ماشالله متيمعين هني و انا مادري

سوالفكم اتونس .. و قصصكم اتشجع و صدقوني و انا اقرا حسيت بكل اللي حسيتوا فيه لانه مر علي .. شعور العزله و التخشخش بالبيت و شعور الحره من كلام الناس و التطنز و شعور الثقه بالنفس واللبس ..
و حتى انا قلت قصتيي 100 مره بس يالله نخليها 101 ..

بس بليز اختي MadooOooi
لا تعيدين كلام البنات مره ثانيه .. و الله انحولت عيوني و انا اطوف .. ماله داعي تكرار كل قصه مرتين .. لاحظي انهم قصص مو سطرين .


اما قصتي الله يسلمكم اني بطه من يوم اولدتني امي ... و طبعا بطفولتي كنت اسمع التطنز من المدرسات بالمدرسه و من زميلاتي بالمدرسه و من بعض الاقارب .. و يوم الفحص الصحي السنوي بالمدرسه يكون عندي يوم عزا .. اموت من الفشله من وزني و دايما اكون امتن وحده بالمدرسه
اذكر ان وزني كان 72 لما كان عمري 12 سنه .. و طول فتره الطفوله مافكرت بالريجيم ولا طرا على بالي .. بس لما رحت الثانويه كبرت و قمت اغار من اجسام البنات و اتمنى لنفسي فبديت اسوي ريجيم على كيفي .. تخفيف اكل و كان وزني بالتسعينات و لما خلصت ثالثه ثانوي صار الغزو على الكويت و انا كنت من الصامدون :17: .. طبعا بفترة الغزو ماكان على بالنا الا شنو راح يصير فينا بعد شوي يعني يامن يعيش و يامن يموت و نسيت الريجيم ..بعد تحرير الكويت وزنت ولا وزني 80 ... طرت من الفرح ظعفت من الخوف هههههههه .. المهم ردت الحياة لطبيعتها و كملت دراسة رابعه ثنوي و بدون ريجيم بس كان هم الثانويه العامه كبير و المحاتاة والخوف والدراسه للصبح ولا كنت اشتهي الاكل من نفسيتي الزفت و الخوف من الامتحانات .. خلصت الثنويه و بتفوق وزنت نفسي ولا وزني 75 و كان جسمي منيكان

دخلت الجامعه و ابدع باللبس والكشخه و نسيت الريجيم و احب روحي صرت عارضة ازياء خلال سنه وحده بس وزنت الا وزني 99 .. يا لاهوي .. دارت الدنيا فيني و قررت اروح لدكتورة تغذيه .. ورحت للدكتورة ميري بمستشفى الصباح .. و كنت ابهالفتره ناس وايد يشوفوني علشان يخطبوني ونصهم يروحون مايرجعون و يقولون متييينه ..
والله انقهرت و قلت لازم اضعف اولا لان شكلي صار مقرف واللبس لوووعه .. ثانيا علشان ابي اتزوج :17:

كملت ريجيمي مع ميري و صار وزني82 و انخطبت و تزوجت
وباول ايام الملجه والزواج نزل وزني زياده و وصلت 77 .. و رجعت صرت منيكاااااااااان
جان احمل و يوصل وزني بالتاسع 100 ... وبعد الولاده مافكرت بالريجيم و ظليت اكل اكل و بعد سنتين وصل وزني 108 و حملت مره ثانيه ... و بعد الولاده مافكرت بالريجيم لاني يأست من جسمي و قلت هالشحم اشبينزله والله لو امووووت من الريجيم ماراح اضعف .. يعني انسي تضعفين ... و تميت اكل اكل لحد ماحملت مره ثالثه و بالتاسع وزني صار 120 .. باختصار صرت 4 حريم بجسم حرمه وحده... و كنت متضايقه من وزني وااايد واللي زاد الطين بله اني بشهر ابريل سنة 2000 كنت بالشهر التاسع و كنت اروح امشي بالممشى علشان تتسهل ولادتي .. كان زوجي يمشي معاي و قال انا بروح اركض شوي و ارجع قلت اوكي راح يركض و رجع ... وقال لي اتصدقين ماعرفتج من بعيد والله صايره كره .. قال شوفي و كان يضحك و يتغشمر .. بعطيج مهله لشهر اغسطس قال ان ما ضعفتي ترا تدلين بيت اهلج .. و كان قايلها ضحك و غشمره .. لكنها اذبحتني والله يا بنات .. موتتني من الحره .. قلت الله يالدنياااا انا يقول لي جذي؟ .. بس مارديت عليه و سكت و كنت من داخلي ابجي

ابهالفتره اختي كانت يايبتلها ريجيم من صديقاتها و سوته و لما شفتها بعد 3 اسابيع انصدمتتتتتت حييييييييل اختي ضااااااااااااااااعفه وايد وايد وايد .. قلت لها شمسويه؟ قالت ريجيم كيميائي و نزلت اب 3 اسابيع 11 كيلو .. قلت لها عطيني هالريجيم بسويه اول ما اولد

ولدت ولاده قيصريه و عقب الولاده اب 10 ايام بديت الريجيم الكيميائي ( اسامه حمدي) وكنت اول مره اسمع عنه
قلت اسويه بالنفاس علشان اطلع من النفاس شوي مترتب جسمي عالاقل

والله يابنات سويت الريجيم و ينزل وزني بشهر 15 كيلو .. والكل لاحظ علي .. وزوجي مستانس و يشجعني و الناس ملاحظين اني خفيت ..
تشجعت و تحمست و كررته على طول مره ثانيه و نزلت 10 كيلوات و كررته مره ثالثه و نزلت 8 و مره رابعه بس ماكملته و نزلت تقريبا 3 او 4 كيلو .. وصل وزني 78

صرت وحده ثانيه .. الناس يشوفوني بالسوق او بمكان عام مايعرفوني ..
و الكل يسأل اشلون صرت جذي و يقولون مسويه عمليات و مغبيه
وتحقق حلم الرشاقه

حافظت على وزني 3 سنين تقريبا و بالسنه الرابعه ( بنص 2003) بعتها بالاكل و قلت خلاص لايمكن ارجع امتن مثل اول و قمت اكل و اكل و اكل كل اللي اشتهيه و مرات اتعشى مرتين و مرات اكل كرتون كامل كاكاو بروحي .. قمت اكل بجنون .. مو بس للشبع لا... للطفووووح ... و يزيد الوزن 84 ....87 ...90....92...و اخر شي 95 برمضان .
رحت اسوي تحزيم معده مارضا الدكتور .
فرجعت للريجيم الكيميائي و اليوم انا في بداية الاسبوع الثاني
و احلم يوصل وزني 80 و بس نعععععععععععمه

ترا طولي 168

و سامحوني عالاطاله .. هذي قصتي :26:

يعطيكم العافية أحلى شي بالموضوع أن كلنا لنا قصص تاريخية مع السمنة يعني مو سنة وسنتين سنين
يعني قصتي كانت من كان عمري 13 كنت أمتن وحدة بالعايلة كانوا يسموني الدبة والله من ذاك العمر وأنا أسوي ريجيم أول مابتديت ريجيم الطبيب ولو تدرون جم نقصت غرامين بضبط بشهرين طبعا بذاك الوقت عصبت ونفعلت وقلت شنوماأكل وحرمة نفسي وما أنقص وطبعا ؟أكيد هديت الريجيم شوية ورجعت وسويت الكيميائي وكان عمري 16
الكل نقص بس أنا لا مادري ليش لافيني غدد لا مرض وتعرفون كيميائي لازم ينقص بس شتقولون حظ

وبعدين ظليت أسوي ريجيمات عشوائية على حسب الموضة <<<<<< جديدة مو جذي <<<<<<<<<
الى هذي السنة وأنا أنقص وزيد المفاجئة سويت ريجيم الكربوهيدرات ونقص وزني من 75 كيلو الى 60 كيلو
الكل تعجب والى يقولي جذي أحلى ويذكروني بايام أزمة السمنة الله يسامحهم ماحب اذكرهاوطبعا مو من زمان قبل ستة أشهر بس الحين الحمدالله محافظة ولا أفكر أهد الريجيم أبدا


قصص من واقع الحياة

ياااااااال لله قلبي شدي حيلج عشااااااااااااان البدلتين الرص

وله ما ظن تبييين تخلينهم في الدولاااااااااااااااااااب على طووووووووووول:42:

الكيكة
قووووووووووووووه قلبي
شلونج شخبارج
ولا يهمج لا اعيد القصه ولا شي

اهم شي رضاااااج علينااا حبي

بس انشااااااااااااءالله تنزليين وتوصليين لللوزن الى تبييينه

تينه المتينه

مبررررررررررررررررررررررررررررررررررروك قلبي
على الوزن اليديد وانشاااااااااااءالله تحافظييين عليه

وتعرفيين لازم الاهل يذكرون كل وحده بالماضي العريق :42: