و منها طبعا لما واحدة بتولد يا ترى ايه العادات و الطقوس المتبعة معاها
هاحكيلكم عن مصر و اتمنى تشاركونى و تحكولى عن البلاد اللى انتم منها
اولا: بالنسبة للاكل و الشرب
من اهم المشروبات اللى لازم تشربها النفساء هى ( الحلبة)... يعنى كل ما واحدة تولد يعملولها ترمس حلبة تقعد تشرب منه ليل و نهار و كل ما يخلص يعملوا تانى
لان الحلبة بتنظف البطن و تسرع من انهاء دم النفاس
تانى اهم مشروب هو ( المغات)... دة تقريبا مش موجود ف السعودية... و المغات دة حلبة برضوا بس متحمصة و مطحونة.. بتتحمر ف سمن بلدى و تتشرب دافية
دة بقى مشروب سحرى لانه رهيب ف تغذية النفساء اللى طبعا بتبقى حاسة بضعف شديد... و كمان رهيب ف ادرار اللبن لتغذية المولود
المغات من اساسيات الحياة بالنسبة للى تولد... و كمان بيتقدم للى جاية تزور الوالدة تباركلها
يعنى مثلا لو واحدة قابلت واحدة حامل تقولها (عقبال ما اشرب مغاتك)... يعنى (عقبال ما اجى اباركلك بعد ما تولدى)...
ههههههههه
طيب فى ايه كمان؟؟؟
اه طبعا اهم شيء بالنسبة للاكل ... الفراخ البلدى( الدجاج)... و دة للاسف مشفتوش ف السعودية برضوا... كل اللى متوفر هنا الفراخ البيضاء التى لا تسمن من جوع و لا تروى من عطش...
الفراخ البلدى دى اللى ريشها بيبقى ملون و دى طبعا فايدتها و قيمتها الغذائية رهيبة ... بينما البيضاء اضرارها ألفوا فيها كتب
عندنا ف مصر بقى يقولوا... العيل ينزل تحطى مكانه فرخة... هههههههههه...
طبعا مش فرخة واحدة لان النفساء بتفطر و تتغدى و تتعشى فراخ... يعنى بتحصل مجزرة ف الفراخ المسكينة.... هههههههههه
بالنسبة للاحتفال:
بنحتفل يالمولود ف اليوم السابع و بنعمل حفلة سبوع...(و دة طبعا غير العقيقة اللى بتتأخر شوية)... يتجمع كل اهل الزوج و الزوجة و الجيران و خاصة الاطفال...
و طبعا اغنية عبد المنعم مدبولى لابد منها( حلقاتك برجالاتك)... بس طبعا معدش فى دق الهون و لا المنخل... ههههههه
و بنوزع على كل الموجودين السبوع ياخدوه معاهم و هم ماشيين...
السبوع عبارة عن تحفة او انتيكة صغيرة على اى شكل و يتلف معاها ف ورق سوليفان شيكولاته و ملبس و مكسرات و كارت او شريط عليه اسم المولود و تاريخ ميلاده.... عشان الكل يبقى عارف دايما تارييخه... و تبقى ذكرى حلوة...
اه تعبت من الكلام
كفاية بقى ... و مستنية مشاركتكم نعرف كل بلد بتحتفل ازاى بالنفساء و المولود... او كى؟؟؟