الحقيقة انا عكسك بيتي كبير وفيلا و متضايقة من كثرة الشغل اتمنى طابق واحد :26:

الله يوعدنا ونبني لو شقه بس اهم شي ملك ونفتك من الاجار

لو جربتي الدوريين بتكرهيهم
دور واحد احلا

السلام عليكم ..

عزيزتي صدقيني اهم شي اذا سكنتي البيت ان يكون بالك مرتاح و تحطين راسك عالمخده ماوراك اقساط ..
و مو دايم يكون جمال البيت بالمساحه الكبيره و الاشياء الغاليه الاهم الذوق ..
الدور الواحد ممكن يكون له طابع خاص و جميل ..
اول شي حددي ميزانيتك .. بعدين احتياجاتك من البيت ، عدد الغرف و حجمها حسب حاجتك ( الاخت ام فرح ماقصرت)

ما قلتيلنا مساحه الارض كم ؟
ممكن اتخلين البيت على شكل حرف u .. يعني يكون ثلاث اضلااع مستقيمه، واحد افقي و اثنين عموديين و تكون الحديقه بالوسط يعني اغلب شبابيك البيت تطل عالحديقه .. و ممكن اتخلين الصاله في الضلع الافقي عالجهه المقابله للحديقه و الجهه الخلفيه يكون فيها المطبغ و غرف نوم البنات، بمداخل مختلفه طبعا ( حرصي ان يكون للمطبخ شفاط قوي من اللي يحطونهم فوق الفرن و ان يكون التكييف فيه مو متصل مع البيت) . و اذا اسمحت الميزانيه ممكن اتخلين طوفه الصاله (جدار الصاله) المقابل للحديقه كلها زجاج حتى الباب وممكن اتخلين الباب سحب علشان يوفر مساحه .
واحد من الاعمده الافقيه ممكن اتخلين فيه غرفتك و غرفه المكتب .. و العمود الثالث يكون فيه غرفه الاستقبال ..
و يكون في باب من غرفه نومك وباب من غرفه الستقبال يطلون عالحديقه اللي بتكون بواجهه البيت ..
طبعا هذا مثال و ممكن اتغيرين في ترتيب الغرف حسب الانسب ..
اذا الميزانيه تسمح ممكن تبنون البيت على اساس انه يتحمل دور ثاني .. سبحان الله احتجتو تبنون بالمستقبل .. و لاتنسين في غرف الاولاد تحسبين احساب اللي بيون انشاء الله بالمستقبل

اتمنى يكون شرحي واضح .. الله يوفقك ..:)

لا تزعلين نفسج يا عيوني...
انا شفت بيوت دور واحد بس عن جد فخمه وهذا يعتمد على تصميم البيت نفسه...
و أهم شي يكون عندج مساحه كبيره في الارض عشان تسوين غرف النوم في جناح خاص ما تكون ابواب الغرف على الصاله... يعني يكون عندج مدخل يدخلج على جناح غرف النوم و تكون موزعه شكل حلو و صدقيني كل شي يعتمد طريقة التوزيع حتى في حال ان المساحه صغيره تقدرين تسوين لها تصميم بحيث تستغلينها و في نفس الوقت ما تلغين اهمية الحوش الخارجي...

و حطي في بالك يا عيوني و انتي تصممين البيت انه مستقبلاً راح يكون فيه باذن الله دور ثاني ... عشان مستقبلاً اذا توفرت الماده تكملون الدور الثاني...
مثلي انا في بيتنا دور واحد بس استغلينا الغرف تكون معزوله تماماً عن البيت يعني تعتبر جناح خاص في خلف البيت و قدام البيت يكون الاستقبال و المطبخ و طبعا الحمامات موزعه على البيت...
و احنا نبني لسه ما كملنا بس كنا عاملين احتياط ان البيت اذا الله سهلها بيصير دورين و تدبر معانا مبلغ و سويناه الحين دور ونص يعني طلعنا الغرف فوق و الصاله كنت مخليه فيها فتحه كبيره من الزجاج في السقف على شكل قبه و الحين كنسلناه قبل ما نحطه و خلينا هالفتحه هي نفسها فتحة الدرج اللي يطل على الصاله و طلع شكله مرررره حلو... يمكن لو ان احنا من الاول ما حطينا في بالنا ان البيت بيكتمل دور ثاني كان انحسنا بس من البدايه واحنا حاسبين للدور الثاني و مسوين له شبه مخطط بعد و الحين سوينا نص الدور و لما الله يرزقنا عيال (يارب يا كريم) باذن الله نكمل النص الثاني و يصير فيلا دورين كاملين...

انتي هونيها و شوفي لج مهندس شاطر عنده افكار وابتكار و الله يوفقج ويجعله بيت الهنا عليكم...

وخذي عندج هذي بعض التصاميم اللي لقيتها


فيلا مكونة من طابق أرضي فقط بمساحة إجمالية (2500) قدم مربع، وتحتوي الفيلا على:

- مجلس مع حمام ومغاسل.
- صالة معيشة.
- مطبخ.
- غرفة نوم رئيسية مع غرفة ملابس وحمام.
- غرفتي نوم رئيسية مع غرفة ملابس وحمام لكل منهما.


-*-*-*-*-

فيلا مكونة من طابق أرضي بمساحة إجمالية (2100) قدم مربع، وتحتوي الفيلا على:

- مجلس مع حمام ومغاسل.
- صالة معيشة.
- غرفة نوم رئيسية مع حمام وغرفة ملابس.
- غرفة نوم مع حمام.
- غرفتي نوم مع حمام مشترك.
- مطبخ.


-*-*-*-*-

فيلا مكونة من طابق أرضي بمساحة إجمالية (3300) قدم مربع، وتحتوي على:
- صالة معيشة مع غرفة طعام.
- مجلس مع غرفة طعام وحمام.
- غرفة نوم رئيسية مع غرفة ملابس وحمام.
- غرفة نوم عدد (2) مع غرفة ملابس وحمام لكل منهما.
- غرفة خادمة مع حمام.
- مطبخ مع حمام.


اتمنى اكون افدتج يا الغاليه ...