تكفون مخنوقه والكل خلاني لكن ربي ما يخليني

السلام عليكم ورحمة الله وبركاته

خواتي عضوات حواء ضاقت فيني انفاسي وخنقتي العبرات ولا لجأت الا الي الله هو نعم المعين ثم اليكن اخواتي علي اسمع منكن كلمه تريحني وتهدي علي حرقة قلبي او من تشد على يدي وتوجهني ان كنت اخطأت

واعذروني فانا قليلة معرفه بالكمبيوتر واكتب لكم من معرف بنت خالتي عيون غاليها جزاها الله عني كل خير

يا خواتي حصلت لي مشكله وابيكم تكونون الحكم فيها هل ظلمت وانا ظالمه

انا من طبعي ازور امي يوميا وصل وبر لها لان حريم اخواني ما يشوفونها رغم انهم معاها فالبيت وهي على الله ثم على الخادمه

امس كنت عندها ودخل علينا اخوي وزوجته جايين من برا وانا من باب المزح قلت لحرمته واخوي يسمع ليش ما تسلمين ما شفتيني من امس وانا عمة ولدج والله والله كنت اكلمها من باب المزح اخوي ضحك وطلع ولقيتها انفجرت فيني لو سمحتي لاتكلميني بالهطريقه انتي شنو قصدك تسمعين اخوك اني ما اسلم انا طبعي جذي ما احب اسلم كل يوم قلت لها لا التفكير والظن السيء انا كنت امزح معك والحين كيفك مانبي سلامك قالت انتي مو اول مره تلمحين بالكلام وانتي تقولين وتقولين وتحرضين اخوكي علي انا انصدمت من كلامها واقسمت بالله اني عمري ما كلمت اخوي عنك وعمري ما تكلمت فيك لان الحقيقه ما فيه شي اقوله انتي لك قريب السنه معنا ما نشوفك الا كم مره على طول فوق او عند اهلك قالت لا قلتي واللي قالت لي حرمه من البيت هني حلفتها تقول اسمها ورفضت وقالت هي تشرب وتاكل معك يوميا وهي اللي تنقل كلامك لي قلت لها ان كنتي بنت رجال قولي اسمها عشان لا تظلمين احد البيت فيه اربع حريم اخواني غيرك مقدر اظلم احد رفضت عصبت وقلت لاتحطين راسك مثل النعامه تقولين الكلام وتسكتين علميني رفضت سلمت على امي ورحت لبيتي للعلم مرة اخوي هذي اصغر مني ب 17 سنه بس جدا جريئه
دقيت على خواتي لانها قالت مو بس انتي تكلمين فيني وفلانه وفلانه خواتي وكلمتهم وقلت لهم الكلام اللي قالته قالو بكره احنا راح نروح بيت اهلي وبجمعت حريم اخواني وجمعتها افتحي الموضوع وقولي لها الكل موجود قولي منو اللي تبلى علينا بالكلام منو اللي تاكل من صحنا وتطعنا في ظهرنا عشان الواحد يعرف منو عدوه من رفيقه , سويت مثل ماقالو اليوم الثاني وماادري هل غلطت ولا انا على حق
وكلمتها قدام الكل وقلت احنا كلنا خوات والحين قولي لي منو اللي قالت الكلام اللي قلتي امس
قالت لي العصفوره قلت انا مو طفله عندك كلميني مثل ما اكلمك قالت انا اكذب ارتحتي
وكانت امي مو فيه ولمن جت اخذت امي للغرفه وقالت لها اني تعمدت افشلها قدام باقي حريم اخواني وامي زعلت وقالت لي انا ما قلت لك من امس قفلي على الموضوع عشاني
وصعدت مرت اخوي فوق ومي راحت وراها تراضيها وصعدت بعدهم بشوي وياليتني ما صعدت ودخلت وامي موجوده قلت يا فلانه انا موحاقده عليكي انتي ما صار لك سنه في بيتنا وما ابي تكون في نفسك شي علينا يا حمواتك وترى ما فيها شي لا قلتي فلانه اللي قالت هالكلام عشان مره ثانيه تفكر الف مره قبل لا تكذب وتبلى غيرها زعلت امي وقالت انزلي تحت ولا تكلمينها واذا لي احترام وقدر عندك انزلي قلت يمه قدرك فوق راسي بس انا مو صغيره عشان يجرون حريم اخواني لساني في كلام ما قلته وكلهم اصغر مني زعلت امي وقالت كلمه ذبحتني قالت الله يغضب عليكي ان مانزلتي بس من كثر زعلي وضيقي ما نزلت ودخلت علينا اختى الكبيره وانا اكلمها وقالت انزلي لا تهتمين بكلامها خليها تصدق اللي تبي وانا اكلم اختى واقول لحظه بفهمها حنا عمات ولدها عيب طريقة تفكيرها فينا شوي ولا قامت تصرخ وتقول لي اطلعي برا ياخر...... والله الكلمه ما تنقال
والمصيبه تقولها وتصرخ باعلى صوتهاصرخه ورا الثانيه والرياجيل كلهم ادخلو البييت ويركضون مو عارفين شنو صار
وكان واحد من اخواني بالحمام وطلع ما عليه الا الروب ومعصب ويقول لي فلانه شنو صاير وسمعها وهي تقول لي الكلمه الوسخه وكلام ثاني فناداها باسمها يعني قصري صوتج وعيب فردت عليه شنو يبي الخر..... الثاني
اخوي سمعها كسر الباب ودخل عليها وامي وخواتي واخواني يمسكونه ما كو فايده يبي يطقها بس الله ستر و ما مد يده امسكوه واختى تسكر فم مرت اخوي بيدها عضت يد اختي وقامت تسب فيني وفي اخوي
وامي اغمى عليها وكانت بتروح فيها واخواني صكو عليها الباب وصارو يلوموني ويحملوني المسؤوليه ويقولون انتي العاقل كان ما رحتي لها بدارها كان حشمتي امك واخوك
واخوي الصغير زوجها عرف انها غلطت على اخوي ودخل عليها وطقها طقه ودخل عليه اخوي الكبير واختي وطلعوه منها

والحين لا امي ولا اخوي يكلموني

والكل محملني المسؤوليه مو واقف معي الا وحده من خواتي مع العلم اني كنت اقول بنسى الموضوع امس وهم اصرو اني اواجها والحين يوقلون سويتي مشاكل بين الاخوان وبين الرجال وحرمته وامي رافضه تكلمني حتى طلعت من بيت ابوي ورحت بيتي ما في احد قالي لا تروحين ولا سأل عني الا اختي

وانا والله كنت لاخواني نعم المعين ووقفت معهم في كل شي ودايم اسأل عنهم وعمري ما حرضتهم على حريمهم وانا اشوف شلون يعاملون امي

تكفون قولو لى انا غلطانه ولا مغلوط علي شنو قلت انا مو من حقي ابري نفسي مو من حقي اعرف منهي اللي تكلم في قفاي وتضحك وتقهوى معي , هل غلطت لاني طلعت لغرفتها فوق

اخوي حتى اتصالي مايرد علي , وامي تقولي لا تفتحين الموضوع معي الحين وان تكلمتي طلعت من الغرفه اللي انتي فيها مع انها سمعت امس شنو قالت لي

حسبي الله هم نعم الوكيل

تكفون شرايكم في موقفي