ام زوجي واخواته اخذين مكاني

بدخل بالموضوع على طول لي ثلاث سنوات متزوجه من وانا عروس وانا مسالمه مع حمولتي تخيلو ثلاث سنوات ماصار هواش بيننا لاني مسالمه لدرجه مره زوجي قالي انا يوم خطبتك توقعت بعد الزواج انتي وامي واخواتي راح تتهاوشون وكل يوم افصل بينكم لاني هذا اللي اسمعه استغربت انك مالك حس معهم ودعالي من قلبه
بس يا اخوات من يوم تزوجت وانا ملاحظه ان زوجي لايمكن يستفرد بأمه وخواته غير مايرجعلي منعفس حاله وحالته تنقلب يصير سرحان ويفكر ومتوتر ويرمي علي كلااام وتتغير كل قراراته ويطلع بقرارت جديده ماتظهر الا يوم يزورهم لحاله
طبعا بس للتنبيه انا دايم اروح معه عند اهله بطلب من زوجي نفسه ماعدا يوم بالاسبوع يطلب مني يروح لحاله لانه يبي ينفرد فيهم وانا الحمدلله احترم هالشي واللي ما ارضاه لنفسي ما ارضاه للناس اقول من حقه ينفرد مع امه واخواته لوحدهم ونيتي مانفعتني يرجعلي محرش ومعبى راسه
انا مالي اي هوشه او دق بالكلام معهم طيب نفسي افهم يحرشونه على وشو بالضبط ؟؟؟ لو في دق بالكلام من ناحيتي او صارت بيننا هوشه بقول شالوا علي بقلوبهم وفضفضوا لزوجي يربيني لكن اروح لهم زي القطوه حتى مكاني هو نفس الكنبه اللي اجلس عليها بكل مره ما اغيرها واطلع من عندهم عمياء وصمخه لا انقل عنهم ولا اتلقف ببيتهم و عندهم غرف ما عمري لمحتها مع اني امر من هذاك المكان اجباري بس ما اسمح لعيوني انها ترتفع لهالغرف وتملح وامه مافي ذره ببيتي ماشافتها ولمحتها حتى دواليبي شافتها
طبعا من وانا عروس مالي شهر واحد صار اول موقف تحريش وكنت مصدووومه ماني فاهمه اذكر اني جلست يومين متوتره اقول ليه يسوون كذا ؟ انا وش سويت؟ طيب انا ماسويت لهم شي؟ يعني جلست زي المجنونه تقدرون تقولون اللي صار ان بعد زواجي بشهر زوجي رجع من عندهم عيونه حمراااااااااااااااء وربي سواد عيونه مو باين من الاحمرار وانا زي الخبله اضحك معه وماخطر على بالي ان اهله قطعوا لحمي يوم استفردوا فيه مافهمت شي لييين رمى علي كلام مـــــــو كلامه ابدا كلام بلهجه جديده قلتله يافلان هذا مو كلامك انت هذا كلام احد ثاني نزل راسه وقال الله يهدي امي وصدقيني لو احد عبى راسي عليك مابسمع (( وللاسف هو قالي مابسمع لكن كثر الدق يفك اللحام))ومن يومها لي ثلاث سنوات اخذوها حلاو ماينفردون فيه الا يرجعلي متضايق مني او معصب مني و مايحط عينه بعيني لو يموووت وانا يا اخوات عمري عمري عمري عمري ولا مررررررررررررررررررره بهالثلاث سنوات من زواجي فكرت اقلب راسه على امه ولا بيوم حرشته على امه او اخواته وهذا اللي ريحهم وساعدهم عرفوا اني مغفله وعلى نياتي صارو يزيدون والحال كل يوم من سيئ لاسوء ومن حفره لدحديره
انا الاحظ ناادرا مايجو الاثنين طيبين اما تكون الزوجه طيبه و ام الزوج تحريش ومشاكل او العكس الزوجه تقلب الزوج على امه وتتهاوش وام الزوج تصير طيبه غصب لان اثنين اشرار نادر ماتجي
ومره رجع من عندهم مايسولف معي ومعصصب وكل شوي امه تتصل يروح المجلس يتساسرون مدري وش صار ذاك اليوم بالضبط انعفس ومافكت اخلاقه الا بعد يومين
صرت احس ان ام زوجي اخذت دوري لان اغلب الرجال بس يتزوج يقلب على امه وخواته (غالبا) قبل زواجي كنت اسمع البنات يشتكون اخونا قلب علينا اخونا زوجته غيرته والحين عرفت ليه الحريم يسوون كذا لان اذا انتي ماسويتي ((غيرك بيااااااااااااااخذ دوووووورك ويسويه)) وانا اخذو طيبتي خبال وبلسانه زوجي قالها لي مره قال الزوجه مافي وسط ياشرانيه والكل يهابها يا خبله ! قلتله والطيبه ؟ قال الناس ماتفهمه طيبهامه الاحظها تحترم اللي تفرض شخصيتها عالناس اشوفها بالجمعات مع الحريم يوم تشوف وحده فارضه نفسها وشخصيتها تصير ام زوجي قطووه وتضربلها تحيه بصراحه افكر اتغييير واسوي شخصيه جديده وربي مع اني رسميه ولا مره غلطت عليهم لاني بطبعي هااااااااااااادئه مع كل الناس ولا احب المشاكل ولا اي شي يجرني لها بس اكلت تراب من هالشخصيه المسالمه صرت احس عمتي هي الزوجه يمين بالله مايحس فيني الا اللي عانت مثلي ولا اظن اصلا في وحده مثلي بهالمسالمه

اخر شي حصل قبل شهرين بالضبط راح عندهم لوحده وله شهرين ماطلب مني اروح لاهله تخيلو؟!!!!! هو يزورهم لوحده كل اسبوع وانا مقفل الطرق اني اروح لهم!! ماهمني بيتهم لو ما اشوفه العمر كله يوم عيدي وربي لكن ابي افهم وش صار؟؟اذا انتو تعرفون السبب فأنا اعرف. انا مصدوووووووومه وش صار وش حصل وش اللي جرى مدري انا متعوده زوجي مايخليني ابطي عنهم الا اسبوعين بالكثير يزعل لو مارحت لهم كل اسبوعين والحين لي شهرين ماطبيت بيتهم وهو سااااااكت وزوجي للان مو راضي يتكلم لاني ما سألته ولا اقدر افاتح زوجي بالموضوع عشان لا اخنقه كفاااااااايه اهله خانقينه بالنيابه عني اخذو دوري وزياااااااده الله ينتقم منهم ولايوفقهم لو كانو ظلمووووني عسى قهري وحرقة قلبي ماتتعداهم يارب

لكن كثر الضغط يولد الانفجار الظاهر لازم ابدأ اتغير الظاهر ان الطيب مو كفوهم بس الله يعدي موضوع قطيعة بيتهم على خير شايله هم شي مالي ذنب فيه ولا ادري وش الموضوع اصلا لو انتو فاهمين فأنا فاهمه