بنتي يمكن انا اللي مرضتها ...والاحساس بالذنب قتلني..تكفون وش الحل؟؟/ قديم

السلام عليكم
اسمحولي يابنات ادخل بالمشكله على طول ..جيتكم من غرفتي للكمبيوتر على طول اكتب لكم من ضيقة الصدر والاحساس باللوم والله اني اكتب لكم وانا دموعي على خدي واعذروني على اللخبطه مارتبت الموضوع قبل ... مادري من وين ابدأ المشكله من يمكن 5 او6 سنوات او من اكثر وانا مانتبهت .
بنتي الكبيره عمرها 12 سنه حاليا ... ونفسيتها تعبانه ...دايما حزينه ومعصبه وتهاوش اخوانها وتهاوشني انا وابوها على ابسط شيء واحيانا تعصب بالمره علشان سبب تافه
وعنيده جدا جدا وماتحب الليل ولا تحب النوم ابد ابد ابد ..واذا راحت معي لاحد تسكت وماتتكلم وما تبتسم حتى ..كله خوف ... او مدري وش السبب ...
ودايما اذا قلت لها شيء تعيي
المشكله انها مهيب راضيه عن تصرفها ... وتجيهاحالات تجي لمي وتبكي وتبكي بقوه وتقول لي طفشانه وانتم ماتحبوني وانتي تحبين اخواني اكثر مني وتقولين لهم كلام زين وتعاملينهم بحنان وانا لا.. مع اني انا اللي بحاجه له ..ليش ياماما ..وتقول لي ادري اني شريره واهاوشكم وما اسمع كلامكم بس غصب علي ماودي اصير كذا ...والله يابنات هذا كلامها بالحرف الواحد ... والصراحه انا السبب دايما اهوشها ودايما اقولها انتي ليش ماتسمعين الكلام وغصب علي والله مدري ليش؟؟
اخوانها احبهم من قلب وكل شوي ابوسهم وامزح معهم واذا مثلا طاح واحد اركض له وامسح دموعه وامسح جرحه واهديه وهي لا احس اني بعيده عنها اعترف ما احبها مثل اخوانها ليش ما ادري بس اذا نامت اموت من الندم والبكاء واروح عندها بالسرير والمس وجهها واتندم على قسوتي معها واوعد نفسي اني من بكرى ابحن عليها بس بكرى ما افي بوعودي لنفسي..يمكن انا السبب اللي خليتها بهالقسوه والعناد .... والكآبه والحزن... ...بس انا اسال نفسي ليش انا معها هي بس بالذات كذا من بد اخوانها استمتع بهواشها وما اقدر احضنها ولا ابوسها ليش ليش ليش؟؟؟ كل ليله اوعد نفسي وبكرى اعجز انفذ... انا اخاف يكون فيه بيننا عين لانه علاقتي فيها ماكنها علاقة ام ولا كاني امها...
احساسي بالذنب قتلني بس الوم نفسي ... وماهمني لو بنتي تطيب وتطلع من هالحاله اللي هي فيها كان ارتحت ...والله اني ادعي بالليل كل ليله ان الله يحنن قلبي عليها ويصلح علاقتي فيها ... وان الله يوسع صدرها
والله اني ارحمها احيانا اهوشها بالليل وتنام وتقوم الصبح وتروح للمدرسه وتجي وهي ناسيه كل الهوشه وماتزعل علي وتسولف معي عن معلماتها
وعلى فكره نادرا جدا جدا ما احس انها مبسوطه حتى وحنا باسعد حال .. اشتري لها كل شيء وكل اللي تبيه وابوها مايقصر معها ابد .. كل شيء واغلى شيء عندها بس ما احس انها تستانس وتفرح من قلب اذا شرينا لها شيء جديد ...
ونسيت اقول لكم هي تتبول بالليل( تكرمون) كل ليله مره اومرتين على نفسها ... ومستحيل تنام والباب مسكر ابد ابد... وتراها ممتازه بالمدرسه الحمد لله يارب ...
وذكيه ماشاء الله
ابي اعرف وش فيها ؟؟؟ ليش بنتي كذا هل انا السبب؟؟ وش الحل تكفون يابنات ساعدون واللي مرت بمثل مشكلتي تقول لي وش الحل ؟؟
انا خايفه عليها تبتل على هالحال وتزيد حالتها سوء ويصير عندها اكتئاب ... وعلى فكره من تالي صايره اذا رحت لاحد ماتحب تروح معي ( انا احس انه حياء وخوف)
ساعدون وشيرو علي وش اسوي بها ... عمري ماشكيت لاحد الا لابوها ...الناس بعضهم فاهمينها غلط يحسبونها تتكبر او ماتبيهم ولا تبي بناتهم اللي كبرها لانهم يشوفونها تقعد جنبي اذا جت وتسلم وهي وجهها مدري وشلون اوصف لكم يعني غير مبتسمه كانها زعلانه... واللي ضيق صدري
انه قبل فتره شهر يمكن قالت لي وحده انتي بنتك مهيب طبيعيه الحمد لله والشكر عندها عدوانيه ولا تبي احد وتحس بالنقص ... انا انصدمت واسكت من هول ماسمعت مدري وش اقول والله يابنات مارديت ولا كلمه حسيت ان هالمره صادقه بس حرام عليها ليش تجرحني اببنتي وبنتي على نياتها وقلبها ابيض وغصب عليها ..هي ماودها تصير كذا هذا اللي يخليها ماتبي تروح معي للناس
لانها ماتعرف وشلون تصرف
وش اسوي؟؟
ساعدون ليش؟؟؟ وش الحل؟؟؟ يمكن تكون بنتي بها عين؟؟؟ لانها ذكيه وجميله ماشاء الله؟؟
مدري وشا الحل محتاره ...خايفه على بنتي
واللي ماعندها حل ولارد لاتبخل على بنيتي بدعوه بالليل .. الله يسعدكم ويفرحكم بعيالكم وبناتكم ويشفي مرضاكم يارب ...والله يجعلكم ماتشوفون مكروه بعزيز
وهالموضوع يابنات ابخليه مرجع لي ومع تعاملي مع بنتي تكفون ساعدون
تراي حسيت براحه سبحان الله يوم كتبت الموضوع هالحين ..غير يوم بديت باول كلمه ..يمكن لاني فضفضت عن مشكلتي اللي من سنين ولا عمري شكيتها الا لربي .
سامحون على الاطاله واللخبطه بترتيب الجمل