حبيبة مبارك :

وعليكم السلام و الرحمه اختي العزيزه الحل بيدج انتي لا بيدي ولا بيد غيري انتي لازم شوي تعدلين من نفسج و تهتمين في نفسج اكثر عشان تقدرين تتصرفين بحريه لاني متأكده الوحده لما تكون حاسه ان شكلها غلط حتى ثقتها بنفسها تقل كثير .. شوفيني لما اكون مسشوره الكشه و مضبطه نفسي اقعد ريل على ريل محد يكلمني غير لما احس نفسي كشه و لبسي نص ونص تلاقيني قاعده بالزاويه ما ابي احد يطالعني حتى زوجي :) يبي لج تصرف سريع ،، واراده قويه .. والحل انا اعطيه شويه نصايح وانتي حاولي انج تطبقينها و ان شاء الله تضبط معاج .. الحل الوحيد لركب السود كريم اسمه ( بولي ) اهوا صناعه سوريه تلاقينه عند العطارين و الهنود اللي يبيعون ( انا اشتريته من هناك ) اصفر و على كتابه بالازرق و الكريم مثل ( سيجنال تو ) شكله . و اللي داخله كريم لونه اصفر . ان شاء الله اصوره لج و احط لج صورته . المهم الكريم هذا ينفع حق ( الاباط ـ بين الرجول ـ و الركب السود ) جربيه و حطيه وشوفي النتيجه بس استمري عليه . كحل وسط .. البسي دلاغات شفافه . يعني لبسي ثوب النوم ، و تحته لبسي هالهوب شخال يجنن وااايد حلو ومثير على رجل المرأه اهوا مثل الهلهوب بس شخال ( اصور لج اللي عندي عشان تعرفين ) اوكي . لا تحاتين ترا مشاكلج واااايد بسيطه :) تلبسين الهلهوب هذا وشوفي كل السواء بيختفي فجأه . و ما راح يشوف قدامه الا الرجول اللي بالهلاهوب . وقولي حبيبه مبارك قالت . عندج طريقتين . اما انج تكوين شعرج عند الصالون وبعدين تسوين له سشوار ( لان شعرج من النوع الخشن ) لان السشوار بروحه ما راح يفيدج ، لازم كوي بعدين سشوار . نصيحه كل فتره دقي على واحده تشتغل بصالون تجي البيت و تسوي لج الكوي مع السشوار ( وغيره من شيره و حمام كريم ) وتقدرين خلال ايام لما يكون زوجج مو موجود تسوين ( ثلاث ملاعق الا اربع ملاعق مايونيز ) و دهني شعرج و لفيه بجيس خبز ( صغير ) عشان العرق و الحراره وخليه ربع ساعه بعدين تسبحي عشان ينعم الشعر و اياج تستخدمين زيت من اي نوع ( شعر جاف وخشن ) يخربه الزيوت بأنواعها يبي لج كريمات فقط .. اوكي ؟ في طريقه ثانيه . التمليس !! ليش ما تملسين الشعر على الطريقه اليابانيه و الله ثم و الله اني شفت وحده ملست شعرها واهي من النوع اللي شعرها ما يطول ( تعرفينه ) الشعر اللي يلف .. ؟ مال سمر البشره !! و الله اني شفت شعرها قلت ما شاء الله شنو هذا ؟؟ شفتها بالصالون لما صبغت شعري . اوكي و لما سألت راعيه الصالون قالت لي هذه مسويه ( تمليس ياباني ) اهوا غالي صراحه عندنا في الكويت 350 دينار و يكثر المبلغ على حسب طول الشعر . بس النتيجه مو بس مضمونه قولي 100% بس روحي حق صالون معروف وزين اوكي . اذا تقولين السعر غالي بالنسبه لج ( صدقيني عن تجربه ) انا لما ابي اشتري شغله و سعرها مو عندي احط لي حصاله صغيره اقط فيها كل يوم دينار ( غصب طيب ) لازم اخذ دينار واحطه بالحصاله حتى لما يكون زوجي موجود اقول له قط لي دينار في الحصاله ( مع اني آخذ فلوس من زوجي) بس مرات يكون مصرفي اكثر من مصروفي ،، فاجمع بالحصاله . و بعدين اكسرها سوي نفس الطريقه وشوفي المبلغ اللي راح تجمعينه خلال 3 او 2 شهر ؟ :) راح تتفاجئين كثير . تقشير الوجه عانيت من نفس المشكله هذه فتره والسبب ان وجهك خشن . جاف حبيبتي جيبي علبه ( كريم دوف ) بادي سيلك عن تجربه اكثر من رائع حطي طبقه ثخينه من الكريم هذا بأي وقت من اليوم لما يكون زوجك مو موجود اسبوع وشوفي البشره شلون تتعدل . و تنعم حيل سواء الوجه او الجسم . انا لما اطلع من الحمام وانا مبلله استخدم الكريم هذا و الله يمسك ايدي يقول شنو النعومه هذه :) استخدميه حق وجهك و ايديج و جسمج كله صدقيني بتدعين لي . كريم دوف عندي الحين اصوره لج بس خلني اقوم المكياج .. سر المكياج هو الفاونديشن الماركه الزين الملائم لبشرتك بس انتي الحين بشرتك تعاني من الجفاف عالجي الجفاف بالكريم حق دوف بعدين روحي حق محل سنع حق مكياج و خليها الخبيره تختار لج كريم اساس عند تجربه انا استخدم ماركه ( ماكس فاكتر ) سائل رقم 55 ومرات 50 وايد مرتاحه معاه بس انا حنطاويه مائله للبياض . ما ادري اذا ينفع الرقم هذا معاج بس انتي لما تروحين السوق شوفي الملائم لج . وحتى لو ما حطيت مكياج لازم ولابد كحل و مسكرا و بودره ورديه حق وجهي و قلوس للشفايف شفاف . بس عشان لما اطالع زوجي بعيوني الحلوة يكون شكلي حلو . الحين انا ما اقدر احط مكياج لاني سويت عمليه حق عيوني . بس اكيد اول ما اصير زينه برد استخدم الاشياء هذه لانها حلوة وتفيدج كثير .. على الاقل تعدل من صوره ربه البيت الازليه ولما تكونين مخططه لحفل مع زوجج او شي .. كثري مكياج و حطي فاونديشن و ثقلي المكياج كانك رايحه عرس مع شدو وغيره ... واذا تبين الشدو وايد سهل . واسهل منه ما في مثلا تبين تحطين شدو ازرق حطي طبقه من اخف لون ازرق فاتح جدا فوق الجفن المتحرك . بعدين تجين من الزاويه الخارجيه للعين و تزيدين لون ازرق غامق وافرشيه على الجفن بعدين حطي كحل جاف اسود بعدين وزعي الكحل بواسطه ( منظف الاذن ) و انشريه شوي شوي يصير عندج جفن ( درجات الازرق مع لمسه ضبابيه حلوة ) بعدين حطي الكحل الاسود الجاف مره ثانيه فوق وتحت العين .. وسوي للحين زاويه حاده من الخارج ( مثلث ) وكثري من وجودك في قسم المكياج عشان تعرفين الاشياء الجديده و طريقه المكياج الصح . بس عالجي البشره اول شي لان بشرتج بالشكل هذا راح تخرب احسنها فاونديشن . المشي كل يوم اختاري انج تحددين ساعه معينه صباحا او مساءا المهم زوجك ما يكون بحاجه لج في ساعتها هذه و تمشين بالشارع او بأي مكان المهم تمشين . عشان ينقص الوزن وحاولي تسوين رجيم . بالنسبه للبس الضيق ممو لازم ؟ في بنات يلبسون ثوب يكون ضيق من فوق ناحيه الصدر ووسيع من تحت يعني ( بيبي دول ) يهبل هذا انا وايد احبه و احسه مريح . لبسيه ،، واذا خايفه من الركب لبسي الهلاهوب اللي قلت لج عليه :) اذا انتي تقولين من حقه ؟ وانتي مرته و يمه .. عيل الناس شنو تقول .. اختي لازم ولابد انج تحاولين انج تنقذين زواجك وتنقذين نفسج من الهم اللي راح تحطينه في بيتج ترا مو سهله يتزوج عليج زوجك !! ابد مو سهله حاولي تغيرين نفسج و صدقيني راح تقدرين . عسى الله يسخر لج زوجك و عساج مرته الوحيده في الدنيا و الآخره اللهم لا تجعل لزوجها حضا بالنساء مع غيرها يا رب وحدك القادر على ذلك يا كريم آمين يا رب العالمين آمين

وعليكم السلام و الرحمه اختي العزيزه الحل بيدج انتي لا بيدي ولا بيد غيري انتي لازم شوي...

روزال99 :

كفيتي ووفيتي

كفيتي ووفيتي