طاحت من درج المدرسه والسبب ...........؟؟

الملتقى العام

الســــــــــــــــــــــــــــــلام عليكم ورحمة الله وبركااااااته


كيفكم وش اخباركم ان شاء الله الجميع طيب وبعافيه يارب

وكل عام وانتم بخيييييييييييييييييييير ياأعز خوات


اليوم قريت موضوع للاخت شمعة امل الله يجزاها خير وفيه صوره لكتاب قرآءه قديم حرك مشاعري لكتابة موضعي
رغم انه من زمان يدور براسي
بس الكسل الله يبعده عني وعنكم
قبل يعطلون الطلاب جاتني بنتي تشتكي وتبكي
بنتي رابع ابتدائي جات تقلي ياماما طحت بدرج المدرسه مرتين
قلت ليه قالت


شنطتي العله ثقييييله تطيحني ماقدر اشيلها وترميها من عند الباب
والله خفت تتقلب من الدرج ولا تنكسر بسبب الشنطه

الشنطه يابنات ثقييييييله تذكرني بشنطة اولى ثانوي كانت اثقل شنطه شلتها
وربي احزن عليها صغنونه ولما تشيل شنطتها تصير تترنح يمين وشمال
عارفين النظام الجديد كل ماده لها كتابين نشاط وطالبه
ولا المعلمات كملوها بملفات كل معلمه تطلب ملف صارت الدعوه تقليد
والبعض يطلب دفتر بعد كمان المفروض كتاب النشاط مكان الدفتر خلاص
المهم رحت كلمت المديره قلت شوفو حل مع ثقل الشنطه وعطيتهم بعض الحلول
مثل ان البنات مايشيلون ملفاتهم تبقا مع الملعمه في المدرسه
ومثلا المعلمه تحدد يوم معين لكتاب النشاط بس
ومثلا المصاحف تبقا في الادراج والبيت فيه مصاحف وحتى مايصير امتهان للمصحف
من الاطفال دون درايه يشيلون الشنط ويرمونها على الارض ويجلسون عليها ويحذفون بعضهم بها
عاد قالت اقتراحاتك في محلها وانا بناقشها مع المعلمات وان شاءالله نطلع بحل مرضي
وقلت لها وش قصة هالملفات مره ماتفيد الطالبه بشي ماغير جيبي من النت صور
وسوي مطويه ولاسوي بحث من النت طالبه سنه رابع تسوي بحث
والله انا كل هالاشياء اسويها لبنتي ماتعرف تفرق بين الذبابه والناموسه عشان تسوي عنهم بحث
وسألتها وين الكتابه الطالبه صارت بعيده عن الكتابه ماعاد تكتب
بس تقص وتلصق وتزين كيف يتطور خطها واملائهاهي في مرحله محتاجه للكتابه جدااااا

تعرفون وش قالت


قالت هذا التعليم المتطور حتى احنا مو مقتنعين فيه بس وش نسوي مجبورين عليه

الله يرحم ايام كتاب قرأ وكتب وزرع وغرس وربي انها احسن بمليون مره من لغتي الجميله اللي حايس على بعضه
ولا الرياضيات اللي مو مفهوم للكبير قبل الصغير

وش رايكم يابنات بكلامي هذا
يعطون طلاب صغار 20 كتاب ولا اكثر وبعضها بصراحه تاااافهه جداااا
ويحطون فوق الكتب ورقه يحذرون من الشنطه الثقيله وانها توجع ظهر الطالب
والله مثل علبة الدخان اللي يحطون عليها تحذير انه يسبب السرطان

مين زي متضايقه من ثقل الشنطه على بنتها
ومن المناهج اللي صارت حشو كلام بس

اتمنى تفاعل الجميع و الملعمات ايضا وأبداء وجهات النظر والاقتراحات ان وجد

لاني اذا لاحضت تأييد راح اكتب ايضا على الفيس بوك لعل الكلام يوصل
احد المسؤولين من وزارة التربيه


المعذره طولت بس فعلا ارتحت لاني فضفضت لكم
فديييييييييييييتكم
77
8K

يلزم عليك تسجيل الدخول أولًا لكتابة تعليق.

تسجيل دخول

عصفوره مشاكسه
صح انا شفت كتاب اولى متوسط ياعمري كانها مناهجنا بالثانوي كيف عاد الابتدائي
سوسو النماص
سوسو النماص
والله صادقه المنهج ماغطينه في كتابين ولو جمعوه في كتاب كان أريح
ومو من زين المعلومات اللي فيه بس تشتيت لذهن الطلاب
واللي زاد الطين بله ان المعلمات يقولون للطالبات جيبوا كتاب الماده الفلانيه بكره يمكن
أعطيكم منه درس
وهذا غير الملفات والله تقولين مستوصف حكومي في ظهر الطالب مو شنطه وصرت انا اللي أحل واجبات الملفات مدري وش الفائده المرجوه منها
الله يعين بس
طبعا أنا مو متزوجه بس أخواني عندي يدرسون
متجر زهرتي
متجر زهرتي
الله يكون في عون هالاطفال
ام البنون الصغيره
كلامك عين العقل والله أحزن على عيالي لمن يروجون المدرسه والمصيبه ان كتاب النشاط ماينتفتح والمعلم نفسه مو عارف شو الهدف منه الله يرحم ايام التعليم زمان بس
ركايز
ركايز
صادقه اول بنتي اذا جت ترمي الشنطه عند الباب من ثقلها
وانا اشيلها لها تدرين المشكله اول ايام الدراسه كل مدرسه تجي وتقول لهم
جيبوا الماده الفلانيه لانه مافيه جدول وتمتلي الشنطه كتب ودفاتر ومره وزنت الشنطه
طلع وزنها 5 كيلو ونص ...