الناس احيانا بتفكر انك لما بتضحكي و بتهزري و بتتنفسي تبقى حياتك وردي و مرفهة و معندكيش اي مشاكل، محدش بيشوف اللي جوا حد، بس في نفس الوقت الانسان بيضطر يلبس ماسك الانبساط ده عشان مينفعش انه يمشي مكشر و متجهم على طول لان برضه الناس مش حتفهم هو زعلان ليه >>>> فهمتي حاجة يا منى؟؟؟ لا!!! أحسن، ما هو ده تأثير الينسون يا بنتي :30:

انا جيت
احجز كوبايه بس لحد ما البنات يناموا و اجي اقعد بقي

رديت عليكم كلكم و مش باقي غير دندونتي، يا ستي الشاي و كل المشروبات الساخنة و الباردة في انتظارك، خلصي المشوار و تعالي على طول

يا جماعة ادعوا لفريق دبي اللي بيدربه زوج اينا لان فيه مباراة بينه و بين فريق العين النهاردة الساعة 7. ربنا يوفق فريق زوجك يا اينا و ينصره و يريح بالك يا رب

حلوة معلومة البليدج يا دون، نجربها

رنرونة، الشاي عالنار و النعناع عند هبة، ياللا نيمي البنات و تعالي اتدفي معانا

معلومتي:

ارتفاع عدد الناجين من حادث العبارة الى 389

السلام عليكم
ازيكم كلكموحشونى
ازيك يا نودىىى عامله ايه
انا بحجز مج كبير شاااى بالنعناع
وراجعه ليكم لما العيال يتلهوا فى اى شيء
ام باسل