من الدايركت

السلام عليكم
بقولك قصتي
انا تخرجت من تخصص قانون بمرتبة شرف أولى وكنت أحسب الدنيا بتصير مطاقق علي كلن يبيني اتوظف عنده واتخير أنا الا يوم جيت للواقع مااافي وظااايف تحططمت تحطم عاد أنا انسانه أحب الدوام أحب الكرف لدرجة وصلت أروح للمدارس يقولون وش نوظفك فيه😕
مابقى مكتب ماقطيت أوراقي فيه مابقى شركة ماارسلت لها السي في ، جلست ابحث بوظايف عن بعد وماتيسرت لي بعد ، لو تشوفين كيف صرت كئيبة وحزينننه كنت انغمس بالحزن وأنا مب حاسه كرهت نفسي كرهت الدنيا حاولت استغفر عشان ربي يرزقني واحافظ على سورة البقرة بس يومين اتحمس وأسبوع اتركها تطوعت بمركز ديني صرت بطريق الروحه اقرا جزء وبطريق الرجعه استغفر الف مره ، حمدت ربي وكل يوم احمده ان ييسر لي واعاني على ذكره ، صرت أحس بالمتعه من القرب من الله حبيت نفسي كثير صرت استغفر حب لله ورغبة بالقرب منه❤️صرت راضيه وعرفت ان الخيره فيما اختاره الله فعلى كثر ماكنت كارهه وضعي وليه ماتوظفت الا اني استوعبت معنى قوله تعالى (( وعسى أن تكرهوا شيئا" وهو خير" لكم وعسى أن تحبو شيئا" وهو شر" لكم )) .. وش أفضل وأجمل من ذكر الله والقرب منه ❤️صحيح للحين ماتوظفت بس عندي يقين بالله عظيم بتوظف بالمكان اللي ابيه متى ماكتب الله ❤️ #اللهم اجعلنا من سعداء الدنيا والاخره
امين

من الدايركت

قصتي ان عندنا بيت بمزرعة ابوي بيت المزرعه مانروح الا بوقت الاجازه له طبعا كانو الوقت تقريبا 3 باليل ابوي ينام بالحوش ومانقدر نشغل المكيفات اغلبها ع هالحوش ونضطر ننام بالصاله هو المكيف حقه بعيد عن الحوش والصاله صغيره وقتها حطيت فراشي قريب لباب الحوش وجالسه اطقطق على الجوال وكنت انتظر ابوي يصحى ياذن هو امام مسجده وقتها قلت بصلي الوتر انا مو مره محافظه ع الوتر بس وقت ماكون صاحيه اصليها رحت وصليت وقريت اذكاري ورجعت لجوالي ومنسدحه ودخل ابوي بيوضي فجاه شي يمشي على رجلي انا كنت متغطيه توقعتها وحده من خواتي تستهبل عوايدهم وارجع انفض هالشي برجلي الثانيه ويرجع يمشي وانفضه مره ثانيه -بارده الاخت- المهم ارتفع ضغطي واصارخ احسبها وحده من خواتي وارفع البطانيه واناظر ماحولي احد 🌚 وانقز وارفع بطانيتي فجاه عقرب اللي كانت تمشي على رجلي سودا واصارخ وراحت بجهة اخواتي نايمات وقتها الحمدلله ويجي ابوي ويقتلها ويطلعها يعني لو ماصليت ولا قريت اذكاري وهي ماشيه علي ثلاث مرات ومن بعدها صرت محافظه عليهم وحبيت اقولكم اللي صار معي وحافظو على الوتر والاذكار💞💞
#لا اله إلا أنت سبحانك اني كنت من الظالمين

من الدايركت

كذا مرة نشرتي قصص عن الصدقة و بعض الناس بدت تتذمر منها و نسوا قول الله تعالى "فيقول رب لولا أخرتني إلى أجل قريب فأصدق و أكن من الصالحين" شوفوا أمنية الميت يرجع و يتصدق .. سالفتي عن الصدقة على الوالدين .. الحمدلله عايلتنا ميسورة و أبوي انسان على قده و ما مقصر معانا بشي .. و اخواني و اخواتي موظفين و انا منهم .. بعضهم يعطون أمي و أبوي جزء من راتبهم شهريا و بعضهم لا .. و الله لاحظت اخواني اللي مكرمين والديهم الله فاتح عليهم و عايشين بسعادة .. و راتبهم يكفيهم و الباقيين دايما يشكون قلة الحال مع انه رواتبهم زينة الحمدلله
الشهر اللي طاف كنت مفلسة و لله الحمد و ابوي بيروح الحج و ما عندي اعطيه .. كان وده يشتري شي معين و حلفت عليه اني ادفع و انا بنيتي انها تكون صدقه و بنفس الوقت ادخال السرور على قلبه.. و الله ابوي يقدر يدفع و رفض اني ادفع شي و دفعت نص المبلغ و انا كلي سعادة و طمع بالأجر العظيم .. و شفت السعادة بعيون أبوي
و من يومين أمي طلبت مني أحول لها مبلغ .. بالبداية الشيطان وسوس لي 😈قالي انتي ما عندج و اخر الشهر و الحال صعبة .. بس فجأة تذكرت أجر بر الوالدين و انه من أحب الأعمال إلى الله و الأم خصوصا مهما عطيناها ما بنوفيها حقها و تعبها علينا .. و عطيتها بطيب خاطر و نويتها صدقة انه الله يرفعني فيها بالدنيا و الآخرة .. باليوم اللي بعده وصلني مسج انه نزل راتبي و بعدها وصل مسج وصلني مبلغ محترم يعادل نص راتبي .. سألت أخوي انت حولت لي قال لا .. فجأة أخوي قال يمكن مكافأة و طلع صح كلامه مكافأة من الدوام .. و هذي اول مكافأة استلمها من وظيفتي و الله على ما أقول شهيد

بنات نصيحتي يوم تتصدقون خلوا نيتكم تكون للآخرة .. و أسعدوا والديكم و الله أموركم بتتيسر بدون ما تحسون.. و اللي أمها أو أبوها متوفيين .. تخصص مبلغ شهريا لو بسيط و تنوي الصدقة عنهم .. الأموات يفرحون بالصدقة .. ورد عن النبى صلى الله عليه وسلم إذ قال: " الصدقة على المسكين صدقة، وعلى ذي الرحم ثنتان، صدقة وصلة ". رواه أحمد وابن ماجه والنسائي والترمذي وحسنه، وابن خزيمة وابن حبان في صحيحيهما.

#يارب اسعدنا واذهب عنا كل مايقلقنا ويحزننا
امين

من الدايركت
امي من اول رمضان وهي يدها تعوررها والم والم
نقولها خل نروح المستشفى وهي لا ابد
رمضان وقت عباده بقعد اصلي تراويح ومافي وقت وجاء القيام وابد ماروح بتحمل الالم 😩 ي ميمتي خل نروح وهي مصره لا !! الى درجه احنا نلابسها ربي يحفظها لنا ماتقدر تحرك يدها ونمشط شعرها !! خلص رمضان على خير وسوت تحالليل وطلعت التتيجه !! انو عمليه 😦😟
شلون ماشلون صعبه تتخدرين تخدير كامل في هالعمر استخيري شوفي 😕
وعم الحزن علينا جميعاً :(
ويوم طالعه انا وياها واخوي للمستشفى نشوف وش اخر اشاعه سوتها نتايجها
ويعلم ربي كميه الحزن الي فيني وفي اخوي
واحنا نمشي بسياره نشوف عمال نظافه تسعه واقفين على جنب تحت شجر عن الشمس !! تعديناهم قالت اميميتي ربي يحفظها ارجع ياوليدي اعطيهم مايكتبه ربي !! رجع اخوي وفتحت الشباك امي وعطتهم بنية شفاء لها وربي يسر لها امرها للافضل ❤️❤️ وربي ياخذون المبلغ البسيط منها ويقلون (( الحمدالله )) كل هالتسعه قالو (( الحمدالله )) سكرت امي الشباك بهون الوضع
قلت يقلون الحمدالله والله اننا بخير ونعمه واحنا ضايق صدورنا على يدك ويمكن انها خيره والحمدالله على كل حال وياماما على الاجر ان شاءالله وربي يخليك لنا ومحد يدري وش ربي كاتبه ابتلاء واختبار من رب العالمين ❤️الحمدالله افضل من غيرنا ❤️ حمدوو الله ❤️
نزلنا المستشفى والا نشوف التحالليل ايش !!! اللهم لك الحمد والشكر الحممدالله ياربي لك الحمد ❤️❤️❤️ ان تسوي علاج طبيعي مدته 16 جلسه ❤️❤️ وان شاءالله يفيد ❤️❤️شفتو كل هذا كله بسبب مبلغ بسيط تصدقت فيه بنيه الشفاء لعمال النظاقه ولها ثلاث ايام باديه علاج طبيعي ❤️❤
#لا اله الا انت سبحانك اني كنت من الظالمين

امين يارب وياك