المطاعم
* تقريباً المطاعم متشابهة بأغلب الدول الخليجية (مثل : تشيلز , فرايديز , أبل بيز, ...إلخ)
لذلك ما راح أذكر هالمطاعم لأنها موجودة بكل مكان تقريباً و بأغلب المجمعات .
راح أذكر إن شاء الله المطاعم المميزة فقط .
* ميس الغانم
المكان: السالمية
من أشهر و أحلى المطاعم في الكويت . وهو مطعم متخصص في المأكولات اللبنانية.
أكله لذييييذ جداً , خاصة المقبلات .
و هو دايم زحمة , خاصة بالويك إند .. و على فكرة ما عندهم حجز , لازم تحضرين شخصياً ,
و تحطين اسمك عند الريسبشن و تنتظرين لين يجي دورك .
* برج الحمام
المكان: السالمية
عبارة عن قسمين , قسم للمأكولات البحرية , و قسم مأكولات لبنانية .
و أكله لذيذ بس طبعاً مو ألذ من ميس الغانم . ميزته إنه يطل على البحر , و قعداته حلوه وراقية . يستحق التجرية.
* S.S دانة
المكان: على شارع الخليج العربي .. على البحر
(متخصص بالمأكولات البحرية)
* النوخذة
المكان: هو تبع كراون بلازا و له فرع في منطقة أبو حليفة.
( متخصص بالأكلات البحرية)
* فريج صويلح
المكان: السالمية
متخصص بالأكلات الكويتية . له جو مميز , ديكوراته كلها من التراث الكويتي .
و خلصنااااااا المطاعم .. :23:
الأماكن الترفيهية
* حولي بارك
المكان: حولي
مدينة ترفيهية , حليوة , فيها صالة للألعاب الاكترونية غير الألعاب اللي في الحديقة ,
فيها مطاعم و فيها مكتبة جرير و بعض محلات السفونيرز.
* حديقة الشعب
منتزه كبير جداً , فيه الألعاب الخارجية اللي بالحديقة , و فيه صالات للألعاب الاكترونية و ألعاب الأطفال ,
و صالة تزلج ايس-سكيتينج و رول-سكيتينج . فيه صالة مطاعم و كافيهات , و محلات سفونيرز.
* المدينة الترفيهية
المكان: الدوحة
تعتبر أكبر مدينة ترفيهية في الشرق الأوسط مقسمة لأقسام , كل قسم له اسم ,
فيها جميع الألعاب اللي تخطر ببالك , مطاعم , محلات تصوير ..إلخ .
عيبها إنها بعيده جداً , يعني يبيلها مشوار لحالها . و أيضاً من عيوبها كبيرة جداً ,
يعني راح تمشون كثير إذا رحتوا له بإذن الله.
يتبـــع ـــ
تابع الأماكن الترفيهية :
* المركز العلمي
المكان: السالمية
مكان ممتع جداً للصغار و الكبار. فيه سينما آي ماكس ثلاثية الأبعاد , لازم تروحون لها .
فيه أكواريوم الحياة البحرية روعه , و فيه قاعة الاستكشافات للصغار , و فيه مطاعم و قعدات على البحر .
نصيحة: إذا بتحضرون فيلم إن شاء الله في المركز العلمي , أفضل تختارون فيلم كارتون (رسوم متحركة) ,
لأن مجال الإبداع فيها أكثر بسينما الآي ماكس متأكدة بإذن الله راح يستانسون عليها الصغار و الكبار أكثر بعد :) .
* أبراج الكويت
المكان: شارع الخليج العربي
تعتبر أهم معلم في دولة الكويت . هي عبارة عن ثلاثة أبراج , البرج الصغير يتحكم بالكهرباء ,
و البرج الوسط خزان للماء , البرج الكبير فيه مطاعم و كافيهات , وكرة كاشفة تطل على الكويت .
و فيه قسم خاص يقدم بوفيه إفطار هو خاص للنساء , يعني حق قعدات شاي الضحى . :S_45:
و خلصنا الأماكن الترفيهية ..
و بس .. هذي احلى الأماكن اللي في بالي في ديرتي الكويت .. :)
الصفحة الأخيرة
مجمعات الماركات
* مجمع الصالحية
المكان: منطقة الصالحية .
مجمع راقي جداً , يتضمن بوتيكات أرقى الماركات العالمية مثل ( Chopard, L.V, Gucci, .. إلخ)
* مجمع الراية
المكان : شرق
هو تقريباً نفس مجمع الصالحية , كله ماركات . بس هو أحدث منه ,
و هو تابع لفندق من أرقى الفنادق و هو فندق الكورت يارد .
*
*
*
الأسواق الشعبية
* سوق المباركية
المكان: قبلة ( أو جبلة بالكويتي)
من أهم و أجمل الأسواق الشعبية في الكويت .
هو عبارة عن سوق يضم عدة أسواق , و هذي الأسواق محتفظة بأساميها القديمة
( مثل: سوق الذهب , سوق اللحم , سوق الخضار, سوق السمك , سوق السلاح , سوق الحريم .. إلخ)
نصيحة : لا تنسين تمرين على محلات الحلويات و تذوقين الحلويات الكويتية مثل القرص العقيلي و الدرابيل ..
اممممممم لذييذة مع الحليب الصبح على الريوق (الفطور).
و أخيراً .. خلصنا الأسواق ..
" طبعاً هذي مش كل الأسواق و المجمعات , بس الأهم من وجهة نظري :) "