أكيد كل الي بقوله تعرفونه من قبل أو عندكم فكرة عنه .. لأنها من أساسيات عمل الكيك ، و أي وحدة متعودة تسوي كيك اكيد تعرفها .. على العموم هاذي هي الخطوات اتبعوها .. أو اتأكدوا انكم تسوونها و مش ناسينها
معلومات للي ما تعرف أو تذكرة للخبيرة
بسم الله نبدأ
1) أول شي و أهم شي بالنسبة لي حجم القالب .. لازم تتأكدين من حجم القالب المطلوب حق عمل الكيكة و عشان تعرفين ان عندج القالب الصحيح ، لازم العجينة لما تصبينها فيها تكون معبية ثلثه .. اذا كانت العجينه اكثر من النص ، أحيانا و أثناء الطبخ بتطلع من القالب و بتبهدل الفرن
2) حمي الفرن قبل لا تبدين الشغل
3) لازم كل المقادير متوفره ، لا تستعملين شي بدال شي .. مثلا زيت بدال الزبدة ، اذا كانت الزبدة مطلوبة
4) كوب من الزبدة يساوي 227 جرام او اصبعين من الزبدة .. نص كوب يساوي 113 جرام او اصبع واحد .. و هكذا
5) انا ما استعمل غير معيار الكيك المتعارف عليه في عمل كيكاتي ، الي هو الكوب المرقم.. يعني الكوب الواحد يساوي 250 مل او 8 اونص او ربع لتر
6) اذا الكيكة مطلوب في طريقة عملها انج تستعملين الورق المشمع كبطانه فمن الافضل انج تستخدمينها ، لأن الكيكة يمكن تكون من النوع الي يلصق في قاع القالب .. عشان جذيه افضل تبطنينها
7) اذا مش مطلوب ورق الزبدة .. فالطريقة الاعتياديه طبعا ، و الي هي دهن القالب و رشه بالطحين .. انا احب استعمل بخاخ الزيت ، احسه افضل و سريع .. بالنسبة للطحين ، إذا عندج ملاحة فاضية حطي فيها طحين و خليها مخصوص حق رش القالب .. بتوفرين طحين بها الطريقة و ما بتحطين زيادة عن اللزوم
8) بالنسبة لوقت طبخ الكيكة ، أحيانا الوقت المطلوب يكون أقل أو أكثر .. ترا مش كل فرن حرارته مثل الثاني .. ممكن يكون فرنك من النوع الي بسرعه يسخن او من الي ياخذ وقت او عادي .. يعني اذا مر نص الوقت او ثلاثة ارباع الوقت .. تشيكي بنفسج اذا الكيكة نضجت او لا
9) لما تخلص الكيكة او تنضج لا تطلعينها على طول من الفرن .. سكري الحرارة و خليها في الفرن عشر دقايق زيادة .. لو طلعتيها على طول تراها بتفش اذا منتفخة
10) لا تقطعون الكيكة على طول -أعرف ناس ما يستحملون ما يقصون الكيكة اول ما يطلعونها , يحبون ياكلونها و هي حاره- خلوها تبرد في القالب و بعدين بطرف السكين حاولوا تفكونها من القالب اذا لاصقة شوي .. الكيكة و هي حارة تتفتفت أثناء القص .. عشان جذيه خلوها تبرد
هاي كل النصايح الي عندي .. ان شاء الله استفدتوا .. و إذا عندكم أي سؤال أنا حاضرة
بالتوفيق في عمل الكيك
السيدة ماما @alsyd_mama
محررة برونزية
يلزم عليك تسجيل الدخول أولًا لكتابة تعليق.
الصفحة الأخيرة
يزاج الله خير على هالمعلومات...و إن شاء الله الجميع يستفيد منها :27: