تزوجت زوج اختي ..وافكر بالطلاق ..

انا اختي اكبر مني بسنتين تقريبا كانت متزوجه واحد طيب وسيم وخلوق
مره وطيب معها ويحبها وتحبه

تزوجوا وهم صغار قبل العشرين .. المهم ان اختي جت تولد عندنا
وولدت الحمدلله وجابت البنوته وهي عندها ولدين قبلها وكملت نفاسها عندنا وبعدين طلعت من نفاسها

وجالها زوجها ياخذها وهي مغيره نفسها وفرحانه ياقلبي عليها جا زوجها وكان مستعجل لان ماعنده اجازه
جالها الخميس العصر وقال بنمشي الحين على طول هم ساكنين بمدينه تبعد عنا 400كيلو تقريبا

تجهزت وجهزت عيالها وسافروا بعد ساعتين تقريبا ندق على اختي نتطمن عليها وجوالها مقفل

دقينا على زوجها وكاان صووته منهاار ويبكي امي سالته وشفيك وهو مره صوته فيه رعب
ويقول ماتوا امي انفجعت وتساله وهو كلامه ملخبط ومو موزون ابدا مافهمنا منه ولا كلمه

سكر التلفون ورجعنا ندق ومافيه فايده ..بعدها بشوي دق ابوي وقاله تعوذ من الشيطان ورد علي وش صار لكم
وهو وقتها هدى شوي وقال ان صار لهم حادث واختي حالتها شوي صعبه والبنت المولوده توفت

والولدين وابوهم بخير الحمدلله بس رضوض وجروح خفيفه ..اختي نقلوها لمنتطقتنا لان الحادث صار قريب
وراح ابوي واخواني ووصلوا المستشفى وشافوها وكانت حالتها صعبه وبعد ساعه تقريبا دق ابوي وقالنا انها توفت
صدمه بصراحه كلنا انصدمنا الظهر وهي معنا ونسولف ونضحك وودعناها العصر وهي تقول اول مااوصل ادق عليكم

انهار البيت كله وانقلب بكا وصياح جا ابوي واخواني ومعهم عيال اختي الاثنين وابوهم الاولاد دخلوا وكان وجيهم مجرحه
وواحد منهم مخيطين راسه 3 غرز والثاني الحمدلله جروح بسيطه سلمنا عليهم وامي كانت منهاره تبكي وتشمهم ..
دقوا على اهل زوجها وعلموهم وعلى طول جو لعندنا كلهم .. ويوم جو زاد الصياح والبكا اهل زوجها مره طيبين ويحبونها

كانوا عادينها مثل بناتهم .. الجمعه دفنوها هي وبنتها على طول زوجها كان منهار تماما واخوي يقول انه كان يهذي بالكلام
من شده صدمته .. المهم ان ابوي الله يهديه كان يفكر بشكل غريب ولاحظنا انه يلمح ويقول كلام بس احنا مطنشين

وعلى بالنا يمزح .. يوم السبت غبنا من مدارسنا عشان العزى وزحمه الناس ونفسياتنا زفت .. يوم الاحد ابوي بالغصب خلانا ندوام
جيت من المدرسه وانا مكتئبه وطول الطريق وانا ابكي .. اول ماوصلت البيت ابوي سحبني بمريولي وقال تعالي ابيك بسالفه

جلست وقالي ان الخاله ام وعيال اختي ماحد بيراعيهم قد خالتهم ومن هالكلام ..انا ماستوعبت شي ..قلت خلاص خلوهم عندنا وانا مااقصر
قال لا يابنتي انتي تروحين مع زوجك وتربين عيال اختك انا انصدمت من زوجي ؟ قال فلان .. وربي كنه كب علي مويه باارده

جتني ضحكه وفي نفس الوقت دموعي نزلت انصدمت وتلخبطت مشاعري .. قلت له على جثتي مااخذ زوج اختي قال بتاخذينه ورجلك فوق راسك :44:
العصر والناس يعزون جاب ابوي ماذون الله يسامحه وحط زوج اختي قدام الامر الواقع .. وقاله تملك على فلانه الحين ..طبعا زوجها رفض
وقال لا اصلا ماني مستعجل عالزواج باربي عيالي واهلي مابيقصرون واذا تبغى تاخذهم عندكم خذهم وانا اجي اشوفهم كل اسبوع بس لاتزوجني اختها

ابوي كان يردد الخاله ام الخاله ام ..اخوي علمنا ان زوجها رافض وبقوه وقاموا الرجال اللي بالعزى كلهم عليه عشان عيالك ومن هالكلام
ابوي زعل وعصب عليه وبدت الانتقادات من الشياب الين اظطر انه يوافق جا اخوي وناداني وجلس يسلم علي واحس انه راحمني وجالس يقول
ان فلان مافيه زيه ومن هالكلام وانا ابكي ماني مستوعبه الي يصير ..
قالي البسي عباتك وتعالي لبستها ورحت وانا مستسلمه وماني مستوعبه وامشي بس مدري لوين !

جا الماذون وابوي وسالني اذا موافقه وانا ابكي وماسكه في يد اخوي واقوله لاتكفون لا انهررت ودخلني اخوي داخل وجلس يهديني وانا احس الدنيا تدور
جت امي وام زوج اختي وهم يبكون ومسكوني وانا انهرت زياده جا ابوي وخاصمني امشي تعالي وقعي بلا دلع ..وانا ماني مصدقه ان هذا ابوي اللي اعرفه

رفضت اروح وتخبيت ورى امي وجا سحبني من شعري وضربني الين جسمي تكسر ولبسني عباتي وقال ان ماقلتي انك موافقه ووقعتي مابيصير لك طيب
رحت وانا جسمي مكسر ووقعت ورجعت واحس دموعي جفت وقتها كنت مصدومه كاني بحلم .. ذاك اليوم جلسوا امي وخالاتي يجهزون ملابسي وكان الحزن

مسيطر عالبيت ابوي حط عشا عشان يعلنون اننا ملكنا وكان الناس كلهم يناظروني بشفقه وبعضهم يطالعون بوجهي بشكل غريب وانا نفسي ادفن نفسي وقتها
اليوم اللي بعده قرووا يسافرون زوج اختي اللي هو صار زوجي وعياله واهله وطبعا انا معهم .. جابت امي شناطي وعطتهم وانا مصدومه وساكته

حتى سلمت امي وانفجرت ابكي وماعد قدرت اوقف على رجولي جو اهله بيمشون وقلت لامه اني بركب بسيارتهم ماابغى اركب معه قالت اصلا سيارته
اندمرت من الحادث فبتسافرون معنا بنفس السياره ارتحت وقتها .. واخذت عيال اختي ومشينا طول الطريق وانا ابكي واحاول ان صوتي مايطلع

هو كان يسوق وابوه جنبه وانا وعياله وامه واخواته ثنتين ورى ..حسيت ان الوضع غريب ..وصلنا واول يوم كان اصعب يوم ماقدرت افك عباتي
والله اني نومت عياله وانا متغشيه .. وهو مستحي مادخل البيت بس حط شناطنا بالصاله ونام بالمجلس ..

مر اسبوع تقريبا وانا مااعرف اسوي شي لاطبخ ولاقهوه ولا شاي ولااعرف اهتم بعياله كان هو يروشهم وينظفهم ويوكلهم وانا بس منظر بالبيت
ما لامي داعي .. جا مره وسالني وكانت اول مره يتكلم معي .. سالني اذا ملفي جبته معي او لا وقلت لا ..سافر اليوم الثاني لعند اهلي وجابه لي

وامي فديتها حطتلي مريولي وكتبي واغراضي وجابهم ومعه .. وسجلت وكملت دراستي .. والعيال الصبح يروحون عند اهله احنا ساكنين فوقهم ..
ماصار شي بيني وبينه ابدا اصلا حتى يستحي يطالع بوجهي وانا استحي منه اذا دخل فصار مايدخل ودايم يجلس بمجلس الرجال
سالتني مره امي اذا صار بيننا شي وقلتلها لا وياليتني ماقلت لها .. علمت ابوي وجا ابوي .. وصل الظهر ودق علي وفتحت الباب وفرحت لما شفته

جيت ابسلم عليه الا ويصفقني كف على وجهي ومسكني بشعري عيال اختي خافوا وقلت للكبير خذ اخوك وادخل واخذه ودخلوا ..
وانا جلس ابوي يهزاني وانا مدري وش السالفه .. جا زوجي والباب مفتوح ودخل الا بصراخي وتفاجا ومسك ابوي وقاله تعوذ من الشيطان وش فيك ؟

قاله ابوي بكل جراه الكلام الي قالته امي وهو انه مادخل علي .. انا ودي الارض تنشق وتبلعني وقتها انحرجت من ابوي الله يسامحه
قام قاله ..ماحد له دخل هي زوجتي الحين وكيفنا هاذي خصوصيات مالكم اي دخل فيها .. اذا جيت واشتكيت لك ذيك الساعه تعال تصرف .. والضرب مو حل
وانت الله يهديك جيت سيده تضرب ابوي جلس يبرر لكن سكته بالكلام وانا بكيت وسلمت على ابوي وسلم علي وجلس يومين عندي وسافر بعدها .. وانا احس غصه بقلبي وحاسه بعتب ونوع من الكره اتجاه ابوي
بس استغفر الله واتعوذ من الشيطان

المهم ان لي تقريبا 4شهور متزوجه بس الحال زي ماهو كلن ينام بالحاله وماتعودنا على بعض ابدا عجزنا نتاقلم .. الوضع صعب صععععععب
اذا حاول يتقرب لي ماعطيه مجال ابدا وانا اذا حسيت بشي اتجاهه احس بذنب واقضي الاسبوع كله مناحه وبكى
قبل اسبوع تقريبا كان فيه ملكه ورحت مع اهل زوجي ولما الناس يسلمون عليهم يسالونهم من انا
وامه تقولهم اني كذا وكذا قامت وحده وشهقت وتطالع فيني تقول كيف لك قلب تتزوجين زوج اختك ؟ .. :(

والله حبست دموعي بالغصب وكان مبين على ان خانقتني العبره وجالسه اكتم واكتم وام زوجي انتبهت لي ونادتني
رحنا الحمام الله يكرمكم وانفجرت ابكي على طول ..
نظره الناس لي واستغرابهم من قصتي وكلامهم القاسي خلاني افكر بالطلاق وفي نفس الوقت خايفه لسى عمري 18 وحتى هو مو كبير عمره 24 ..
وامي لما قلت لها خاصمتني وقالت ابوك لو يدري بيدفنك حيه فاسكتي احسنلك الولد طيب وينشرى بالذهب وبكره تتعودين
الحين بعد الاختبارات افكر اروح عند اهلي واكلم ابوي بالموضوع .. ومتردده خاايفه منه لان تقريبا عارفه رده فعله
مشكلتي اني افكر بنظره الناس لي ..يعني وانا على ذمته افكر في نظرتهم لي واذا تطلقت افكر كيف الناس بيعاملوني خصوصا ان المطلقه مظلومه في مجتمعي
تعبت وانا افكر وماوصلت لنتيجه
وذابحني الاحساس بالذنب رغم ان الموضوع كله صار خارج ارادتي
نفسيتي زفت :icon33: