تجاربي مع السمنة و الرجيم ( مهم جداً لكل من تبحث عن الرشاقة)

تجاربي مع الرجيم : مهم جداً لكل من تعاني مثل معاناتي
أخواتي الغاليات أحب أقول لكم عن تجربتي مع الرجيم علشان تستفيدون مني و علشان كذلك تزودوني بأي نصائح ترونها مناسبة
يا جماعة الخير أنا الحين عمري 25 سنة و مو متزوجة طولي حوالي 153سم يعني مب طويلة
راح أقول لكم عن مراحل زيادة الوزن عندي :
المرحلة الأولى : 1999م
في سنة 1999م كان وزني 73كجم و هو طبعا كثير بالنسبة حق طولي بس ما كنت مهتمة وخلال سنة 1999م سمعت عن خل التفاح و رحت و شريته من الحواج ( العطّار) و كان العطّار يخلط الخل مع بعض الأعشاب و قال لي شربي فنجان من الخل في كاس ماء عقب كل وجبة 3 مرات يومياً والله يا بنات انه نتايجة رهيبة جداً تدرون انه خلال أسبوعين تقريبا نزل وزني إلى 68كيلو و صار جسمي يجنننننننن صار كأنه منحوت فظيييييع بس بعد ذلك سمعت انه يضر المعدة كثيراً لذلك تركته ، و صرت فقط اخفف أكلي و امشي كل يوم حوالي ساعة امشي خلالها مسافة 4كيلو، و من فترة سمعت إن خل التفاح يكفي أني اشرب منه كاس ماء دافي مع الخل صباحاً على الريق علشان أصير ضعيفة بس تصدقون أني ما استحمل طعمه صارت ريحته تدور راسي و عقب ذلك تركت أي شي له علاقة بالتخسيس و الرجيم
المرحلة الثانية : اواخر 2003م
بدأ وزني يزيد و يزيد و يزيد الى ان وصل 85.5 كجم في أكتوبر 2003م تعرفون شنهو السبب ؟؟؟؟؟ والله يا بنات السبب إني ما كنت حريصة على إنزال أي كيلو يزيد عندي كنت آآآآكل ولا أتحرك كثير حركتي كانت عادية و كان الموضوع عادي و في نفس الوقت اموووووت أبي أصير رشيقة و البس مثل البنات ، تصدقون إن الكل كان يعطيني عمر أكبر من سني مع أني صغيرة كلهم يظنون أني أم عيال لأني دبة دبة المشكلة إن الدهون متركزة في الزنود و الأرداف و الفخوذ ، لي كرشة طبعا و طبيعي هاهاهاهاهاها بس على الأقل لي خصر لكن الزنود مسببه لي أرق لأني بالعباية أبين أني امتن من وزني الحقيقي فاهمين قصدي يعني من غير العباية على الأقل يبين أني صوب البطن ضعيفة شوي بس بالعباية خبركم تعطيني شكل البراشوت هاهاهاهاهاهاهاهاهاهاا
المهم يا جماعة انه في آخر سنة 2003م و حتى بداية 2004م كانت نفسيتي زفت بمعنى الكلمة لأني صرت دبة بشكل رهيب جدا و الكل يحن عليّ : خففي وزنج مب زين لج أنتي توك صغير .... امووووووووت من الحرة لأني عارفة هذا الكلام ما له داعي احدد يردده لي بس ما كانت عندي عزيمة أو إصرار لإتباع أي نوع من الرجيم و لو حاولت اخفف وزني والله أني ما أكمل اليوم الثاني و ارجع آآآآكل و كنت آكل في كل وقت و كل الأكل أحبه


المهم يا جماعة الخير إن صديقاتي الثنتين و هم متزوجات و عندهم عيال يعانون نفسي بقول لكم تجربة صديقتي الأولى ، و هي أكثر وحدة فينا دبدوبة فــ راحت لأخصائية تغذية عندنا في البحرين :
كالعادة عطتها نظام غذائي عام يعني قالت لها أكلي و لا تأكلين ( الأكل اللي حنا حافظينه خصوصا اللي يعانون مثلي )
و لا تنامين كثير لان فيه شي في الجسم ( ماذكر اسمه بالضبط ) يحرق الدهون و هذي الشي نشاطه يبدأ من حوالي الساعة 9 صباحاً حتى الساعة 12 الظهر فــ حاولي انك تستيقظين من النوم مبكراً
و عطتها حبوب الريداكتيل
استخدمت هذا الحبوب و طبعا سد شهيتها عن الأكل و ضعفت كثيييييير خلال فترة بسيطة بس ما اذكر كم كيلو المهم أنها للأسف عانت من الأرق و سرعة دقات القلب و العصبية فـــــ ما قدرت تكمل مع الحبوب و تركته و رجع وزانها السابق

صديقتي الثانية كذلك عانت من زيادة الوزن خصوصا بعد مرور سنة على ولادتها الأخيرة و من كثر ما كانت تعاني قالت أنا لازم أسوي رجيم اياً كان نوعه بس أهم شي وزني ينزل حتى لو بسرعة علشان عقب أحافظ عليه لذلك اتبعت رجيم هوليوود مدته 6 أسابيع و هو متعب جداً ، تعب الجسم و تعب الجيب هاهاهاهاهاها لأنه فيه أشياء مو متوفرة بسهولة و لازم تروح تدور عليها لين تحصلها ,,, المهم إن هذا الرجيم كانت نتايج فظييييييييييييعة صارت تجنن نزل وزنها حوالي 9 كيلو صحيح إن الرقم قليل لكن بيّن عليها بشكل واضح و عندما كملت الأسبوع السادس زاد وزنها بس مب واااايد زاد حوالي 3 أو 4 كيلو و هي تحاول تنزل أي كيلو تزيده ، بس هذا الرجيم يبي له إرادة قوية جدا ، وهو مكتوب في هذا الرجيم أنها تنزل حوالي 18 كيلو في 6 أسابيع بس هي ما نزلت إلا 9 بس هذا الشي عادي ،،،، لأنها ما تسوي رياضة كثير كانت تمشي من فترة إلى أخرى

في هذي الأثناء صديقاتي يضعفون وأنا محلك سر حالتي حالة دبة و الوع الجبد و نفسيتي زفت تصدقون أني وصلت لمرحلة أني ما أحب اطلع من البيت ما أحب أشوف احد ولا أبي حد يشوفني و كان الكل يقارن شلون صديقاتي أمهات العيال ضعفو وأنا كأني أم لمليووون طفل::: فــــــــــــ كانت بداية رحلتي مع الرجيم......

المرحلة الرابعة :
و كانت هذي المرحلة الحاسمة و تنقسم الى ثلاث مراحل و هي :

المرحلة الاولى : فبراير 2004
تخفيف الأكل بشكل بسيط لمدة حوالي شهرين ابتدءاً من بتاريخ 16/2/2004م و نزلت حوالي 4كيلو و نصف.....
المرحلة الثانية:ابريل 2004م
في مرة من المرات و في معرض الكتاب لقيت كتاب اسمه : الرجيم الكيميائي و رجيم الفواكه و العصائر ، الطريقة الآمنة و الأسلوب السريع للتخسيس بدون دواء للدكتور : حسن فكري منصور
هو كتاب صغير لكن فيه أنواع وايد من الرجيمات لذلك اخترت منه الرجيم الكيميائي ( رجيم غير عن رجيم الدكتور أسامة حمدي ) و بنقله لكم هذا الرجيم في مساهمة قادمة بإذن الله ، بديت الرجيم بتاريخ 12/4/2004م و مع الرجيم استخدمت حبوب الريداكتيل اللي صديقتي عافته ( على فكرة هو في البحرين يباع بروشتة طبية و سعره 24 دينار بينما في السعودية يباع عادي و ب150ريال 10ملج) و استمريت على هذا الرجيم شهر نزلت خلالهم 6 كيلو بدون أي نوع من الرياضة حتى المشي ما كنت امشي كنت اتحرك قد ما اقدر في البيت لأني بصراحة ما أحب الرياضة أبدا ولا أتشجع حتى حق المشي خلالها الحمد لله الريداكتيل ما سبب لي أضرار إلا اللهم عصبية في بداية استخدامي له ، و كنت كل يوم انزل حوالي نصف كيلو و أحيانا يمر أسبوع كامل و وزني ثابت ما يتغير ، المهم انه خلال هذا الشهر كنت نشيطة و أحس إن معدتي مرتاحة لان الأكل خفيف و صحي و تصدقون يا بنات إن الأكل كله بدون ملح و أحس براحة كبيرة حتى أني صرت ما أحب الأكل المالح من أني قبل الرجيم كنت أموت في الأكل الحاذج يعني اللي ملحه زيادة كذلك نفسيتي ارتااااااااااااااااااااحت جداً حتى أني صرت أحب اطلع و أروح ألاماكن العامة و الأعراس و الزيارات صرت واثقة من نفسي أكثر ،،، بس الأعراض الجانبية كانت في : زيادة نسبة الأملاح في الدم ( اليورك أسيد ) و تساقط في الشعر بشكل بسيط الحمد لله و لكنه بعد نهاية الرجيم بفترة
المرحلة الثالثة : مايو 2004م
عقب ما خلصت من الرجيم الكيميائي صرت اخفف من أكل و نزلت حوالي 3 كيلو ....
و لو بتجمعون الكيلوات اللي نزلتها خلال جميع تلك المراحل : 4.5+6+3=13.5كيلو تقريبا خلال خمس شهور كنت 85.5كيلو والحين 72 كيلو
و الحين
إذا زدت فإني أزيد كيلو أو اثنين على الأكثر و أحاول أني أنزلهم بسرعة
..و عموماً صرت آكل اقل من قبل لأني تعودت و ثانياً من كثر النتايج المشجعة اللي اوفها صرت أخاف يزيد وزني لأنه ما تتصورون شلون ربعي و كل اللي يشوفني يستغرب و طبعا الكل يمدح لأني الحمد لله صرت أبين أني اصغر من عمري و صرت أحلى هاهاهاهاهاها والله العظيم ما امدح في نفسي بس الناس يشوفوني جذيه وأنا أشوف روحي حلوة يمكن لان نفسيتي صارت ممتازة فأشوف كل شي حلو بهذي الدنيا والله يا أخواتي أتمنى إن كل وحدة تعيش الشعور اللي أنا عشته أنا أحبكم و أحب لكم الخير و أحب كل شي زين يصير لي يكون عندكم مثله بعد
صرت البس ملابس على الموضة و تطلع روووووووعة عليّ هو صحيح أني ما زلت دبدوبة بس على الأقل جسمي التم و صار مرتب بس طبعا مشكلتي مع الزنود باريت يخفون شوي
بس تدرون أني إلى الآن ما وصلت للوزن اللي احلم به أنا ودي يوصل وزني إلى 65 كيلو لذلك أحاول الحين أسوي رجيم ثاني...

نصيحة : كل وحدة تخلي لها دفتر خاص لمراقبة الوزن ، أنا عندي دفتر أسجل فيه بشكل شبه يومي وزني و بهذا الشكل تقدرون تحسبون الزيادة و النقصان هاهاهاهاهاهاهاهاهاهاهاهاهاهاهاها
الحين أفكر أني اشتري الدراجة الثابتة لأني سمعتكم تمدحون فيها و لأني ما أحب الرياضة و كسوووووولة جداً ....على فكرة مثل ما قلت لكم إن الرجيم الكيميائي اللي سويته نزلت عليه 6 كيلو بس بدون رياضة يعني لو أي وحدة بتسويه مع الرياضة يمكن تنزل بشكل أسرع 10كيلو أو أكثر

خواتي اللي في السعودية مرة رحت مكتبة جرير و شريت كتاب يجنن فيه رجيمات متنوعة حتى رجيم أسامة حمدي و رجيم هوليوود موجودين فيه اسم الكتاب : موسوعة الرجيم و الرشاقة تأليف : صلاح سالم بادويلان : الطبعة الثالثة دار النشر : دار طويق للنشر و التوزيع وسعره 35ريال وااااااااايد رخيص و حلو ...

إذا عندكم أي نصائح انتظركم ...
اختكم المحبة لكم جميعاً
أم ناصر