طبعا نسيت اقول انك لو لابسة حاجة رقبتها مفتوحة و عاوزة الميك اب يكون مميز حطي الاساس و البودرة على رقبتك و الجزء الظاهر من اكتافك عشان اللوك يبقى متكامل

و يا سلام يا رووني، لو جبتي كمان البودرة البرونزية و حبيتي تغيري في يوم و تعملي لووك برونزي زي لطيفة في متروحش بعيد يا حبيبي كده!!! بجد بتبقى فكرة جميلة و تغيير غير معتاد

ايه يا واد يا أمول الحلاوة دي دي انتي استاذ ورئيسة قسم

اسمعي بقى لو شكرتيني تاني هتدفعي 75 قرش، عيب يا أمل احنا اخوات والناس لبعضيها بس ربنا يوفق ان شاء الله ويسهلها وافرح بك عروسة يا رب وياسمين تشيليك الطرحة ايه رأيك بقى

عاوزة اقول ان انا جربت ميراكل تحفة في البرفانات والله جميلة جدا وطبعا جربت فيكتوريا سيكريت بالفراولة رغم المقاطعة غصب عني ما قدرتش اصمد اصلي باحب ريحة الفراولة قوي

بنات انا فعلا مليت ومش عارفة اعمل ايه وفي نفس الوقت ميعاد نزولي الشغل قرب وكل ما افكر في ياسمين وابص لها احس اني هتجنن لو تركتها رغم ان الحضانة جنب الشغل ان شاء الله وفي اى لحظة اكون عندها بس قلبي واجعني قوي وبعدين مش قادرة اقعد في البيت اخذت على الشغل وان يكون ليا فلوسي الخاصة وهاتجنن جربتم المشاعر د قبل كده؟ قصدي الأمهات طبعا طيب وعملتوا ايه احكولي - عاوزة اضيف اني بعيد عن ماما ومش عندي حد ممكن اثق فيه واتركها معاه والمشكلة مش في الحضانة المشكلة في قلبي اللي مش قادر يتحمل البعد عنها

قلبي بيوجعني بجد والله كل ما افكر في الموضوع ده

على فكرة ياسمين في الغرفة التانية عمالة تكلم نفسها وانا باكلمكم انا سامعاها من هنا مسخرة خالص لازم تشوفوها وهى بتزعق لي وتتخانق معايا بتخبط رجلها في السرير وتقعد تصرخ زى ما تكون بتزعق لي طبعا علشان الممم او التواليت دى اهم الأنشطة اليومية بتاعتنا

ام ابيها بصي انا مريت بالموضوع ده وكنت بعيط لجوزي واقولة ازاي اسيبها دي لسه بيبي وبعدين انا ماما بتشتغل فمكنش في غير الحضانة
بس لما الموضوع دخل في الجد وابتديت اجهز لبس للشغل لاني كنت خسيت تاني بعد ما كنت قنبلة في الحمل وبعدين رحت للحضانة ووصتهم اوي وهي الحمد لله جنب لشغل
كمان بقيت بروح ارضع شادن في وسط اليوم مرة او مرتين على حسب الشغل ومكنتش بروح في اوقات محددة كنت بطب عليهم زي القضا المستعجل علشان يكونوا متوقعين اني اروح في اي وقت فكنت بتعمد اني كل يوم اروح في وقت شكل والحمد لله عدت على خير واهي بقت عندها سنتين وزي الفل ما شاء الله

بس اهم حاجة تنبهي عليهم ميستخدموش غير حاجتها بس وانتي وديلها كل حاجة علشان ميضطروش يستخدموا حاجتهم