هلا فراولة ..
زين عجبك الكلام :)

لا ياقلبي أنا مو قصدي من رفض المتزوج إنه بيصير مايعرف الرومانسية.. لأن الجفاف طبع لا لصغير ولا لكبير.. بس أنا قصدي ياالغالية البعد عن المشاكل والشيل والحط... أنتِ تجربتك ماينحكم عليها لأن كلها بالعسل.. ملكة ومشاعر حلوة.. لكن بمرور السنوات والعشرة الله لايوريك وش يصير من أشكال العداوة بين الزوجات وحركات التنكيد والشيل والحط والقال والقيل ...

أما مسألة العمر فأنا ماتفرق معي كثير.. والدليل إن فيه رجال كبار حنونين وطيبين.. وشباب أعوذ بالله الفكة منهم راااااحة!
وعشان كذا قلت الأرمل والمطلق وماحددت عمر.. على الأقل للفترة الجاية إذا ربي أراد.. والمكتوب عند الله بنشوفه..

الله يشرح صدرك ويوفقك ويدلك للي فيه الخير ويرضيك فيه .. :)

مرحبا قهوه :)
ماشاء الله تبارك الله الله يحفظك من كل شر ويرزقك كل خير
كلامك درر فعلا والله محتاجين مثل هذا الكلام اللي يرفع معنوياتنا
ويرجع الثقه لنا
والله كلامك عين العقل صحيتينا من غفوة
تسلمين الله يجزاك بالجنه ويوفقك
ويرزقك كل خير
لاتنسينا من ابداعاتك وكلامك اللي يفتح النفس ويروق البال
الله يجزاك خير :26: :26: :26:

صباح الورد يا بنات .. وقبل كل شي ودي اشكر (( قهوتنا )) على كلامها اللي مثل البلسم
بس انا يا بنات من أمس حاسة باكتئاب وودي بس ابكي حاسة بالوحدة وانه مالي احد بهالدنيا
والله اني الوم نفسي لاني طلبت الطلاق اقول ياليتني صبرت على بلاويه
انا يا بنات اهلي ما يسألون عني ابدا والله انهم أمس كلهم رايحين بيت خالتي متعشين هناك والله
ما قالوا لي تعالي معانا .... وهم يدرون اني بالشقة لحالي .. تصدقون انهم من تطلقت ما قالوا
لي انتي محتاجة شي ؟؟ يا ربي ليش يعاملوني ولا كأني بنتهم .. وانا بعد أوضاعي المادية للحين ما استقرت
تصدقون اني مرات ما يكون عندي ولا دينار بس ما افكر اروح اقول لهم عطوني لاني منقهرة منهم.

وعلى فكرة يا بنات انا من عشرة ايام تقريبا رحت لدكتور نفسي ووصف لي حبوب عن الاكتآب
لأن نفسيتي دمار .. وبصراحة ما عجبني وودي المرة الجاية اروح لدكتور ثاني لأن بس قعد يسمعني
وفي النهاية وصف لي الحبوب انا ابي دكتور ينصحني ويرفع من معنوياتي مو بس يوصف لي دواء وخلاص

ادعوا لي يا بنات الله يجزاكم خير
:(

امرأة من الخيال

هلا بك.. شوفي قلبي انا ناسية الحين ردودك اللي قبل وظروف طلاقك فأعذريني بزعجك شوي..
ليه ساكنه بشقه لحالك؟؟ عندك أطفال ولا لا؟؟

شي ثاني ياقلبي بالنسبة للاكتئاب.. ترى الاكتئاب مرض مثله مثل أي مرض عضوي.. وصدقيني مافي امرأة مامرت بفترة اكتئاب بحياتها.. تقلب الهرمونات وضغوط الحياة اليوم خلت الاكتئاب مثل الزكام بين الناس!
أنا قرأت كثير عن الاكتئاب.. وأقولك إنه طبيعي.. والمفروض إنك تدورين علاج جاء في الحديث (تداووا عباد الله فإن الله ماأنزل من داء إلا وجعل له دواء إلا السام) أو بمامعناه..
فالمرض شي عارض للجميع.. لاتقلقين وتحسين نفسك ضعيفة.. وأبي أقولك شي يطمنك أكثر بعد.. ترى الاكتئاب في أحيان كثيرة ينشأ بغير ضغوط أو أسباب.. فلا تخلين طلاقك يحسسك بالضعف أو إنه سبب لمرضك.. الطلاق والمرض والشقا مكتوب عليك قبل تنفخ فيك الروح ببطن أمك.. آمني وأتكلي على ربك.. :)
وترى الطبيب اللي يعتمد على نوع واحد من العلاج غلطان.. المفروض أن العلاج النفسي شقين.. شق دوائي.. وشق سلوكي معرفي (جلسات نفسية).. وعشان كذا أنا رأيي تناقشين طبيبك بهالنقطة وتسألينه ليه مايبدأ معك جلسات؟؟؟ وإذا أنتِ شاكة بكفائته من حقك تدورين الأفضل..
ماأدري أنتِ من وين.. بس يغلب على ظني إنك من الكويت.. ولو إنك بالسعودية كان دليتك على أطباء أظنهم ممتازين بالمجال.. لكن إذا ماتعرفين نزلي موضوع بساعدوني والبنات إن شاءالله ماراح يقصرون معك..
وأنصحك ماتعلمين أهلك عن موضوع العلاج.. لأن للأسف لازالت نظرة مجتمعنا قااااااااااصرة تجاه العلاج النفسي وبدرجة كبيرة.. لذلك خليهم بس يشوفون النتايج اللي إن شاءالله بتكون خطيرة :)
فيه نقطة ثانية وهي أن العلاج الدوائي ترى بيطول معك شوي.. لأن الأدوية النفسية معروف أن نتايجها بطيئة وبخاصة أدوية الاكتئاب.. فلا تتوقعين إنه بيقول أسبوعين مثلاً ووقفي.. لا! أقل شي أتوقع 4 شهور وكل ماطالت المدة كانت النتائج واحتمالات الانتكاس أقل بإذن الله.. بس أذكرك بموضوع الجلسات لاتتهاونين فيها.. ولو لقيتي طبيبة فهو أفضل طبعاً شرعاً ومن ناحية الراحة بعد..

بالنسبة لأهلك.. عيوني ترى طبيعي إذا كنتِ بسكن منفصل عنهم مايحسون بالارتباط فيك.. لاتكونين حساسة بزود.. افرضي نفسك! لاتستحين منهم أو تتحسسين! هذولي أهلك وبالرضا أو الغصب أنت بنتهم وقطعة منهم! وبكرا لاسمح الله لو احتاجوا ودارت الدنيا مالهم إلا عيالهم وبناتهم..
ترى حنا أحياناً نبني طوق حول أنفسنا.. وأحياناً الأهل يبنونه وحنا بسكوتنا وسلبيتنا نساعدهم.. (الكلام مو عنك ترى أتكلم بشكل عام!)
شوفي ياحبيبه.. الحق.. والشرع.. والعرف.. والمجتمع اللي صاجينا بعاداته الصالح منها والطالح يقول إن أهلي لازم يكونون معي بالسراء والضراء.. وإذا هم تجاهلوا هالشي أنا ماراح أتجاهله..
وعمر الظفر مايطلع من اللحم.. ولو طلع سوينا له عملية تجميل ورجعناه خخخخخخ <~نشبة هالبنت

اقتراحي.. طبي عليهم ولاتقطعين زياراتك.. لا يهمك إذا شفتيهم مايعطونك بال أو يتأففون..مثلا أنا مو عايشة بنعيم.. وحالي لايقل سوء عنكم ويمكن في بعض الحالات لما أنقطع عنكم أكون بحالة مايعلمة فيها إلا ربي!! بس مع ذلك خلونا مانستسلم..

إذا ظروفي ماكانت حلوة.. وحالتي المادية ماشية بالدف وأحياناً واقفة بعد!! وأهلي بعد سافهيني وأنا ساكتة لهم.. وش بقى أجل !!
لاااااااا الفلوس كيفها تروح وتجي.. بس الأهل إذا جفوني وعودتهم على كذا وعودوني أتوقع جزء كبير بحياتي بيختل ولو كان عندي أطفال وبيت.. شوفي أختي.. خليك معهم على الخط وعلى طول..
شاركيهم غصب مناسباتهم.. حسسيهم إن لك موقع بينهم وإن هم لهم قيمة بحياتك وإن وجودهم يسعدك (وإن ماكان كذا هالفترة بسبب سوء تصرفهم معك مثلا).. لو سمعتي مثلا كلام مثل.. دايم لازقة..متى تروحين ونرتاح.. خفي عنا.. متى نفتك<~ كلمة أهلي.. قولي ماأقدر استغني عنكم.. وجودكم عسل بحياتي.. الله لايخيلني واضحكي :)

ترى يوم ورا يوم بيتفشلون هم من أنفسهم.. وبتتغير معاملتهم بس الأمر يحتاج صبر ويمكن سنين لين تشوفين نتايج تسرك.. بس أنا برأيي أن الأب والأم يستحقون منا التعب.. والأخوان والخوات إذا ربي سخرهم لنا بعد نعمة!

بمثل زيارتهم لخالتك أنا لو كنت مكانك كان لما عرفت قلت لهم.. يووووه ليت بجمعتكم..ياحبي لكم ولمتكم.. اجتماعكم عندي يسوى الدنيا.. إن شاءالله المرة الجاية أنا معكم.. إلا متى رايحين؟ :)

شوفي الطريق مليان إحباطات.. وأنا وحده من الناس آخذ على يافوخي كثييير.. وأتحطم بعد كثير.. بس لازم يابنات نواصل..
أنا أبي أكسبهم عشاني.. مو عشانهم.. لأن أمي وأبوي مثلا رضاهم برضا ربي.. والاجر لي فيهم.. وأخواني وأخواتي على جفاهم وقسوتهم هم دمي ولحمي.. وربي بيآجرني على وصلهم ولو آذوني.. وهنا أتذكر حديث الرجل اللي جاء النبي صلى الله عليه وسلم واشتكى له قرابة له يصلهم ويقطعونه ويحسن إليهم ويؤذونه فقال له عليه الصلاة والسلام بما معناه أحسن إليهم ولو آذوك وصلهم وإن قطعوك فكأنما سففتهم المل .. يعني كأنك بمعروفك هذا تخليهم يآكلون الرماد لسخافة خلقهم وكرم أصلك..

بنات..
في شي دايم يجي ببالي..
في حركة برا تعجبني ودائما افكر لو إن الظروف هنا والبيوت في يوم ما تسمح بتنفيذها..
عندهم برا جمعيات تضم أفراد لهم نفس المشكلة.. مثلا جمعية امهات أطفال التوحد.. جمعية المطلقات...الخ والهدف منها إن الأفراد اللي مروا بنفس التجربة بالغالب هم الأقدر على جعل من مروا بنفس تجربتهم يتجاوزون الأزمة لأن المجرب غير اللي بس يتكلم من نظريات..
أحسها حركة حلوة.. ولو كان بيدي طبقتها واستفدنا منها ودفعنا بكثير من الأخوات للأفضل..

شي ثاني وأسهل.. القوائم البريدية.. أو المجموعات البريدية الخاصة بمواضيع معينة.. (القروبز) هذي لو كان عندي وقت كافي ومختصين يساعدوني (وفلوس إذا تحتاج فلوس) كان سويت لنا وحده على مستوى منطقة الخليج على الأقل لأن ظروفنا الحياتية تتشابه كثير..
يعني يكون لنا قروب باسم (المنطلقات) أو (انطلقي للحياة) أو ماأشبه تترأسه وحدة أو كم وحدة عندهم وقت كافي وخبرة.. ويصير كل من يشترك يذكر تجربته.. يرد على مشكلة.. يطرح رأي مفيد.. يقدّم دعم لوحدة توها منطلقة مثلا وتبي مساعدة.. حركة حلووووة مره ومنتشرة برا بس عندنا للأسف على نطلق ضيق مرررررره..

طبعا ملفنا هذا من قبيل الدعم النفسي للجميع.. وفيه تجارب كثيرة وآراء غنية ومتنوعة..وأنا والله أستفيد منكم كثير.. ولعل وعسى يتحقق حلمي هذا بيوم ونستفيد ونخدم غيرنا..

تصدقون حتى لما تتزوج المطلقة.. أختها المطلقة اللي مابعد تزوجت بحاجة لنصائحها.. كيف اختارت الزوج.. ايش المشاكل اللي واجهتها.. او تواجهها.. ايش نصائحها لها.. ومن هالكلام ..

وودي أقول لكم على شي.. ترى في نوع من العلاج النفسي اسمه (الحوار الجماعي) أو العلاج بالجلسات الجماعية وهذا برضو حسب مافهمت موجود برا بس هنا لا..
يجتمعون ناس لهم نفس التجربة عند الأخصائي النفسي ويديرون الحوار ومن خلال الحوار عن المشكلة يحس كل فرد بالدعم اللازم.. وأنه مو الوحيد اللي بالعالم يعاني.. وأن مثله وشرواه كثييييير!
هنا في السعودية اتصلت بإحدى العيادات وسألتهم عن هالنوع من العلاج.. قالوا لي إنه معروف ومكتوب بقائمة العلاج عندهم بس مايطبقونه للأسف..
وأنا أعتقد الفائدة من الجلسات الجماعية إن الواحد أحياناً يحس بالحقيقة مثلاً بس يكون أضعف من تطبيقها أو سماعها بصوت عالي.. فلما تجي وحدة مثلا تنصح وحدة ثانية بالصبر ترى الفائدة تعود على الناصحة بدرجة يمكن ماتقل عن الطرف الثاني.. وهالشي أنا شفته بنفسي..

مالكم بالهذرة..<~ وش بعده!
نقطة أخيرة.. بنات أنا ساعات أأب على وش الملف وساعات أغطس على قولة أناناسه.. ساعات أضعف.. وساعات أحس إني أفضل.. وصدقوني.. ملفنا مره رائع.. وأعتقد بإذن الله لو أخلصنا ردودنا ونصحنا فيه بيكون في ميزان حسناتنا بإذن الله..
مايندرى عن الأجل.. يمكن بكرا أنا أموت بس كلماتي تظل تنفع من بعدي.. وتفرّحني بقبري! يمكن جملة وحدة بس من وحدة منكم تغير من حالة حزن وضيق عندي مايعلمها الا الله.. يمكن دعوة منكم بظهر الغيب تصلح أشياء كثيرة وكبيرة مكسورة بنفسي وعجزت وانا احاول اصلحها! :)

اخيرا الفترة الجاية عندي اشغال لراسي واتوقع مااطل عليكم.. بس مااوصيكم بالصبر ..وخلوا شعارنا هو (((صاااامدون)) :)

سلام ياعسولات!

اختي الغالية قهوة .. الله يوفقك ويفرج همك ...



صدقتي يالغالية اختي حاطة هدفها بالحياة هو الزواج لأنها فشلت دراسياً وتحس نفسها ناقصة
من جميع النواحي وتغيرت كثير تعصب على الكبير والصغير بدون ماتفكر بأن الي قدامها امها
او ابوها رحيمة مرة بس لما تعصب تنسى نفسها ومعد تدري وش تقول وترفع صوتها على امي
وابوي وعلينا كلنا ..
تقولين كثر الدق يلين الحديد والله يالغالية تعبت احيانا ودي ابكي من المعاناة الي بالبيت والله
العظيم الاختبارات اروحها وانا مانمت زين من ضيقة الصدر ومن الهواش الي مسويته بالبيت
واحس الاحبال الصوتية عندي تعبت من الكلام من كثر ما انصح فيها واوجهها واعلمها وكم
مرة اقولها اقري تقول القراءة مو كل شيء قلت عيالك شلون تدرسينهم قالت اجيب لهم مدرسين
والله احس بشد برقبتي من الكلام على الرغم من اني ما اصارخ بس تعبت انا مو متعودة اتكلم
كثير بس ابغى اغيرها للاحسن وهي مو راضية تتعاون معي شكلها ماتهتم فيه بس تاكل اربع وعشرين
ساعة اقولها غلط مو زين لصحتك قالت بالعكس عشان اذا تزوجت اقدر اتفاهم معه واقدر اعيش
قدام مصائب الحياة ..

انت عارفة هي حاقدة علينا لأنها لما رجعت من شهر العسل ( امحق شهر عسل كلها اسبوعين) لما رجعت ابوي سوا لها عزيمة كبيرة وعزم العالم كلهم واولهم اهل زوجها وفشلونا اهل زوجها ولا جوا
بس هي جت هي وزوجها ونشروا بين الناس اننا ماعزمناهم ولا اكرمناهم ولما جت عند ابوي طلب من زوجها ان يخليها تنام عندنا واليوم الثاني يجي ياخذها بحجة انه مشتاق لها وابوي كان يبغى يتفاهم معه
لأنه صفقها على وجهها ولعن امي وابوي الله ينتقم منه فقال بيحط له حد تخيلي اليوم الثاني ماجاء ولا دق ولا اعتذر ولما جت الساعة 12 ونص الليل كلم على اختي وتكلم عليها لأنها قالت ما اقدر اطلع بدون علم اهلي هو قال لها بجي اخذك غصب على اهلك وبعد هواش وقلة ادب قل ادبه على اختي وسكر بوجهها ..
لما جاء اليوم الثاني جاء وكان يبي ياخذها عاد ابوي قال له ليش ترفع يدك عليها ومن هالكلام وابوي كان قصده الاصلاح بس هو مايستاهل قل ادبه ووصف اختي انها ماتعرف تشتغل بالبيت وانها تبغى تشتري من السوق وتبغى تطلع وكل الكلام كذب بكذب وبيني وبينك اهلي غلطانين زوجوها بدون مايسألون عنه مزبوط .. ماعلينا لما اهلي عرفوا ان الولد قليل ادب ومايصلي وخريج سجون ومافيه امل ينصلح حاله اضطر ابوي انه يقنع اختي بالطلاق خصوصا ان الولد مايستاهلها لأن اختي كان الكل يتمنى ياخذها بس سبحان الله صارت من نصيب انسان تافه ... وقعدت عندنا 11 شهر ماسأل عنها ولا دق على موبايلها بس دق علينا وقال ابغى الفلوس رجعوها واطلق اشياء كثيرة ترى ماقلتها ...
وبعدين تطلقت بشهر 5/1426
والحين كل ماجات ولا راحت قالت لابوي انت السبب ليش تعزمني ليتك ماسويت هذي العزيمة فتحت عيون الناس علي وحسدوني انت لو تبغى تكرمني سويتها لي ولزوجي باختصار مو تعزم الناس كلهم
انا اقول اختي حست انها تفشلت لأنو بعد العزيمة مارجعت لزوجها وطول الوقت وهي تقول تذكرين يارهوف يوم العزيمة الناس كلهم راحوا وانا قعدت انا غلطانة المفروض اروح .. :(


ياقلبي الله يسخر لك اهلك والله العظيم اختي كلمتها مسموعة وهي الي كانت تأمر وتنهي قبل تتزوج وللحين تحب تسيطر على الكل حتى لو هي غلط ووالله اهلي معطينها الضوء الاخضر عادي واذا احتاجت فلوس نعطيها وعندها جوال والحين تبغى تغيره وبعدين تغير رايها وتقول لا خليه لين اتزوج
عندها الحين 1000 ريال تقريباً تقول بشتري فيهم جوال قلت اشتري فيهم لبس قالت لا مو مهم المهم
الجوال بعدين تغير رايها ماعرفت لها .. اقول لها اول شيء الاهم فالاهم ..
ظروف اهلي المادية الحمدلله سيئة جداً ومع ذلك يحاولون مايحسسونا بهالشيء بس احنا نحس ..:(
ولما تجي العزايم والزواجات ماتبغى تروح واحيانا تبكي الف مرة تقول ما اروح ليش اروح اقولهم
تراني مطلقة تبينهم يناظروني يقولون هذي الي تطلقت وظلت فترة ماتطلع من البيت والاسبوع الماضي
اخيرا راحت ملكة وحدة من جماعتنا وتعالي تشوفين الناس كأنهم شايفين كائن غريب والله يناظرونها
ويتساسرون والله رحمتها وهي تقولي شفتي قلت لا هم قاعدين يضحكون علي انا سامنة واحاول ما احسسها بس والله الغبي يفهم حركاتهم ...

ياقلبي هي مو فاهمة ان الزواج شيء ثانوي تقول لي ليش وقفت علي انا وصار شيء ثانوي ليش الناس تتزوج وتنبسط وانا لا .. بكرة انتوا تتزوجو وانا اظل بالبيت الحاللي بعد امي وابوي الله يحفظهم
وبعدين تحطوني بدار العجزة :(


النت اعطيها اقول حاولي تقرين وشوفي الصور وكذا تقول لي وش هالخرابيط انا بروح انام احس راسي مصدع .. ولما تشوفني جالسة على النت قالت وش عندك انت هنا والله تحتك بلاوي واحنا ماندري وتجلس جنبي تطالعني نظرات غريبة ...


الله يفرج همك ويرزقك الزوج الصالح الي يحطك بعيونه .. الله يسخر لك اهلك يارب


اقولك ياقلبي ماتسمع منا تحب النصايح من الغير ... خلاص بنوديها ان شاء الله لعيادات مدي كير للدكتور عبد الله السبيعي .. لأنها يابنات متغيرة مرة والوضع ماينسكت عليه والحين ماتبغانا نسافر
تقول ما ابغى اروح نفس المدينة الي شهدت زواجي والناس الي فيها واقارب طليقها الاول موجودين
المشكلة سفرنا بداية الشهر الجاي :(





بيني وبينك انا حسيت ان معد فيه امل وقلت لها انا تعبت انت مو راضية تتعاونين معي كل ما احاول انصحها بشيء مثلا باللبس بطريقة التعامل بأي شيء تقول انا سويت كذا مع طليقي بس سبني وشتمني
وتقوم تحكي لي كل الخارطة حقة طليقها وانا بس تذكر لي طليقها تلوع جبدي خلاااااااااص اكرهه هالانسان ..

الله يوفقك ياقلبي ويسخر لك خلقه ويسعدك دوم تعبتك معي ... اهنيك على عقليتك .. ماشاء الله