تعاسة ومعناة السمنه الى متى ..؟!

السلام عليكم بنات
ما ابي اطول عليكم
انا يا حبوباتي اعاني مثل ما نتو تعانون
سمنه ورجيمات
وسالفتي مع الرجيمات والسمنه من زمان يمديني أألف فيها كتاب :(
الكثير يرسل لي على الخاص لما يشوف شريط الميزان وكمية الكيلوات المفقوده
انا حاليا عمري 23 ((اخلصي من سأل عن عمرك )) :42:
بهذا العمر البنات لبس وكشخه وحركات
وانا ضيعت عمري سمينه ودبه وفيل واللبس مبهدل لان المقاس مو متوفر واذا توفر كله مو على مزاجك بل على مزاج سمنتك
قبل 6 سنوات جتني اراده ونزلت وزني من 100 الى 86
كان عمري 17 والنزول سهل لاني عمري صغير
عملت الكيمائي كررت الاسبوع الاول مرتين ونزلت 6 كيلو
وبعدين ثلاث ايام روب وخيار ونزلت 2 وشويه تخفيف وشوية تخبيص ورجعت عملت الاسبوع الاول الاول من الكيميائي ونزلت 2 صارو 10 في شهرين
وهكذا ونزلت معاهم 4 ما ادري شلون
بعدما تركت الرجيم كان مره يزيد كيلو ومره ينقص كيلو وظل في هالحدود لاني خلاص تركت المقلي والشكولا والخرابيط وحافظت على هالوزن 4 سنوات بدون ما يزيد لاني حتى لو اكلت حلو وهالاشياء كان بحدود المعقول

بعدها بحكم دراستي سكنت مع طالبات يعني بسكن طالبات مو مع الاهل والبنات كلهم من النوع الي ياكلون الاخضر واليابس ولا يسمنون
وطلبيات ومطاعم وخرابيط .. في البدايه ما كنت اكل مثلهم انا عادتي ما افطر واغلب الاوقات ما اتغدا واذا تغديت خفيف بس اتعشى كويس ووزني ووصل 85
بس شوي شوي تعلمت العادات السيئه من جديد غدا كنتاكي ومعاه شيز كيك
وعشا من برا مالذ وطاب
وكل يوم بعد العشا لازم سعد الدين
وفي الليل سهر وشيبس

وما كنت حاسه لنفسي قالولي الاهل سمنتي توقعت كيلو او اثنين
كنت اعمل رجيم يوم وافكه يوم ثاني وبعدين قلت يالله مو ضروري رجيم جسمي عادي (( مصدقه نفسي )):hahaha:

لما طلعت على الميزان كانت صدمه
وزني بين 92 و 93
قلت لنفسي لو ما لحقتي نفسك راح ترجعي الي نقصتيهم وانتي مو ناقصه

من هنا بدأ مشواري
ابي حل
وما قادره التزم برجيم
ومو مقتنعه اني اترك الاكل الي احبه :(

فقررت انه في البدايه ما كان رجيم بس محاوله لترك الاشياء الي تسمن عشان ما يرتفع الوزن اكثر

لما اطلب من المطعم ما اخذ وجبه عشان ما يجي معاها بطاطس مقلي ولابيبسي ..
اطلب اي سندويش مع بيبسي دايت

من العادات الي تعلمتها من البنات لازم مع اي فيلم او سهره كيس شيبس كبير مع بيبسي
تركت الشيبس نهاااااااااااااااائي والبيبسي انا من قبل ماكنت اشربه الا دايت وخففت شربه
اذا شاهدت اتسلى بعصير او فواكه او سلطه او شغله ما تسمن
بين فتره وفتره اخذ من 4 الى 8 قطع بسكويت مالح اذا حبيت مع علبة دايت

انا احب لسنيكرز بس ما اخذ منه الا قليل
بس تركته نهائي وصرت اذا حبيت اكل حلو ابدله بتمر .. او تمر احشيه بشويه مكسرات
كنت قبل ما اطيق التمر بس سبحان الله لما انحرمت من الشكولا صار بالنسبه ليي يجنن

انا اموت على الحليب مع النسكافيه والكابوتشينو والشاي والقهوه التركيه والكوفي ميت يعني اطلبو مني اترك اي شي الا هدول .. حاولت اتركهم ما قدرت
فقررت عدم تركهم بل ترك السكر الي فيهم
وحاولت اشربهم بدون سكر في البدايه صعب بس الحمد لله هالمرحله تخطيناها
مره اشربهم بدون سكر ومره بسكر رجيم خفيف ولما خلص سكر الرجيم قلت خلاص ماراح اشتري غيره ولازم اتعود بدون سكر عشان يصير نظام حياة

طبعاً لحد هنا ماني مقتنعه اني اعمل رجيم
بس لما لفيت السوق ومالقيت لي لبس للعيد
قلت يابنت على الاقل عشره كيلو بس (( عشان تلقي ملابس تدخل فيك )) لان حتى الملابس الي عندي صارت بالموت تدخل فيني :eek:

خفت يزيد الوزن اكثر برمضان
فحاولت اترك الدهون
البطاطس الجاهز بدل القلي صرت احطه في الفرن يتحمر وطعمه مثل المقلي
الكفته والكبه وها الاشياء أحطها في الفرن تتحمر
بدل التانج والفيمتو على الفطور اشرب عصير بدون سكر
وعلى هالحال ظليت
بعد شهر ونص قلت لنفسي
هذي اخر فرصه في عمرك وهذا اخر رجيم اعمله في حياتي
قررت اني اذا ما انزل وزني المره هذي ابقى على هذا الشكل طول حياتي
ومسكت دفتر وقلم وحطيتهم جنب سريري
وكنت كل يوم اسجل في الدفتر اهدافي وشنو اكلت وايش سويت
بدأت بالكيمائي ونزلت كيلو في اول اسبوع وتشجعت وبعدين ظليت مره تخفيف ومره انظمه اخذها من هذا المنتدى :)
مره اشتهيت ورق عنب فقلت لنفسي ويعني حتى لو عامله رجيم مو معناتها احرم نفسي
فاخذت فنجان رز وكثرت عليه الخضار جزر وبقدونس وبصل ولفيت لي كم حبه وطبختهم بدون زيت صار ولا احلى ( كل هذا عشان ما اطلع من حدود الرجيم )
وامشي كل يوم ثلث ساعه
بس وزني صعب النزول كان ينزل كل اسبوعين كيلو مع المشي
نزلت في ثلاث شهور تخفيف 8 كيلو
بعدها تركت الكربوهيدرات وصرت كل ما اشوف رجيم في المنتدى اسويه
والسلطه هذي كانت سر نزولي
مستحيل اجلس على الوجبه بدونها
بعد نزول 12 كيلو بدأ الجسم يترهل
اشتركت في الجيم 3 شهور ومن وقتها وانا ما اترك الرياضه والمشي
وكلما تعبت وفكرت اترك الرجيم لما اشوف نزولي بطيئ اقول لنفسي الي اجسامهم حلوه بأيش احسن مني
اقدر اصير مثلهم حتى لو بعد عشر سنين ومشوار الألف ميل يبدأ بخطوه
ومشواري مهما طال لازم ليه نهايه
حالياً بعد مرور سنه وسته شهور على الصراع مع السمنه
خسرت32 كيلو رجعت منهم كيلوين
فاصبح وزني 62 لازلت محتاجه انزل 4 او 5 ومو قادره لان ارداتي نفذت
لكن والله يابنات اعض اصابعي ندم لان تركت نفسي سمينه طول السنوات الي فاتت عشان شويه اكل
اذا شفت صوري قبل اقول حرام ليش ما تخلصت من السمنه من زمان احس اني ضيعت عمري عشان اكل
لما الناس تشوفني ما تصدق والبعض ما يعرفني وينصدم
والكل يقول حلويتي ويسأل شسويت
وناس لما يعرفو اني كنت دبه ما يصدقو يقولو ما شاء الله مو باين على جسمك
شافتني وحده في الجيم من شهر تقولي انتي ليش جايه جسمك حلو على طولك

فعلا السمنه تعاسه وسجن بعدما ماكنت استحي احد يشوفني واتفشل من شكلي
صرت احس بثقه اذا رحت مكان واحس براحه اذا رحت اتسوق وودي اشتري كل الي في السوق
واقول لنفسي ببساطه كل هذا لاني تركت الاكل الدسم الامر سهل بس يبغاله اراده

هذا الموضوع بيكون لكل شخص مو قادر يواصل رجيمه ولكل شخص تخلص من كم كيلو ومو قادر يحافظ عليهم
وانا منهم
لازم نضع حد ينهي معناتنا وانا اتعهد من اليوم بأن التزم التزام تام
بنات هذا الموضوع بيكون نهاية مشواري وبسجل فيه الاشياء الي اعملها
وابي الي حاب ينهي مشوار التعاسه والسمنه يسجل معاي :)