ام جاورس ياحلو كلامك درر ..

ياليتك تعطينا من نصائحك و تشجعينا وتوجهينا ..

انا احس نفسسي تايهه .. واخرها اليوم حصل لي موقف وماقدرت اخذ حقي برغم ان الحق معي قانونيا 100 × 100وسكت ولا دافعت عن حقي ..

ليش هالخوف والخجل ماادري ايش سببه ؟

هلا خواتي..

رجعت لكم :)

اختي طموحة..

مثل ما تعلمت انه سر الثقة في النفس ينبع من الداخل .. تعلمت انه هالسر يكون عادة مصحوب بعدة مشاعر معينة تنبع من دواخلنا و هالمشاعر اما تكون سلبية او ايجابية و هي اللي ممكن انها تعطيج الثقة في النفس و تزيدها او انها تعمل العكس تماما...

للاسف اللي صاير انه الغالب علينا هي المشاعر السلبية .. و اكثر هالمشاعر هي الخوف و الفزع و الجزع و القلق.. بس مو من المؤثرات الخارجية.. لاااا.. لكن من هالمشاعر بالنفس.. هذا بالفعل اللي اكتشفته..

صدقيني خوفج من عدم سيطرتج على الامور اكبر بكثير من خوفج من المؤثر الخارجي..

خليني اعطيج مثال .. من حالتج انتي.. انتي تقولين الفراغ يتمكن منج.. هالشيء يعني انج تخافين من الفراغ لانه يسبب لج عدم ثقة بالنفس.. تعرفين نصيحتي لج شنو.. و هالشيء انا اقول لج اياه بعد تجربة شخصية.. اول شيء انج تقبلين الشعور اللي تحسين فيه.. لا تحاولين تقاومينه بأي شكل من الاشكال.. عادي اقبلي شعور الخوف.. شنو يعني انج خايفة من الفراغ او من اي شيء ثاني.. انتي انسانة طبيعية و هالمشاعر متوقعة منج.. انتي مو مخلوق خارق متوقع منه انه يحارب الصعاب..

و صدقيني بس تتقبلين خوفج من الشعور النابع من الداخل.. هالشيء بيعطيج راحة نفسية و هدوء و سكينة... و هالمشاعر بتاخذج للمرحلة اللي بعدها.. و هي انج تحسين انج متمكنة من نفسج و متمكنة من التحكم في مشاعرج.. و بالتالي ما في اي مؤثر خارجي ممكن انه يهزج.. :)

الحيلة الثانية.. انج حاولي قد ما تقدرين انج تراقبين افكارج على طووول عشان تقدرين تتحكمين فيها.. و هالحيلة انا تعلمتها من كتاب (السر) و ما تتصورين شلون كان لها اثر كبير في تغيير حياتي للافضل..

و راح اقتبس من كلام الكتاب.. اللي يقول انه معظم الناس تخاف و تقول شلون اقدر اراقب افكاري .. لان للاسف معظمنا ما يعرف في شنو يفكر و متى يفكر.. و عشان هالموضوع يصير سهل عليج.. راقبي مشاعرج.. (رجعنا للمشاعر.. شفتي اشكثر انه المشاعر الداخلية هي اساس كل شيء :))..

بس هم ممكن تسألين .. شلون اراقب مشاعري.. ؟ اقول لج اول بكل بساطة.. شوفي روحج متى تكونين فرحانة و مرتاحة و متى تكونين متضايقة و معصبة و متنرفزة.. و مشاعرج بتدلج على افكارج.. لان لما تكونين فرحانة و سعيدة.. اكون بيكون هالشعور نتيجة فكرة حلوة او ذكرى جميلة او شيء محبب الى نفسج مر في بالج.. و هي هذي الافكار اللي انتي محتاجة انج تفكرين فيها و تغذينها دايما ..و لما تكونين متضايقة و معصبة و مكتئبة.. اكيد هالمشاعر بتكون نتيجة مرور فكرة سلبية او ذكرى مريرة مرت على بالج.. و هذي هي الافكار اللي لازم تحاربينها و تبتعدين عنها.. و بسس :)

لو تمكنتي من مراقبة افكارج.. من خلال مشاعرج.. راح تنتقلين للمرحلة اللي بعدها.. انج تعرفين شلون تحولين الافكار السلبية لافكار ايجابية في لحظة.. يعني لما يمر في بالج انج مو واثقة في نفسج و الناس احسن منج و كذا.. و تبدأ مشاعر الحزن و الضيقة تعتمل في داخلج.. و لاحظي انتي بتكونين وصلتي لمرحلة انج تراقبين افكارج و مسيطرة عليها تماما.. فعلى طول من المشاعر راح تعرفين انه فيه فكرة سلبية مسيطرة عليج و لازم تغيرينها.. و على طول ابدأي قولي انا واثقة من نفسي و تذكري مواقف كنتي فيها بالفعل واثقة و راح تبدا المشاعر السلبية بالانسحاب تدريجيا و يحل محلها مشاعر ايجابية من راحة و سعادة :)

انا ركزت على هالنقاط من مراقبة الافكار و تغيريها.. لان اعرف انه المشاعر السلبية تأثر على الناس لما يكون عندهم فراغ كثير.. و لذلك معظم الناس تخاف من الفراغ.. و تخاف تكون بروحها..

لو طبقتي اللي قلت لج عليه.. ما راح يخوفج الفراغ ابد.. بالعكس راح تنتظري الاوقات اللي تحصلين فيها على اكبر قدر من الفراغ عشان ترتقين بنفسج و بافكارج :) هم عندي لج نصيحة زيادة.. و هي انج تستغلين اوقات الفراغ.. بالقراءة في تطوير الذات و الدعاء و الاستغفار انه الله يساعدج في كل خطوة تخطينها :)

اختي سعودية ذوق..

مشكورة على الكلام الحلو..

و الله هالكلام ما طلع الا من نتاج ظروف قاسية مريت فيها.. مرارا و تكرارا .. و خذت وقت طويل لحد ما استوعبت و فهمت الدنيا و الناس .. و انا كلي ثقة انه كل انسان في الدنيا يقدر يحصل على الثقة في النفس اللي يتمناها..

بالنسبة للخوف و الخجل و احساسج بالضياع.. فهو اكيد نتيجة ظروف معينة مريتي فيها.. هي اللي زرعت فيج هالمشاعر.. بس نصيحتي لج مثل نصيحتي للاخت طموحة.. و هي انج تتقبلين هالمشاعر في نفسج عادي.. لا تحسين انها عار و انه مو المفروض انج تحسينها .. لا تقاومينها.. تقبليها عادي.. لان هالخطوة بتكون اول خطوة في تقبل ذاتج مثل ما هي و صدقيني بتحسين براحة و ثقة و قوة عشان تبدين تتخذين الخطوات اللي بعدها..

على فكرة بنات.. باقول لكم شيء

ترى الثقة بالنفس مو شيء ثابت.. يعني ما فيه انسان يثبت على مستوى واحد من الثقة في النفس.. يعني يقول انا وايد واثق من نفسي او يقول انا عدم.. هالكلام خطأ و غلط .. و انا صرت ما اتقبل انه يصدر من اي انسان .. الواقع انه كل الناس لهم لحظات قوة يكونون فيها في اعلى مستوى من الثقة بالنفس .. و ممكن هالناس نفسهم لهم لحظات ضعف يكونون فيها في مستوى متوسط او حتى متدني من الثقة بالنفس..

اي و الله يا بنات.. انا هذا اللي اكتشفته.. يعني لا تقبلون و تصدقون فكرة انكم مو واثقين من انفسكم.. و اللي واثقين من نفسهم وايد.. لا يندمجون في الدور كثير...لاننا في النهاية ناس نمر في ظروف تغيرنا من حال الى حال ...

راح اعطيكم دليل من حياتكم.. كل وحدة منكم تفكر في موقف او فترة كانت ثقتها في نفسها من اعلى ما يمكن.. و هم فكروا في فترات او مواقف كانت ثقتكم في نفسكم متدنية...

انا متأكدة انه الكل راح يلاقي انه مر في الضدين خلال فترة من فترات حياته.. و هذا اكبر دليل على انه ما فيه انسان واثق تماما و ما فيه انسان منعدم الثقة..

لو تقبلتوا هالفكرة.. راح تغير كثير في حياتكم و نظرتكم لانفسكم :)

عسى اكون فدتكم في شيء و لو بسيط ..

موفقين يا الطيبات :)

ياليييييييت ترجعلي ثقتي للأسسف 0 0 0 0

فعلا كلامك صحيح..جبتيها تبارك الرحمن
..أحنا مافينا بلا بس ناقصنا نمي أنفسنا
ونطورها...

بس..اللي تنعدم ثقته عند ناس معينه...
وشيسوي؟؟