رجيم لوضعي

هلا حبيبتي انا قريت رجيم عباره عن تصومي يوم وتفطري يوم وهكذا قلت باتبعه يقولوا صيام النبي داوود كذا ابحثي عنه في قوقل واقرب عنه
إذا عجبك اتبعيه انا من اليوم يتبعه بجربه لمده شهر

وعليكم السلام ورحمة الله وبركاته
بما ان وزنك عالي نصيحتي لك لا تستعجلين النزول
حطي في بالك هدف او خطه معينه تمشين عليها لا تقل مدتها عن 6 شهور الى سنه
وممنوع تقولين بسوي رجيم لان الكلمه بحد ذاتها تسبب ضغط نفسي عليك وممكن خلال شهر تطفشين وماتكملين
يعني اللي اقصده ابدأي بالتدريج اول شي صححي نظام طبخك بحيث يكون صحي
استبدلي المقلي بالمشوي او المسلوق
استبدلي الخبز الابيض بالبر او النخاله او الشوفان عشان يحسسك بالشبع
ادخلي السلطات الخضراء الى نظامك بحيث تاكلين طبق سلطه كبير مع كل وجبه
عودي نفسك على اكل الخضار الغير نشويه مثل البروكولي القرنبيط الكوسا الباميه الفطر الباذنجان
ولا تشترين حلويات ولا شوكلاتات ولا شبسات لانك لو شفتيها عندك بالبيت راح تشتهينها غصب عنك
كذلك المشروبات المحلاه بالسكر سواء بارده او ساخنه لا تشترينها وتحطينها بالبيت


ثم ابدأي طبقي نظام اكل نصف الكميه من وجباتك اللي كنتي تاكلينها بالعاده
يعني لو كنتي تاكلين 10 ملاعق رز قلليها الى 7 ملاعق ثم بالتدريج بعد اسبوع خليها 5 ملاعق
والسندويشات لو كنتي تاكلين 2 قلليها الى 1
البقوليات مثل العدس والفول لو كنتي تاكلين صحن مليان قلليه الى نصف الصحن
وحتى السكر بالمشروبات الساخنه قلليه لنصف الكميه اذا ماتستغنين عنه
وعوضي هذا النقص في كميات الوجبات بأكل طبق سلطه خضراء كميه مفتوحه
او عوضيه بأكل خضار غير نشويه مع الغداء او العشاء
حطي في بالك ان السلطه لازم تكون طبق اساسي في كل وجباتك لانها مليانه ألياف تملأ المعده وتحسسك بالشبع
وبين الوجبات اذا حسيتي ودك تقرمشين شي وتتسلين فيه خذي مقدار فنجان القهوه الصغير بوب كورن فشار وحطيه في كيس ورق واعمليه بالمايكروييف دقيقتين الى ثلاث دقايق بدون زيت وكلي منه
وبالتدريج ابدأي مارسي اي نشاط رياضي مثلاً الصباح امشي سريع مع التركيز على التنفس لمدة 10 دقايق فقط ثم العصر او الليل امشي مره ثانيه 10 دقايق مع التركيز على التنفس لا تضغطين على نفسك من البدايه لان جسمك مو متعود وبالتدريج كل 3 أيام زيدي 5 دقايق الى ان توصلين نص ساعه وموب كل يوم رياضه يوم رياضه ويوم راحه
وبعد اسبوعين ثلاثه جربي طبقي على قدر استطاعتك تمارين الخمسه ميل او الزومبا او حتى رقص شرقي الفيديوهات شوفيها باليوتيوب اختاري منها كم فيديو وحاولي تطبقين على قدر استطاعتك مو شرط تتقنينها 100% ومن تجربه شخصيه ترى الزومبا اكثر فايده من المشي لو تطبقينها 20 دقيقه بيحرق جسمك كثير
انا كنت اخذ لي 5 دقايق امشي سريع في البيت كإحماء ثم مباشره اطبق رقص الزومبا فيديو مدته 4 دقايق اعيده مرتين ثم امشي بطيء دقيقتين عشان اخفف دقات قلبي ثم اجلس دقيقه اشرب رشفه مويه ثم ارجع اطبق شوي من تمارين الخمسه ميل او تمرين الخواصر اللي بالعصايه او الاستبس الصعود والنزول من على درجه او شي مرتفع ممكن اخذ 8 أو 10 دقايق حسب استطاعتي ثم خلاص اختمها بإني امشي سريع في البيت او اهرول يادوب بس 5 إلى 10 دقايق ومع الممارسه يصير في شوي تعود ويخف التعب عشان كذا لازم تدرج
وبس اكثري من شرب الماء والشاي الاخضر والزنجبيل
وخذي قياسات جسمك بالمتر لا تعتمدين على الميزان وبعد شهر ارجعي قيسي محيط بطنك وصدرك وافخاذك وبتلاحظين ان قياسك نقص وبتدخل الفرحه والفخر الى قلبك وبتتشجعين تكملين

ممكن كل اسبوعين من اتباع نظام نصف الوجبه تخصصين يوم واحد للسوائل فقط عشان تصدمين جسمك بسعرات حراريه اقل وينشط الحرق عندك ..
يعني يكون يومك عباره عن الصباح اول ثلاث او اربع ساعات من صحيانك عباره عن شرب ماء او اعشاب مثل شاي اخضر او اسود او زنجبيل او بابونج او ينسون او قهوه بدون سكر
الظهر الغداء سموذي بدون سكر تعصرين ورقيات خضراء حسب المتوفر عندك نوعين او ثلاثه مثل سبانخ بقدونس كرفس كزبره مع خياره صغيره وعصير ليمونه ونص كاس ماء بارد واضربيهم بالخلاط واشربيه
العشاء خذي مرق سلق الدجاج او مرق لحم بدون دهون ولا صلصله واضيفي له شوي ملفوف مقطع او كوسا او بروكولي واطبخيه مع رشة كركم وفلفل اسود وعود قرفه


او ممكن كذلك مع نظام نصف الوجبه تخصصين يوم بالاسبوع تطبقين فيه الصيام المتقطع

عندك رجيم النقاط الفرنسي

رجيم ام عبد الرحمن

نظام اتكنز

الكيتو دايت

رجيم اللقيمات

رجيم السوائل لمشعل

حمية جابس

كلهااا مجربتها وكلها تنحف اهم شي الإراده والإلتزاام 👌🚶🏻‍♀️

أسهل رجيم ممكن يناسبك السعرات وضيفي معاه الصيام 12ساعه لين تتعودي وتوصلي 16 ساعه