شوفي ياقلبي اول شي حطي فبالك مافي احد جا من بطن امه حريف كل اللي تشوفينهم طبخات كانو مثلك ومع الوقت تعلمو
اول شي بقولك على شي دايم ادعي بصلاتك وقبل تدخلين مطبخك قولي يارب اجعل في يدي البركه واجعل كل ماتلمسه يدي مبروكا ناجحا وتوكلي على الله وهذا اهم شي وثقي ان ربك يبي يعلمك واذا اشكل عليك شي وانتي طبخين قولي يامعلم سليمان علمني
ثانيا انتي مثل ماقالو لك البنات مشكلتك بالبهارت لاحضت انك ماحطيتي ماجي بالكبسه واكتفيتي بمهران مهران هذا من بكره شيليه من خزانتك وروحي جيبي علب بهارات صغيره تلقينها عند اي محل وبوجهك ع العطار واطلبي منه الاتي
بزار قصيمي او بهارات يمنيه كلها حلوه بس اطلبي جديد ولو عطاك مو مطحون افضل انتي تطحنين و املي علبة البهارات الصغيره منها واكتبي فوقها اسمها بزار والباقي حطيه بعلبة حديد حطيه بالفريزر عشان ماتروح النكهه وكل مايقضي عبي وهكذا
2- قرفه اعواد 0 قرنفل حب 0 كزبرة ناشفة حب 0 كركم مطحون جديد 0 فلفل اسود 0 وفلفل احمر 0كمون حب 0 ورق غار 0 ليمون اسود 0 شنه 0 ملح خشن 0 مصفر الارز 0 كل لاشياء هذي قوليها للعطار هو يعرفها واللي ماتعرفينه خليه يكتب اسمه ع الكيس من برى عشان ماتلخبطين لاجيتي للبيت هذي اهم البهارات واهمها
وش تسوين بهذي ياطويلة العمر القرفه تكسرينها بيدك صغار قد نص راس الاصبع وتحطينهن بعلبة 0 القرنفل تخلينه كذا حب وبعليه 0 الكزبره تطحنين منها وتحطينها بعلبة بالفريز على طول ولاجيتي تستعملينها تاخذبن من علبة الفريزر لانها اذا انطنحت وخليتها برى تروح نكهتها 0 الكركم خليه بعلبة لحال واكتبي اسمه 0 الفلفل الاسود والاحمر كل واحد بعلبة 0 الليمون كذا حب بعلبة 0 الشنه على شكلها ورق مجفف بعلبة - الملح الخشن خلي شوي منه بعلبة - ورق الغار تخلينه بعلبة لحال = الكمون تسوين فيه نفس طريقة الكزبره

اللحين صار عندك العلب هذي حطيها بدرج قريب من الفرن واللحين بقولك استعمالاتها
== الملح الخشن عشان تفركين الدجاج فيه وانتي تغسلينه قبل التقطيع عشان يشيل الزفر منه بعدين ترجعين تغسلين الدجاج
==الشنه تحطين منها ورقتين هو يجي زي الورد المجفف الرمادي تاخذين ورقتين وتحطينها مع القهوه تطبخ ع النار خيال تعطيها نكهه غير
=== الكركم هذا يشيل زفر اي شي مثل السمك او اذا طبختي طبخه فيها بصل كثير وملون للاكل
=== البزار والفلفل والكمون والكزبره هذي اهم البهارات للكبسه واغلب الطبخات لاجيتي تحمسين اي طبخه وحطيتي الطماط رشي من البهارت هذي من كل نوع ملعقه صغيره حقت الحلا الا الفلفل اختاري اما اسود او احمر وحطي نص ملعقه صغيره اذا ماتحبون الحوار
==== االقرفه والقرنفل وورق الغار هذي منكهات تعطي للاككل طعم فضيع يعني لاجيتي تسوين الكبسه تحطين مع البصل وانتي تحمسينه كم كسرة من القرفه وورقتين من ورق غار و3 حبات او 4 قرنفل وليمون اسود حبه او حبتين بس لازم تشقين الليمونه من جهه واحده بالسكينه يعني تسوين له فتحه صغيره لاتكسرينها تطلع مره بالاكل ترى بس سوي فيها فتحه صغيره مره عشان تطلع نكتهها وتخلينهم يحمسون مع البصل لما تطلع ريحتهم >>> مو شرط كل الاشياء هذي ممكن كل يوم تاخذين شيين منهم بس انا ماشتغني ابد عن القرفه وورق الغار والقرنفل او الهيل الحب بنفس العدد بس لاتنسين تشخلينهم قبل ماتكبين الرز
==== وفيه سر ثاني يعطي الكبسه طعم يجنن وهو انك تحطين بالهراسه او الخلاط قد راس الاصبع زنجبيل اخضر طازج تاخذينه من محلات الخضره وكم راس ثوم وبعدين تخلينهم مع البصل يحمسون يطلع طعم يجنن
==== الرز مو كل انواع الرز له نفس مدة التنقيع بعضها تاخذ نص ساعه وبعضها 10 دقايق وهكذا اهم سر مشترك بالجميع انه اول ماتكبين الرز علي النار عليه لما تشوفين حبات الرز بدت تبان لك بدى ينشف الما من السطح >> والحركه هذي هي اللي تخلي الرز نثري واذا بانت لك حبات الرز وقتها وطي النار ولاتوطينها حيل لاخليها بين المتوسط الى الواطي وه ثم خخفي النار اذا بدى ينتاشف حيل
----- حركه ثانيه تخلي الرز نثري انك تحطين بماء التنقيع حقه شوي ملح وشوي زيت
----- الدجاج اذا بغيتي تشوينه بالشوايه تبليه باي تتبيله واسهل شي انك تفركينه بشوي معجون طماط يعطيه لون خطير بالشوي بس انتبهي بسرعه راح يحمر عليك يعني لاتبعدين عن الشوايه
--- اذا تبين رزك يطلع ملون شي ابيض شي اصفر خوذي ملعقه من مصفر الرز وحطيه بنفجال او كاسه ومليها ماء بعدين بعد مايبدى الرز يناشف شوي خوذي ملعقه من سايل المصفر وكبيه فوق الرز على شكل نقط كل نقطه بمكان يعني ملعقه بالوسط ملعقه بالميمن وحده يسار وهكذا
-------- فيه سر كمان يعطي الرز ريحة تدوخ انك تقطعين فلفل بارد وثوم صغير صغير واذا بدى يناشف الرز شوي من السطح كبي الخليط هذا فوقه وغطيه
-------- شوفي اي طبخه ودك تسوينها عندك الاطباق المجربه هنا ترتاجين اطباق مجربه وجاهزه ماراح تاخفين تفشل بس بشرط طبقيها بحذافيرها يعني نفس المقادير والبهارات والحركات اللي مسويتها راعية الطبخه عشان مايطلع اكلك بدون طعم
------- اذا طرت عليك اي طبخه روحي قوقل وحطي فوق ع اليمين تلقين مكتوب صور ثم اكتبي بالمربع اسم الطبخه اللي تبينها تطلعلك صور مليانه لكل الناس اللي طبخو الطبخه هذي اضغطي ع الصور اللي تعجبك وطبقي طبختها

وبالاخير اهم شي بهذا كله التوكل على الله والنيه الصادقه اختي انا نصحتك كنك اختي ربي يوفقك ويطرح الطبخه باكلك ويجعل كل من ذاقه يعجبه حيل ياربي ياكريممم ادعيلي بالنقل والذريه الصالحه

انا مثلك
اذا طبخت اي شي مااحد ياكل
زوجي ياكل شوي واحسه يتغصبه
وعيالي يتفلون الاكل الي اطبخه
واذا رحنا عند امي زوجي يمسح الصحن
حتى طبخ اختي يحبه
هو يمدح اكلي بس مجامله
اتعب وازين وفي عز الحر اطبخ
ومااحد ياكل حرام دايم تنرمي النعمه
ويطلبون من المطاعم
السالفه مو بالبهارات
ولا الطريقه
لان اطبخ نفس طريقة امي واختي
حتى نوع البهارات ونووع اللحم المفروم مثلهم
بس السالفه كلها ان في حريم عندهم نفس بالاكل
وحريم لا هذا الي اسنتنجته
الله المستعان لاتزعلي نفسك
حاولي تطبخين معجنات مقليات اشياء مايبين فيها النفس

يمكن يكون ردي غريب

بس بقولك شي

اذا تبين رقمي وانا وياك نتكلم او على البيبي او الواتسب واحنا نطبخ ونسوي الطبخه من الى

وان شالله باذن الله بتحبين طبخك وبتموتين فيه

انا والله مااتكلف بطبخي كثير بالعكس طبخي جدا بسيط وسريع
والحمدلله كل الناس تحب طبخي وتموت فيه

الحال من بعضه

انا ماكملت السنه متزوجة

وكنت ادور الاعذار

يوم الدوام ويوم التعب ويوم الوحم ويوم الحمل

وامي وخالاتي ماقصروا كل شويه ينقدوني

لكن الى متى انا زهقت من اكل برا

واكتشفت ان الحكايه كلها تعتمد على الثقه بالنفس

اطبخي وكوني واثقه من نفسك

واسألي ترا مش عيب

وباقي لين دحين بأول الطريق يالله تضبط معايه الشغله

لاتيأسي ياقلبي كثير كنا زيك والحمد لله تعدينا هالمرحله انتي حاولي وشوفي الطبخات من الكتب المعتمده مو الصعبه وجربي وكمان عنك كتاب النخبه حلو طبخاته معتمده ومجربه والله يوفقك شوفي اختي كانت زيك ماتعرف تطبخ حتى زوجها دايم يتأفف من طبخها ويقول اش ها الطبيخ وكان ياكل فالمطم والحين الكل يمدح في طبخها ويسألها ن الوصفات والاسرار تقول لاني مايأست كنت اجرب واجرب واحاول لين فتحها ربي معي واكثري دعاء مايعجز الله شئ