الى اختي monsaf وكل البنات الي يعرفو بخياطة الستائر

والله العظيم صار ساعه اكتب لج بالتفصيل الممل
ولما وصلت للنهايه تسكر جهازي كله


انتظري عليه بكتبه لج من جديد

سهل ما يبيلها شغل

عندك ستاره قديمه ؟؟؟؟

وش نوع ستارتك اقصد عامودها كيف شكله ؟؟

انا بشرح لج ستاره السجه

تقيسين عرض وطول الشباك
مثلا اذا عرض الشباك 4 امتار لازم تشترين قماش وتسوين العرض 8 امتار يعني لازم الضعف
ورغم ان اكثر الاقمشه عرضهم 3 امتار بهل حاله انتي تخيطين القطع وتسويهم ضعف عرض شباكج

ولا تنسين الطول وتضيفين على طول شباكج 20 سنتمر عشان الكفه من تحت والسفيفه من فوق

هسه نجي على الخياطه
اول شي تسوين ضعف عرض الشباك وتخيطين الجهه اليمنه واليسرى من البرده
كل وحده على 3 سنتمر وتصير دبل حتى لا يطلع خيوط القماش
وخط مسستقيم تمشين بالمكينه ونضيف
ولا تنسين تظربين اوتي كل الخياط

هسه نجي على الجهه الفوق وهذي اهم شي
تشترين سفيفه عرض عادي وتشترين نوع شريط يكون عرضه 5 سنتمتر وهذا تسالين بيه صاحب المحل تقوليله لاصق البردات
بس طبعا هو ما يلزق علىا لقماش يكون مثل الورق المقوى حتى يثبت البرده من فوق ويطلع شكلها احلى
تاخذين هل لاصق وتمسكين البرده من فوق
وتحطين الاصق عليها وتطوين القماش يعني لازم الاصق ما يبين وتطوين تحته بعد واحد سنتمتر عشان القماش مثل ما قلنا ما ينسلت

وتمشين بالمكينه هم خط عدل ونضيف
ومن تكملين تضربين الاثلاث جهات اوتي عدل تكويهم خووش كوي
بحيث يصيرون مثل الورقه

هسه على اهم خطوه
تاخذين السفيفه وتحطيها فوق المكان الي خيطتي فيه الاصق
بس يكون بالوسط بالضبط يعني تقيسين المسافه الي بيها الاصق وتحطين السفيفه بالوسط
وتطوين بدايها تحتها وتتركين اقل من سنتمتر واحد في البدايه حتى ما تبين السفيفه


هسه اكملج الباقي قبل لا يطفى الجهاز

وهسه من بدايه الخياط قبل ما تشغلين المكينه تطوين القماش تحت السفيه 3 سنتمر على الجهه اليسار
وتتركين واحد سنتمتر وتطوين 3 سنتمر على الجهه اليمين
والسفيفه تمشي فوق الطويات بدون ما تطويها يعني السفيه تمشي خط عدل ولازم تكون نهايه الخياط مثل بدايته يعني نفس الكسره ونفس القياس حتى ما يخرب الشغل كله
وعلى هل حاله مره يسار مره يمين بس بالترتيب يعني من تشوفيهم من وجه البرده راح يبينون معاج مثل طويه القميص الرجالي من الخلف

وتمشين وتنتبهين على القياس وككل شوي قيسي البرده حتى يطلع قياسها مضبوط مع الشباك

ومن تكملين ترجعين قاط ثاني على السفيفه من تحت حتى تثبت عدل من فوق ومن تحت وطبعا لا تنسني تطوين حافه السفيفه من الجهه الاخره مثل اول ما بدينا

وهسه انتي كملتي الفوق
تظربيها اوتي من فوق بس على الخفيف يعني بس حتى ثنيه الخياطه تروح وتبين مثل الورد
ولا تنزلين بالكوي للكسره لا ابد ترى مو حلوه تصير

هسه تجيبين الجناكيل مالت البرده وتعلقيهم كانو تريدين تعلقيها على الشباك
وبالفعل تكملين كل الجناكيل وتعلقين البرده وتشوفيها
وتختارين هي ومعلقه على الطول الي ترييديه
مثلا تريديه للارض
او شوي فوق



هسه نكمل الباقي

هسه تجيبين طباشير الخياطه وتحددين مكان الطول الي تريديه وهي معلقه
يعني مثلا تريديها طويله تمشين بالطباشير على الطول الي تريده من اليسار لليمين المهم كل عرض البرده من تحت يكون فيه طباشير حتى ما تغلطين بالطول

وتتركين تحته 10 سنتمتر عشان الكف والخياط
وتقصين الزايد


وتنزلين البرده وتكفيها على حد الطباشير وين رسمتيه
وهسه تكفيها وتخيطين خط مستقيم وعدل ومرتب ولازم يبقى تحت الخياط 5 سنتمر
يعني صار 5 سنتمر للكفه الداخليه و5 سنتمتر للكفه الي بعدها
يعني حافه البرده بيكون مكان الطباشير

فهمتي؟؟؟


وتخطيها من البدايه للنهايه ومثل ما قلنا اهم شي الكوي العدل


وبهل حاله كملت البرده ام الكسرات


هسه نجي على الاقواس الي فوقها
مثل ما قلنا اذا عرض الشباك 4 امتار
تسوين ثلاث قطع كل وحده عرضها متر ونص وطولها متر
وتسوين نهايه القطع من تحت شبه دائري يعني مو كلش مدور
وتسوين على الجهه اليمين واليسار من نفس القطعه كم كسره حسب طولهم الي تريده
في بعض الناس يحبوهم كلش قصار
بس انا افضلها شوي طويله يعني تاخذ اقل شوي من طول الشباك يكون شكلها ارقى
ومثل ما قلنا تكفيها كلها دبل كفه من فوق وتحت والاصفاح يعني كلها
وتبدين تسوين بيها كسرات مرتبه انتبهي مو خرط قلنا كسرات مثل من كل جهه خمس او ست كسرات وتكون بنفس مكان المقابله
وكلهم على هل حال تسويهم
وبعدين تجيبين شريط خاص بالبردات يكون مقعد وساعات تجي بيه كرستال او احجار حلوه
بس يكون لونه منسق مع لون البرده
واذا كان البرده لونها طوخ اخذي نفس اللون فاتح او بالعكس
وتخيطيه على القطه عدا الجهه الفوق
يعني تبدين من اليمين فوق لليسار فوق عدا سقف القطعه


هسه كلهم خلصو


وتروحين تشترين قطعه خشب بعرض الشباك وطوله ما يتعدى 10 سنتمر
وهذا الي تقسميه بالرسم الى ثلاث قطع متساويه المساحه بالضبط لاحظي بالظبط وركزي عليها
وتجيبين اول قطعه وتشووفين وين الوسسط مالتها بالضبط بعد وتحطيها بوسط الخشبه وتدقيها بمسمار صغير جدا
ويكون الدق على الحافه الداخليه للخشبه من فوق عشان مت تتعلق الخشبه ما تبين حافه القطه من فوق ولا تبين حافه الخشبه ولا الدق
بعدين من تدقين القطعه الاولى
تجيبين القطعه الثانيه وتحطين راس جهه اليسار بالضبط على حافه الخشبه من الجهه اليسار وتدقين بيها بنفس الطريقه لما توصل لنهايه قطعه القماش يعني صار تقريبا نصها فوق القطعه الاولى
وتجيبين القطعه الثالثه وتاخذين راسسها اليمين وتبدين تدقين بيها من الجهه اليمين لما توصلين بنفس الطريقه السابقه
وبهل حل وصلنا لنهايه القطع الثلاثه

بهل ششكل صار عدنا ثلاث اقواس متساويه المساحه والطول والارتفاع
والقطعه الاولى صايره بينهم من الداخل
واذا تزيد بردتج جمال
تسوين قطعتين مستطيله طولها متر ونص وعرضها ثلاث ارباع المتر
هي مستطيل بس من تحت تكون على شكل زاويه مدببه يعني مثلا تصير الحافه الصغير للداخل
وطبعا من نفس قماش البرده وهم تكفيه كل حوافها وتبدين تشتغلين عليها بنفسس الشريط الي اختاريتيه للقطع الثلاثه
بس الجهه الطويله من القطعه تكون للخارج
وتلزميها من فوق وتسوين بيها ثلاث كسرات للداخل
وتدقيهم على حافه الخشبه من الجهتين الزاويه الطويله للخارج والقصير للداخل
وتدقيهم بنفس الطريقه فوق القطعه الثانييه والثالثه
يعني بس على راس الخشبه من الجهتين




وهسه تعلقين الخشبه مع القطع فوق البرده يعني تدقين الخشبه بالسقف
وتعلقين البرده على السجه تحتها

وتصير عندج احلى برده من صصنع ايدج وهذا الاهم



واذا انتي عايشه بهولندا اني ادليج على اماكن الاقمسه حق البردات واسعارهم حلوه وبعد ادليج على الاشرطه وكل الي تريده


واذا م فهمتيي اي شي قوليه ومن عيوني اعيدلج الشرح واني الممنونه ياقلبي