قبل القرق بهنيكم بالعطلة وقول كل عام وأنتم بخير <<< كنه ما تناسب
اصبروا بغيرالتهنئة كل عام وانتم معطلين حتى لو كنتم مصخنين مريضين محرولين اهم شي نعطل
أدري بعضكم حياته كله عطله {ياملا مره} بس هذولا يعني يوخرون شوي لين أدخل بصلب الموضوع لازم أعبر شوي عن فرحتي بالعطلة مير صح قولوا لي مبروك والا تدرون ماحس مبروك حلوة احسه قدييييييمه المهم كل وحدة تكتب لي عبارة باسلوبه الخاص تهنين بالعطلة الله يخلي لنا بابا عبدالله وبابا عبد الله<<<<ترى التكرار موب خطأ مطبعي لا الأول الملك الله يخليه للشعب السعودي
والثاني أبوي الله يخليه لعين ترجيه أدري ماله دخل بس مايطاوعن أدعي للملك وابوي مادعي له <<<بقى شوي وخور مير أغير الموضوع أحسن
ندخل بالموضوع
طبعا أغلبكم متقضي للعيد وشارين خلاقين من فساتين وبلايز وتنانير (منيب قايلة بناطيل انقهرن ياللي تتعيدن ابنطلون )) واكيد شريتوا نعال من شباشب وصنادل وجزم والبعض اشترى اكسسوارات وشباصات ويمكن بعد تعليقات جوال (تناسب مع ثوب العيد)<<<عاد ذي بالذات الله من بطي ماسويته عساي بس أدبعن بروحي فاضيه ألبس جوالي دلاديل مير ترى محدن داري عن جوالتس خصوصا يوم العيد كلن لاهي بعمره وزيادة مواصلين الناس ماناموا يعني الشوف شجر
بس بخاطري سؤال فيه ناس بيكشتون( يعني بيطلعون للبر)) أيام العيد بس السؤال هل يلبسون ملابس العيد!!؟؟
ترى هالسؤال من قلبي ودي ادري بيكشخون وهم بالبر !!أحس مايصلح خابرتنا لابغينا ننام بالبر نفتح الكرتون اللي مجمعين به الخلاقين اللي ناوين نتصدق به ونستعير منه كم خلق قبل الصدقة ونكرفه بالبر همن نغسله ونرجعه <<<< الله يعافيكم لاعاد تصدقون
لو تشوفونا بأول الكشته وش حليلنا لابسين لبس على سنع نوعا ما يقالنا كشخة بس لا جا الليل وقرب النوم الله لايوريكم ماتعرفين الوحدة خاصة بالبرد
قبل تدخل الخيمة وتغير كانت وش حليلة كله ملح همن تطلع لنا منقلبه سنجته لامني شفته ما أذكر إلا {سحيلة أم الخلاقين} مدحيتن روحة خلاقين قميص شتوي تحته فنيلتين والبنطلون يويق من تحت القميص وفوق القميص فنيله صوف مسكره من قدام يصير القميص طالع فيه حركات وكسرات من البلوزة وطالعتن الحرمه كبر قريح
حاشيتن نفسه ملابس تقل خايفتن تقضي الكشته وهي مالبست الملابس اللي جابته والمشكلة لاجت تنام تحتها مطرحه وبطانيتين وفوقها ثلاث بطانيات وإن بردت اسحبت المطرحة وتغطت بهأخبر مره دخلت خيمه من الخيمات وطارت بوهتي قلت غريبه ورا الرجال ناصبين الخيمة وجواته طعس ضاقت الأماكن كان ردموه والا كان ابعدوا شوي عنه ويوم تمقلت شوي وأثره وحدة من الحريم من اللي يحبون رويحتهم ماخلت بطانيه ببيتهم ماجابته وتشوفينه لاقامت الصبح أول ((تنحر يعني تتجه موب تذبح<<تونا عن عيد الضحيه مابعد جا شكلكم بزران بنزل لمستواكم ترى ذا العيد اللي قريب موب اللي نذبح فيه خرفان همن ناكل كبده لا حق الحلاو اللي من نصبح لين نمسي وحنا نلهم من هالحلاو
تقل ماقد شفنا حلاو بعيشتنا وبطوننا تنهمر من كثر البلع وبذاك اليوم ومالنا شغله إلا نتردد على هالحمام واللي عنده بزران عاد ذي تنرحم عيده كله بالحمام مغير سردادي مردادي على هالحمام يعني رايح جاي المفروض مانسميه عيد الفطر نسميه عيد الهمره نرجع لموضوعنا أقولكم سحيله أم الخلاقين أول ماتقوم تنحر الضو (( النار)) وهي متلهلمه بالشال اللي بس لاشفتيه دفيتي وش عاد لالبستيه الضو تلز يعني تلصق بالضو زين بعد ماقعدت فوقه واصلا حتى لو قعدت الله من بطي ماحست من كثر الخلاقين والله إن تطفي النار وهي مابعد وصلته الحرارة
همن تقول صبوا لي حليب <<<<وانتي ياسحيله ورا ماتحركين وتصبين لروحتس
مسيكينه ماتقوى تحرك من كثر الخلقان حتى يده يالله تاصل افمه
مير ماعلينا منه ان بغت تلبس الدولاب بكبره <<<<وش عقبه عقب ماشرشحتيه
المهم الوحدة منا تشوفينه متخلقنه وبطاه تطلع الشمس تبدا تفصخ هالخلقان بس قطعه قطعه يعني بالتدريج أول شي الشال همن الفنيله الصوف اللي فوق القميص همن وحدة من الفنايل اللي تحت القميص همن تفصخ البنطلون وترى كل ذا التفصخ وحنا قاعدين بين الناس مافيه امل يبان الجسم من ذا الخلقان همن تفصخ الفنيلة اللي تحت (( طبعا الثانيه)) همن تروح تغير القميص الشتوي لقميص صيفي والا جلابيه ولا جت الرنانيه وبعز الظهريه نفصخ حتى الجلابيه ومايبقى إلا....... المايوه<<<< واخزياه لاتصدقون امزح وش قالولكم أجانب على البحر الله لا يقوله
إلا على طاري الأجانب هم يكشتون مثلنا ويتخلقنون !!!
اخبرهم يسمون الكشته بكنك <<<< أحلى مايمديكم علي حركات
بس وش يسمون سحيله ام اخلالقين !!؟؟
يمكن ((سوهيلا موذر كلوثس))
سوهيلا = سحيله
موذر= أم
كلوثس= ملابس
أصبحت سهيلا أم الملابس
بس يمكن ماعندهم وحدة اسمه سحيله يمكنها ((ميري)) ام الخلاقين
على فكرة كم مرة كتبت ( خلاقين وخلقان وتخلقنت ومخلقنه ...الخ) ؟؟؟؟<<<الله ياجرنا على قرقك عاد معطله يعني منتيب قاضيه أول مير الدراسة تشغلك هالحين مافيه شي يلهيك
والله تصدقون اخبر مره يوم انا بزر بالابتدائي سافرنا لبريطانيا<<<بتعلمكم إنه قد سافرت برا
وطبعا حنا هناك حنينا للكشته قلنا نبي نطلع نكشت طبعا أخذنا عدتنا (( الدافور والمعاميل)) ونطلع نركب تكسي ونقول له نبي بر قام ودانا لحديقه يارجال نقولك بر موب حديقه المهم مافيه فايده كل شوي يوقفنا بحديقه <<< تراه هي ميب حديقة بس هذي طبيعتهم ما شاء الله برهم كنها حدايقنا الله يرزقنا بالجنه
المهم قام ابوي نزل ويأشر على تراب بالأرض يقول نبغى أرض كله تراب<<<<الله يخلف مسافرين برا يدورون تراب!! ياشين القراوا لاتطوروا
فهم السواق أخيرا ومادرينا إلا موقفنا بالبحر عند هالعالم المصاليخ الله يستر علينا الظاهر ماعندهم تراب إلا عند البحر وعيينا ننزل<<<<مسكين السواق حظه نحس ذاك اليوم اللي ركبنا معه
قلنا له خلاص ودنا للحديقة اللي تو
ورضينا بالأمر الواقع ونزلنا بحديقتهم وعاد تخبرون عرب ويبون يكشتون أول ماطبينا الأرض انتشرنا وقمنا نراكض ويجي ذاك الشرطي ويقول ممنوع الجلوس على الزرع يبينا نجلس على الرصيف وقمنا وقعدنا على الرصيف بدون فراش نحسبنا ننلقى طعس ماحسبنا حساب هالجلسه واخواني معهم كورة وبدوا يلعبون إلا يجي الشرطي الله لايسلط علينا ويقول ممنوع لعب الكورة عشان الأشجار والورود ماتخرب حاولنا فيه مارضى سكتنا
همن طلعنا عدتنا نبي نسوي قهوه <<<عرب وخرمانين قهوه بعد
ويجي يقول ممنوع لا تولعون النار ونحاول نقنعه مافيه فايده يقول بعدين تتسببون بحريق <<<< من زين بركم عاد
وش ذا البر اللي كل شي فيه ممنوع وكله كوم ويوم جت ذيك العايله ( أم وأبو وولدين تقريبا واحد بالمتوسط والثاني بسادس وكلب عاد الكلب عضو فعال ومهم بالعايلة ) وينزلون كراسيهم وطاولتهم وينزلون العصيرات والشبسات والبساكيت وحنا يابعد عمري قاعدين على الرصيف وطايرتن عيونا ويبدون ياكلون <<<ياكافي مالزموا علينا جعلهم مايحدرونه
المهم ويجي الولد يطلع لعبه معه زي القيم بوي ويبدأ يلعب والثاني معه الكلب ويرمي شي والكلب يروح يجيبه وين الشرطي ورا مايجي يقولهم ممنوع الكلب يركض والا مستقوي علينا!!؟؟
المهم يوم قضوا ماكلين قالوا بالكرسي كذا الا وينسدح وياخذ الأبو الجريدة ويبدا يقرأ والأم قامت تلطلط بجسمه كريم ولبست النظارة الشمسية اللي كانت فوق راسه وانسدحت( هالحين ذولا يسمون نفسهم كاشتين!! ورا ماقعدوا بحوشهم احسن لهم) وحنا من جلسوا ماغير مبحلقين بهم
تقل فاتحين قدامنا تلفزيون حتى مانرمش نخاف يفوتنا شي لا وزيدكم من الشعر بيت قلنا لخوي رح تعرف عليهم غديهم يعطونك بسكوت وإذا عطوك جب لنا مير ذا العيال ماينفعون عيا يتحرك بالأخير ملينا ووقفنا تكسي ورحناطبعا رجعنا لشقتنا غيرنا ملابسنا وماردنا إلا المطعم إمحق كشته رحنا متنا جوع ورجعنا نسيت أقولكم ترانا جابين معنا رز بنطبخ غدانا مير اللي عيوا على القهوه الرزمن باب أولى
بس صدق ذا الأجانب مايعرفون يكشتون أصلا لا شفتي سيارة الرحلات حقاتهم غسلتي إدينك منهم <<<طبعا سيارة العمل والزيارات تختلف عن سيارة الرحلة
لاااااااااا وآخر اختراع لا بغوا يكشتون حتى سيارتهم الصغيره ياخذونه معهم من ضمن احتياجات الرحله يمكن الأب يصير عنده اجتماع طارئ ولاهوب ماخذ سيارة الرحلة للعمل فقالوا مافيه إلا حل واحد إننا نخترع سيارة رحلات يكون فيها مكان لسيارة العمل <<<طبعا إنا كنت معهم يوم يقررون يخترعون بس كنت تحت الطاوله
المهم شوفوا الصورة
شفتوا هالسيارة كنه كنغر سيارة في بطنها سيارة عاد أنا قاهرتني هالقرعة اللي عند الكفر وشوله حاطينه شكل كفرهم منسم ومغبينه بالقرعه والشجره<<<ذكيه
ولا شوفوا ولدهم هالأشقر مسوي ثقل قدام الكميرا ولا يناظره موب مثل بزرانا لا جينا نصورهم بكمرة فيديو صنموا ويدبلون كبودنا يترززون حتى لو جيتي تصورين شجره جا يركض صورين وهو فاق خشته زين مايدخلون بآلة التصوير بعد<<هذا اللي ناقص
على فكره ترى امه وبوه واقفين ورا باب السيارة والدليل شوفي صقعة ابوهم خليتها لكم عشان تصير دليل بس تراهم واقفين وماسكين يدين بعض وأنا عناد لهم ولحركاتهم الأرعا طمستهم عشان النوبة الثانية يحترمون أنفسهم ولا يسوون هالحركات قدامنا
هذي الصورة بدون حركات وقلة أدب
بس دققوا على الكفرات لاحظوا إنها طايرة مالمست الأرض عشان كذا كانوا حاطين قرعه<<<<<كاشفتهم
يحسبونها بتعدي علينا مادروا إن عرق اللقافة والشرافه خلان أشوف الكفر قبل السيارة
وهذي الصورة ركبوا ولدهم بالسيارة الصغيرة وصكوا عليه هناك<<<<لايروح تفكيركم بعيد بس عشان الولد شاب على أهله يبي سيارة يسوقه فقالوا له اركب بذي وتخيل إنك تسوقه لين ناصل
وهذي عقب مادخلوا سيارتهم وضفوا عفشهم واستعدوا للرحله
موب حنا قشنا فوق سيارتنا واللي يشوف السيارة يحسبها دورين من كثر العفش لا ولاوصلنا للبر اكتشفنا إن نص العفش ناسينه
اصبروا شكلي غلطت وحطيت لكم صورة مطبخنا !!!
لا والله ما غلطت ذا مطبخهم بس موب اللي في بيتهم لاااا بوسط سيارتهم والدليل شوفوا النقشه اللي فوق المغسلة نفس نقشة السيارة
بس صراحة أنا احمد ربي إنه هالسيارة ميب لنا صراحة فيها عيوب يكفيك هالمكرويف حاطينه بالسقف الواحد يتمصع لابغى يصخن له شي ياكله مير انا الزر اللي يفتح باب المكرويف منيب طايلته وش عاااااد الأرقام !!
عاد هذي الصاله لاطفشوا يجلسون به <<<< موب قاهرن إلا إنهم يقالهم كاشتين
وش ذا الكشته
عاد قولوا الصدق ذي كشته كان اقعدوا في بيتهم اريح لهم ولا هالخساير وبعدين ذا الصالة من بيقعد به الأبو يسوق والولد الله العالم وش صار عليه بذيك السيييره((تصغير سيارة)) مابقى إلا أمهم تسدح وتبطح بالصاله جعله ماتهنى به <<<< حاااااااااااقدة
عموما خلاصة الموضوع ترى هالسيارة إختراع فاشل بالنسبة لنا للأسباب التالية:
1-السيارة قابلة للتغريز ولا تدخل بالرمل لاحظو جرم السيارة قريب من الأرض يعني بنغرز قبل ناصل البر كيف!!؟؟ طبعا أول مطبه قريبه لبيتكم بتغرزون ميب متحركه عقبه السيارة تتنشب بالمطبه عاد من صغر مطباتنا وكانكم ملزمين دوروا طريق مابه مطبات <<<هذا وجهي إن لقيتوا
2-لا صرنا ننجلس بوسطه وشوله كاشتين بيتنا أستر لنا وأبرك لنا.
3- إن مادخل عيونتس التراب ماكنتس كاشته
4- إن ماطقطقت اسناتس وانتي تاكلين الكبسة اللي مدحيه اتراب ماكنتس كاشته
5-إن ماغوغا الذباب عليتس
ودبل سبدتس ماتقل كاشته6-إن ماتمرغتي بالرمل ماكنتس كاشته خاصة لاصار جنبنا طعس اذكر كنا نلف العباة على جسمنا همن ننسدح بأعلى الطعس همن انتدربى تقل براميل زفلت متدربيات من تريله
7- إن ماصرنا سحيله أم الخلاقين وقشنا متناثر بالسيارة ماكننا كاشتين
8- وبعدين والله لو إن هالسيارة لنا كان هالمراتب البيج تغدي بنيه من بزارينا تعرفون نحب نغير الألوان بين فترة وفتره بس عاد نغيره بطريقتنا الخاصة
9- أصلا كان من كثرنا نصنا متربعين بالأرض ما شاء الله العايلة الوحدة فوق الثمانية افراد هذا اقل شي هم إن كثروا صاروا ( أم وأبو وثلاث وراعين وكلب ) وترى تعتبر عايلة كبيرة وإذا كبر ولدهم طردوه يقولون عجزين عن مصاريف الكلب ماحناب فاضينن لك رح دور على شغل الله يكملنا بعقولنا ولا يحرمنا من نعمة الإسلام
10-واخيرا اللي مايطول العنب يقول عليه حامض
أدري إني طولت بس للمعلوميه تراي مختصره عشانكم <<<<< مشكوووورة ماقصرتي
عاد مع السلامة واستروا على ماواجهتوا
تسلمييييييييييين