انتي لا تخلين استحمامك يومي
سوي خلطات كل يومين او ثلاثه ايام
مااتوقع كذا كثير او يضر
لانك اصلا لو ماحطيتي شي بتستحمين كذا والا كذا

فالبداية حابة أقولك ترا الاهتمام فهاي الفترة ما بيعطي ذيك النتيجة إذا ما كان الاهتمام من أول ....
استغربت من الأخت اللي قالت ما ينفع تستحمي كل يوم !!!! بالعكس الماي يحرك الدورة الدموية و بعدين بينعش خاصة إنك في فترة نفاس و رضاعة و تعرفين ريحة الحليب مب زين لك و للبيبي .. بالعكس النظافة من الإيمان ..

يلا باسم الله نبدأ مع الشعر ..
شوفي إختي احرصي على دهن شعرك إذا ضمنتي ما راح يجيك ضيوف أو زوجك و أنصحك بزيت الحية يكثف بالمواظبة و ينعم و اللمعة ما يبالها كلااام و هذه صورته


و إذا بغيتي شي بدون ريحة عليك بالفازلين يعطيك لمعة على طول و انتعاش حطيه ساعتين ثلاث

و إذا عنك بنات عوديهم عليه كل يوم ما يضر و بدون ريحة و شوفي شعورهم كيف بتطول ..
و حاولي أخيتي بعد ما تغسلينه بالشامبو إنك تمسحين شعرك ببلسم أي نوع تحبينه دقيقتين و اغسليه هو كمان .. و إذا عنك وقت بعد ما تنشفينه بالفوطة امسحي بمسحة من أي كريم و أنا أفضل باراشوت ريحته خباال كأنه معطرة شعرك و يعطيه انسيابية ..
ممكن تشوفين إنها عملية طويلة و ما عندك وقت إلها لكن صدقيني متى ما واظبتي عليها و وفرتي الأغراض كل في مكانه بترتاحين و بتتعودين ...

نجي ألحين للبشرة
بردي فالثلاجة غرشة ماي ورد و كل ما تصحي من النوم( هذا إذا نمت أصلا من الواق و الويق هههه الله يعينك بس ) بعد ما تغسلي بالصابون اغسلي بماء الورد أو حطيه في بخاخ صغير و بخي على وجهك و الرقبة .. آخر انتعاااااش ..

و ممكن تعصري حبتين خيار بدون قشر و برديهم بعد .. كمية تكفي ليومين بس و بعدها اعصري غير ، حطيه كماسك رفيع على الوجه و الرقبة من 5 إلى 10 دقايق .. و استمتعي بنعومة كبشرة البيبي ، أعرف اخصائية تجميل ما اتحط على وجها إلا عصير الخيار ...

و الشفايف .. عليك بمرطب لابيلو المعروف خذي اللي بالكرز بيرطبها و بيعطيها توريد مع الاستخدام و إذا ما تبين تكونين كأنك متكشخة خذي الوردي مب مشكلة ...
و ممكن تستبدلينه بزبدة الكاكاو رهيييبة تشيل التشققات و ترطب موجودة في لايف ستايل و فالصيدليات ..

وصلنا ألحين للبدي ( الجسم هههه ) :
بشكل عام إذا بغيتي الترطيب عليك بزيت جونسون للأطفال و في منه على شكل بخاخ ( ما خلوا شي عشان يريحونا ) بعد ما تستحمي بخي على كل جسمك و هو بعده مبلول و بعدين تنشفي ....
و احرصي كل ما لقيتي فرصة ادهني كل جسمك بكريم فازلين اللي بزبدة الكاكاو ( اسمه زبدة عااد ما في داعي أتكلم عن النتيجة )



و بين و بين إذا حصلتلك فرصة افركي ركبك و اكواعك و الإبط بليمون شرط الأصفر و أفضل قبل ما تستحمي بساعة ..

و لا تنسي القدم خذي لك المبرد الخاص بشل الجلد الخشن و رطبيها بعد ما اتخلصي بكريم فازلين الأزرق للقدم


يتبع أخيتي في رد ثاني ..

نسيت أقولك بالنسبة للوجه أنصحك بمنتجات الهملايا مثل ( اسمحيلي حاولت أبحث عن صور لها ما لقيت )
1 قناع تفتيح البشرة و من مكوناته الزعفران .. عن تجربة رهيب
2 لوشن مرطب للوجه .. استخدميه مرة قبل النوم بشوي لا تخافي طبي و مضمون .
3 مقشرات و سنفرات للوجه بتحتاري روحي تسوقي و خذي الي ترتاحين له و ما راح تستخدمينها إلا كل أسبوع مرة ممكن تستغني عنها بالأشياء الطبيعية ..

و في مرطب لليد راح تدعيلي إذا جربتيه

موجود فالصيدليات و قسم العناية بالبشرة في كارفور و هايبر بنده ، خليه جنبك عالكومدينو كل ما جا عبالك حطي منه ...

و الرقبة وحليلها ما نسيناها ،، عااد هي من المظلومين أيام الحمل لازم انبيضها ألحين ،،، عاد ما في مثل




قبل ما تستحمي افركي رقبتك و بلا ما نصعبها في أي وقت طرا على بالك طيري عليه .. ههههههه


و لا تنسين تجلسين مرتين فاليوم في منقوع الماء و الملح .. إذا نصحوك الدكاترة و كل حد و طريقته ...

هذا اللي يحضرني ألحين بالنسبة للعناية بالبشرة ...ما أدري يمكن حملتك هم لكن ما عليك بشوية عزيمة بتطلعين فل الفل ..

و التغذية مجالها كبير ..أهم شي الحليب بشوية حلبة ( ع فكرة ترا لين اليوم ما في خبر أكيد إنها تكثر الحليب ) اللي يزيده النفسية المرتاحة و مع هذا ما نستغني عن الحليب ، و بعد الحبة الحمرا بالحليب و إلا بالكستر و حد يسويها بالسحلب .. سوي سيرج و طلعي الطرق ... شراب الزنجبيل بشوية سكر يمدحونه بعد ..

لي عودة لك أخيتي بس عيالي الله يصلحهم عافسين البيت عاااصفة هبت علينا ههههه

متابعه

فيه بعد السدر
اشتري اللي بالكيلو يجي مطحون من العطار واستخدميه بدال صابون الجسم يشيل السواد اللي بالبطن بعد الولاده
لكن لازم ترطيب لانه يجفف الجسم وطبعا اذا جف جسمك ولا رطبتيه هنا تسمر البشره