هلا خواتي

سوري ما رجعت للموضوع الا الحين

اختي احلى قمر

هالمشكلة واجهتني كثير .. و كانت مسببتلي قلق.. فانا فاهمة اللي تمرين فيه عدل

اول خطوة لازم تسوينها انج تقعدين مع نفسج و تفكرين في الاسباب اللي تخليج تفقدين الثقة في نفسج لما تكونين مع هالناس.. يعني شللي يقولونه او يسوونه عشان تحسين بعدم الثقة لحظتها ..

بعد ما تعرفين الاسباب ابدأي فكري في الحلول .. بحيث انج تردين على كل واحد من هالناس حسب شخصيته و طبعه و طبعا حسب الموقف..

خليني اعطيج مثالين من حياتي .. و اقول لج شلون عالجتهم ..

الشخص الاول مع صديقة عرفتها من طفولتي المبكرة .. يمكن من لما كان عمري 6 سنوات.. طبيعة شخصيتها انها من النوعية اللي تربت على انه كل طلباتها مجابة.. كانت تعامل كل حد حواليها كاشخاص مسخرين لخدمتها و بس (طبعا هالامور توني عرفتها.. بعد ما قطعت علاقتي فيها بسنين.. ترى احيانا ياخذ لج فترة على ما تفهمين الناس اللي حواليج عدل)..

المهم توالت المواقف و توالت السنوات و كبرنا و كلما كبرت كلما ازدادت اطباعها حدة و سوء.. كان وجودها حوالي يضايقني و يفقع مرارتي.. و كانت تغلط علي كثير.. و تمادت كثير و هذه كله و انا ساكتة.. لحد ما مرة تعدت كل الخطوط الحمرا اللي بينا و تطاولت على اهلي.. انا هنا ما سكت.. كلمتها و هزأتها و وريتها حجمها الحقيقي و حطيتها في مكانها الصح.. طبعا هي ما سكتت و طلعت كل اخلاقها الزفت.. قلت لها كلمتين: سوي فيني خير و بيكون الخير الوحيد اللي سويتيه طول عمرج لي.. رجاء مسحي كل ارقامي من عندج و انسيني.. و عني انا فمن هاللحظة مستغنية عنج.. و اعتقد هذا احسن قرار اتخذته في حياتي.. طبعا هي جنت شلون اتجرأ و اقول لها هالكلام.. و قعدت تدز لي مسجات كلها سب و انا حقرتها تمامااااا... لحد ما تعبت و عرفت انه ما من وراي رجا انه ابرد قلبها و ارد عليها..

بعد فترة سمعت من صديقاتنا انه اغلبهم قطعوا علاقتهم فيها.. و اللي للحين حواليها علاقتهم فيها جدا سطحية..

يعني في الاخر صفت وحيدة..

الموقف الثاني .. مع زوجة ولد عم زوجي...

من اول ما تزوجت و هي حاطة دوبها من دوبي.. بس اسلوبها كان فيه حيلة و لؤم شديد.. يعني ما تسوي او تقول الشيء بطريقة مباشرة.. حركاتها كلها لف و دوران .. و الكل كان متضايق منها بس ما حد ماسك عليها شيء لانها كانت خبيثة جدا.. و عمري ما ارتحت في وجودها لان كلامها كله دق و همز و لمز .. و اهل زوجي فيهم طبع انهم حتى لو يفهمون يسوون روحهم مو فاهمين حتى لو كانت تسب فيهم هم يسكتون..

المهم سوت لي مشكلة كبيرررة مع اهل زوجي و مع بيت عمه اللي هما اهل زوجها.. و طبعا من تحت لتحت.. يعني حرضت اخت زوجي و بنت عمه عشان يسبوني و يهاوشوني.. انا من اول ما صارت المشكلة كنت متأكدة انها ورا الموضوع.. و ظليت سنة كاملة ادعي ربي انه يفضحها.. و بالفعل.. صار اللي بغيته و الله عطاني دليل دامغ عليها.. كلمت اهل زوجي عشان كلنا نوقف في وجهها بس كلهم خافوا و حتى قالوا لو تكلمتي ما راح نوقف معاج..

انا ما همني.. رحت لها و واجهتها و عطيتها محاضرة في الاخلاق... و هي كانت لاخر لحطة تغلطني و تحرش الكل علي و تلف و تدور.. قلت لها كلمة حسيت انه عينها طلعت من راسها خخخخخ

قلت لها شوفي اختي... اسلوب اللف و الدوران و اللؤم اللي انتي عايشة فيه.. تقصين فيه على نفسج و على الناس اللي راضية انه وحدة مثلج تلعب فيهم... بس شوفيني و اسمعيني عدل... انا غير.. انا راح اوقف لج بالمرصاد.. حركاتج على الكل بس مو علي.. و من يومها و هي تتجنبني تماما... و طبعا سوت حركاتها القرعة .. ماشية تتكلم علي و تشوه سمعتي.. بس و الله ما همتني.. لانها الغبية عبالها انه الناس مو فاهمة حركاتها.. خخخخخ و الله انها تكسر خاطري.. و دايما اقول لو تتوب لربها و تحاول تتغير.. جان يكون من دواعي سروري اني اساعدها :) بس هي راضية بوضعها .. ما لنا الا ندعي لها بالهداية ...

لاحظتي اختي شيء في الموقفين؟؟؟

انه هالنوعية اللي تحسين حواليها بعدم الثقة.. تكون معظم الاحيان شخصيات مراوغة جدا... و عندها صفة مشتركة انها لا يمكن تعترف بخطئها... و الحقيقة انها ضعيفة جدا في داخلها...

و الشخص اللي يوقف في وجهها و يراويها حجمها الحقيقي.. تخاف منه.. و تعتبره عدو.. لانه تحس انه كاشفها و عارف انها في الجقيقة مرعوووبة من داخلها من شيء معين تحاول تغطيه باسلوبها الدفش...و هالشخصبات ما تحب انه اي احد يكتشف هالحقيقة.. و اللي يكشفها يصير على طول عدو... و تبدأ تستخدم الحيل الثانية عليه.. و هي تجنبه تماما.. او انها تسبه و تشتمه (مثل الموقف الاول) أو انها تتكلم عليه و تحاول تشوه صورته قدام الناس (مثل الموقف الثاني).. مو مو بس لمجرد التشويه و بس.. لاااااا... لكن عشان تكسب اكبر عدد من المتعاطفين او المؤيدين لها.. :)

شفتي اختي ... الناس اللي تحسين حواليهم بعدم الثقة ... تراهم يكونون في الحقيقة مرعوبين منج اكثر من رعبتح منهم.. بس انتي صيري قوية.. و صدقيني انج ما تحتاجين معاهم اكثر من موقف عشان توقفيهم عند حدهم...

ان شاء الله اكون فدتج اختي و سامحيني لاني طولت في الرد عليج

تحياتي..

ام جاورس كلامك روعه الله يخليك جلسي معانا وفيدينا الله يكثر خيرك دددد ماتنعطى وجه

الله يسلمج اختي صوت الماي :)

ترى انا توني من فترة بسيطة اللي رجعت لي ثقتي بنفسي و وعدت نفسي اني اعلم كل شيء علمتني اياه الحياة لاي حد يبي يتعلم عن هالدنيا...

و اهم شيء تعلمته و اللي صار يهمني وااايد .. انه الثقة بالله اولا.. و الثقة بالنفس ثانيا هما اهم العناصر اللي لازم كل انسان يتحلى فيهم عشان ينجح في كل جوانب حياته و ينجح في كل علاقاته ..

:)

ماشاء الله تبارك الله يام جاروس
انا حمدالله ع قدر معقول من الثقة بس مدري من اكون مع اشخاص معينين تروح ثقتي بالحظيظ
ف البيت وف المدرسة ف البيت اتحاشى اجلس معاهم معاهم او احتك فيهم بس ف المدرسة اتضايق لما اشوفهم يسلموا ويجلسوا مع بعض زميلاتنا اقول ف نفسي لذي الدرجة انا مو محبوبة مع ان الاغلبية من المعلمات يعزووووني كثييروالمديرة حاطتني ع راسها بس اتضايق لم اشوفهم

الثقه من وجهة نظري وعن تجربه
أساسها من الأهل وممن حولك
هذا بالنسبه للأطفال لكن كيف تجلس معك حتى الكبر
هذا في يدك وحدك لا غير
يبغالها قناعه وأن تنظرين دائما وتركزين كثيرا على ايجابياتك من وتحاولين تغيير كل نقطه سلبيه بروح متفائله
ودائما رردي صفاتك الحلوه واغمضي عينيك بل تجاهلي صفاتك السلبيه وكأنها غير موجوده
وتعلقي دائما بما عند الله ,,,, ورددي اللهم عوضني جنة الفردوس
ومع الناس كوني الإنسانه التي تريد أن تتسلى ولا تجرح أحد وأن جرحك أحد فهذا نقص فيه ليس فيك
ولا تجعلين كل كلمة تأثر في شخصيتك لـأن هذه الكلمة التي طلعت
يا إما أنها طلعت من غير قصد فلما أشغل بالي بها وأهز ثقتي بسبب كلمه؟!
وإما أنها طلعت بقصد فلما أحقق هدف من يجرحني ويهز ثقتي ؟! !!!!!!