ساعدوني في قرار زواجي

انا بنت تقدم لي شخص فيه كل المواصفات والشروط اللي حاطتها في بالي ادب وخلاق ودين ووظيفة محترمة ، ولكنه ( غريب ) ولا اقصد غريب من جنسية اخرى او غير ذلك ...... بالعكس من عائلة محترمة ومعروفة ، بس احنا مانعرفهم ( وهنا المشكلة ) انهم غرب مش من معارفنا ولا من اهلنا ، ولكن بشهادة الناس اللي يعرفونهم يمدحونه ويمدحون اهله (( هذه الشهادة من حريم قالوا لأمي هالكلام )) .

بالنسبة لي في البداية كنت مرتاحة ، بس لما قلنا حق ابوي وعمامي يسألون عنه قالوا : حنا ما نعرفهم ، ولما قالت لهم جدتي زين عجل من يسأل عن هالرجال ؟ يقولون دامكم سألتوا عنه خلاص ما في داعي نسأل ، وبعد الالحاح والشد والجذب وافقوا يسئلون عنه !!!

انا اعرف ابوي وعمامي هم يتمنون لنا الخير والزواج ، لكن لما تجي ساعة الجد ..... ما يبغون يتدخلون ويقولون اذا البنت موافقة خلاص ، وهذي الحالة جربوها خواتي من قبل لما كان المتقدم واحد من العيلة ، وكانوا (اقصد ابوي وعمامي) ياخذون ويعطون في الكلام معانا بهالخصوص ، وكنت احس ان ورانا ظهر .... لكن ما صار نصيب لاي وحدة فينا .

اما الحين ، هم ما يبغون يوقفون في طريق سعادتي وفي نفس الوقت ما يعرفون شي عن الخطيب واهله ـ وقالوا اذا هو زين خلاص لا توقفين حالك.


الصراحة الحين بس حسيت اني وحيدة وما لي احد الا الله ، الكل شال ايده من موضوعي ، وقالوا لي القرار قرارك .


انا في حيرة وفي دوامة وتجيني افكار سودة : منها /

1- هذا غريب فمن السهل عليه اذا حدث أي خلاف انه يطلق، لان مالي ظهر او سند يسوي لهم 1000 حساب .... وفي المقابل عمامي بيقولون احنا قلنا لج مانعرفهم ، وتحملي قرارك ........ :(

2- وخايفة ارمي نفسي بين ناس ما اعرفهم ولا اعرف اطباعهم وبيئتهم ، ويضايقوني بتصرفات انا ماتربيت او نشأت عليها .

3- نقطة هامة جدا :
سمعت من وحدة تعرفهم من كثر ما تمدح لي فيه وطيبته وحنانه تقول انه يوصل حريم اخوانه وبنات اخوانه بسيارته في مشاويرهم ، ويسافرمعاهم بعد بحكم انشغال اخوانه، وانا هالنقطة مزعجتني واااجد لان الرجال في عايلتنا يستحون من الحريم (حريم اخوانهم) بس السلام وعليكم السلام ، ولا يقعدون يسولفون وياهم ويقطون التكلفة بينهم ..... اخاف اذا تزوجته ولما نتجمع عند اهله في اخر الاسبوع يكون البساط احمدي واطلع انا الغريبة بتصرفاتي وعدم جلوسي مع الرجال ( الحمو الموت ) . واخاف بعد يقول لي في يوم من الايام انا ما اقدر امرك اليوم اخذك باخلي اخوي يجي ياخذك طبعا هالتصرف طبيعي عندهم وخاصة اذا كنت بين حريم اخوانه في القعدة ، بس انا مستحيل ما تربيت على هالحياة . واذا رفضت مدري يمكن يزعل او ما يكون في شخص ثاني يوصلني يعني اكون عقدت الامور اكثر . ( على فكرة هو اصغر اخوانه )

4- كلام الناس : كيف عرفوكم هالناس الغرب ؟ وشلون تتزوج البنت الصغيرة قبل خواتها الكبار ؟ وافكارهم تروح بعيييييييد .

5- خايفة اذا رديته ورفضته ما يتقدم لي شخص ثاني ، او يتقدم لي شخص ما تتوفر فيه الشروط اللي ابغيها ، ومن ثم النـــــــدم .

ساعدوني والله حاسة اني بروحي وودي ابكي ...... ولما اصلي استخارة ارتاح وقتها، وبعدين ارجع اقلب وتنتابني حالة الخوف والفزع هذي ، خصوصا لما اشوف اهلي يناظروني بطريقة فيها نوع من الاستنكار والاستغراب اني انخطبت قبل خواتي واني شبه موافقة .

اسفة على الاطالة //////////////////