kokar_2001 :

مساء الخير يا بنات يا رب تكونو بخير كلوكو نييفو انتى نصابة على فكرة عشان انا فتحت الماسنجر يوم الاربع و انتى مكنتيش موجودة و المفروض قبل ما تخرجى من باب البيت تستأذنى اصلا الدنيا اصلها مش سبهللة رمال الحلوة ربنا يطمنا عليكى يا بنوتة و قوليلنا ابتدى معاكى الوحم ولا لسة؟ ربنا يعدى شهور حملك على خير يا رب و من عويناتى ححكيلكم على تجربتى مع العمرة طبعا انتو عارفيين انى قعدت استنى الفيزا على اعصاب متوترة و كانت نفسيتى ذى الزفت و يمكن كمان اكتر من الزفت و اديتها عياط لانى حسيت ان ربنا مش بيحبنى و مش عاوزنى اروحله و قلت هو اكيد غضبان عليا و كانت فعلا نفسيتى ذى الزفت و الحمد لله بعد ما قربت ايأس انها تيجى اتصل عليها زوجى و بلغنى ان الفيزا جت و حنسافر بعد بكرة طبعا قعدت احضر و يوم السفر نفسه معرفتش انام غير 3 ساعات بالعافية دى اول مرة فى حياتى اسافر عمرة او اروح السعودية خالص و انا سافرت برى اخدت الرحلة من ساعة ما ركبت الباص الى الميقات 21 ساعة مكانتش صعبة انا كنت متخيلة انى حنزل حولة منها بس الحمد لله ربنا قدرنى بس طول السكة طبعا مافيش نوم و قبلها برضو مافيش نوم بس استعمتعت فى الرحلة لانى كنت بتفرج على بلد بلد فى الطريق من الكويت لمكة و البلاد اللى مريت عليها مش مدن ممكن نقول عليها قرى يعنى ذى المراكز فى المحافظات فى مصر فطرنا فى السكة و كان كل ميعاد صلاة بنقف نصلى فى مسجد من المساجد اللى فى الطريق و نرتاح شوية و كانت الطرق وسط الجبال و منحنيات و مطالع و منازل و الحمد لله عدت المهم وصلت الميقات و الميقات يا بنات لازم نروحه عشان ندخل البيوت من ابوابها فالرسول عليه الصلاة و السلام حدد مواقييت معينة لكل البلاد بحيث اللى جاى من بلده حيمر عليها كدة كدة فيدخل البيت من بابه وصلت الميقات و دخلت اخد دش "اغتسل" و لبست لبس للعمرة و صليت ركعتين فى المسجد و روحت ركبت الباص و جه زوجى بلبس الاحرام و كنت مبوسطة جدا انى اخيرا شفت المنظر دا (انا و هو محرميين) و ركبنا الباص و قلت نية الاحرام "اللهم لبيك عمرة فيسرها لى و تقبلها منى" و من اللحظة دى بقيت محرمة و ابتدى الباص يتحرك و ابتدى المعتمريين من الجال فى التهليل "لبيك اللهم لبيك ، لبيك لا شريك لك لبيك ، ان الحمد و النعمة لك و المك ، لا شريك لك" من اللحظة دى يا بنات و ابتديت فى العياط حسيت الكلام اصلا طالع من قلبى و ابتديت البى انا كمان بس بصوت واطى و كان الطريق من الميقات لمكة عبارة عن طريق وسط الجبال و فيه بعض الاشجار اللى طالعة فى حضن الجبل فسبحان الله المنظر ملانى بحب ربنا اكتر و اكتر و احساسى انى جايله تايبة و طلبة عفوه و مغفرته خلى عيونى عاملة ذى الحنفية وصلنا الاوتيل حطينا الشنط و اتحركنا للحرم سيرا على الاقدام و فى الطريق برضو ابتديت بالتلبية انا و زوجى و انا برضو بعيط و ابتديت اقرب للحرم و شفت الحرم من برا و انا داخلة أذن صلاة الظهر مش عارفة اقولكم حسيت فى قلبى ايه بجد احساس مينفعش يتوصف خالص المهم دخلت و صليت الظهر و برضو عياط عياط عياط و دعاء دعاء دعاء و نزلت و قابلت زوجى و اتجهنا للكعبة و انا فى طريقى للكعبة حسيت انى دالخة على ربنا نفسه و ذى ما يكون رجلى مش شيلانى و انى طايرة بقوة تانية غيرى خالص و فضلت كدة لحد ما وقفت قدام الكعبة و برضو الحنفية بسم الله ما شاء الله عليها على أخرها و ابتديت فى الطواف و العياط و الاستغفار و التوبة و العياط العياط العياط لدرجة انى حسيت ان قلبى حيقف و انا بطوف لقيت ست كبيرة تقريبا تركية حطت ايدها على ظهرى عشان تسند عليا روحت اخدت ايدها تحت باطى و طوفت معاها و كان زوجى مساكلنا الشمسية و كنت مقسمة كل طواف لنوع من الدعاء الاول كان توبة و استغفار و طلب دخول الجنة و الهداية و التانى ليا انا و زوجى و لحياتنا و التالت لامى و ابويا و اخويا و الرابع لصحابى و مكفاش فاخدو الخامس كمان و السادس لمصر و السابع لامة الاسلام كلها و انا فى بداية الطواف الخامس بقيت مش عارفة اخد نفسى من كتر العياط و المجهود "48 ساعة مش نايمة و اكل بسيط فى السكة و صايمة و الطواف فى عز الظهر" المهم تحاملت على نفسى عشان اكمل السبع اشواط و خلصتهم و روحت اصلى ركعتين وار مقام ابراهيم و المفروض دلوقتى اروح على الصفا و المروة بس بصراحة مقدرتش خااااااااااااااااااااالص و ححكيلكم قصتى فى الصفا و المروة بكرة بقى ان شاء الله عشان الاحداث كتير و التفاصيل اكتر و اكتر

مساء الخير يا بنات يا رب تكونو بخير كلوكو نييفو انتى نصابة على فكرة عشان انا فتحت الماسنجر...