قصتي مع واحد في الشغل...ساعدوني

السلام عليكم ورحمه الله وبركاته

كيف الحال خواتي العزيزات....

انا كنت متابعه لمواضيعكم من فتره طويله..ولاني واثقه اني بلقى حل او حتى نصيحه وراي منكم..قلت بنزل موضوعي وان شاء الله القى عندكم الراي والمشورى..لاني صدق قصتي تعبتني..وماعارفه نهايتها

انا بنت من الامارات..صارلي سنه تقريبا متخرجه من الجامعه..

قصتي بتكون مع واحد بنفس عمري ومعاي في الشغل..وقصتي مستمره لين يومكم هذا

بسم الله ابدأ

احنا مجموعه شباب وبنات اشرفوا علينا جهه حكوميه بعد ماخلصنا الثانويه العامه على دراستنا في الجامعه..طبعا كل شخص فينا كان في جامعه..بس في النهايه كانت هالجهه ضامنه لنا وظيقه بعد التخرج..

المهم خلصنا الجامعه..وكلنا تقريبا داومنا في نفس الاسبوع..الشباب والبنات...كنا 3 شباب و4 بنات

المهم انا بقولكم عني..انا هب من النوع اللي اعرف اتعامل مع شباب..يعني في الجامعه يالله يالله مع الدكاتره..

وكنت متغشيه ومريحه نفسي..يعني لا دخلت المكتب عند الحريم اشل الغشوه واشتغل ولاخلصت اردها..يعني ولاااشخص من الشباب مره شافني..
اما صديقاتي كانوا عادي متحجبات

المهم...محمد اللي قصتي بتكون معاه...ماكان ابدا يتكلم معانا نحن البنات..وحتى لا مر مايسلم..يعني شاااايف نفسه عالاخير..وكان صديقه خالد فرفوش ...عادي يكلم صديقاتي ويسلم..يعني طبعا يسولف في حدود العمل والثالث كان يستحي
اما انا ماكنت اتكلم مع اي حد فيهم..يعني يشوفني خالد متغشيه فما يحاول يحتك معاي

المهم فتره كانوا الشباب يغيبون من الشغل..فطلع قرار حطوا فيه اسامينا كلنا ووزعوه علينا ان المفروض مانغيب ومن هالكلام..

من هذا القرار..ويوم محمد وخالد شافوا الاسامي عرفوني..لانهم شافوا اسمي كامل..
طلع محمد ولد جيرانا..وهو يعرف ابوي ويعرف اعمامي واهلي..
طبعا انا مادريت..الاا بعدين..

المهم كلمونا في الشغل وقالوا لنا بنقلونا شغل ثاني..في مكان ثاني
ونا تميت متضاايقه..لان في الشغل الثاني بتضطر اني اعق الغشوه واتحجب..والمشكله ان محمد تخصصه نفس تخصصي يعني بشوفني..اتخيلوا فشلله 6 شهور متغشيه وعقب يشوفني

المهم الحمد لله محمد كان يدرس ماجستير في تخصص ثاني..وفي الشغل الثاني قالوا انهم بيغيرون قسمه يعني مابيشتغل معاي في نفس القسم..

قبل لا اشتغل بيوم ونا مستااانسه..ومرتاحه لان اللي في القسم (الطابق) اجانب وبنات بس..ماشي مواطنين واماراتيين
قالي ابويه فلان ولد فلان معاكم في الشغل؟ ؟؟(يقصد محمد)
انا هني انصدمت كنت اطالع التلفزيون..قتله ليش منو هذا؟؟ونا قلبي واقف
قالي هذا ولد ربيعي شفته قبل شهر تقريبا في المسجد وشكله معاكم
انا من هاليوم عرفت انه يعرفني..

المهم اشتغلنا الحمد لله وكانت معاي وحده من البنات معاي من شغلي الاولي..
وخلاص عقيت الغشوه..وتوكلت على الله..قلت هو مابكون في قسمي وبعدين ليش افكر فيه وايد..انا مالي خص فيه وهو نفس الشي

الا عقب اسبوع يوصلنا كلنا ايميل..(القروب) عساس بسوولنا اجتماع للموظفين الجدد..
هههههههه انا خلااص قلت انفضحت اليووم..قلبي عورني يعني بيشوفوني ههههههه

سرنا الاجتماع..وطبعا كلهم عارفين اشكال بعض الا اناا مايعرفوني..وكل شخص عرف على نفسه..ونا خلاص محترررقه..والشباب محمد وخالد يحاولون مايشوفون بس يوم اتكلم يصدون

المهم خلص الاجتماع..وقبل لايطلع محمد وخالد كلموا ربيعتي ونا وراها..
ومحمد تم يطااالعني..ونااا ميته من المستحى ولفيت الجهه الثانيه

عقب يومين انا وربيعتي قاعدين نشتغل..فاتصلت في خالد تبا تساله شو سوى في موضوع معين
فرد عليها قالها...انتي قاعده تتصلين فيني اانا المسكين وعندح فلااانه؟؟ (كان يقصدني انا)

ربيعتي تمت تضحك قالتله شوفيها فلانه؟

قال عبالها مانعرف ابوها واعمامها...نحن نعرفهم كلهم...وقالت لي ربيعتي انها سمعت محمد يقول لخالد قولهم حتى انا ادري...

يعني محمد يبا يوصل لنا معلومه ان هو يعرف بعد...
عاد اتخيلوا شكلي عقب ماقالتلي هههههههههههه

لا والمصيبه اليوم الثاني الصبح..كنت راكبه اللفت..بروحي عندي شغل تحت..الا يفتح اللفت عند طابقهم..ومنو طلع لي..
محمد وخالد ههههههههههههه
ونا خلااااص ...قلت في خاطري ارووح اموووووووووووت هههههه

يا بنات الحين بتبدا قصتي مع محمد...مع ان على فكره...قصتي مافيها كلام بيني وبينه..اللهم السلام عليكم وعليكم السلام

عقب فتره رسلوا لنا ايميلات ان في تدريب مده ثلاث ايام..في نفس مكان شغلنا..والقروب كان صغير يمكن 10 اشخاص تقريبا..يعني كم شخص زادوهم على قروبنا..

ونا تميت متضايقه..ماحب جي انتم في مكان واحد فتره طويله وخاصه محمد كان في القروب

لا والمصيبه ..حاطين اسمي مقابل اسمه..صح مو في نفس الطاوله..بس مايحتاج بس لو يرفع عينه بشوفني

ونا كل شوي اقول لصديقتي لفي شوي فلان في ويهي ههههههههههه

المهم صار كذا موقف بالتدريب بقولكم اياه بالمختصر

اول شي نحن بنات ونتكلم صح...يعني كل ماعطونا بريك اسمع البنات يقولون محمد ماشاء الله عليه ابدا مايطالع ..بس راسه في الطاوله..

ونا في خاطري اضحك..اقول ماشاء الله عينه في الطاوله..وهو كل شوي رافع عينه صوبي..
بس صدقوني الحمد لله ولامره التقت عيني بعينه..

المهم مره في التدريب عطونا اوراق نكتب قصه..كل شخص يكتب سطر واحد ويمررها عالشخص الثاني..والثاني يكملها..المهم عقب المدرسه لصقت كل القصص على الجدار..وقالت لنا قوموا اقروا القصص...انا رحت صوب وقريت وحده وضحكت..وتم محمد يطالعني..قاله ربيعه هاه قريت؟خلنا نروح نجلس..قال لا لحظه..
المهم رحنا يلسنا نحن البنات..شوي الا اسمع ضحكه قوويه..لفيت اشوف محمد يضحك..ويقرا القصه اللي كنت اقراها..مع ان يا بنات في اكثر من 10 قصص بس هو كان يقرا اللي قريتها

مثلا صارت مرتين ان كل ما اجاوب..هو يجاوب وراي مع ان نكون في نهايه اليوم والكل تعباان..

وكان عند كل قروب..لوحه..مثلا اذا عطتنا المدرسه سؤال يقوم واحد من القروب يكتب الاجوبهلمجموعته..فمره هو قام ونا قمت..وتم يطالعني ان طنشت...المهم يلسنا..عطتنا المدرسه سؤال هو قام..تم كل شوي يطالعني يترياني اقوم..عقب قلت لربيعتي قومي ...قامت..حسيته لف تافف ههههههه

وفي نهايه الكوورس عند تقديم الشهادات..
قلت الا اشوفه يرفع راسه والاا..
تمت المدرسه تنادي اسامي البنات وحده وحده..وهو كان يلعب بتلفونه..ولااا رفع راسه على اي وحده..قلت في خاطري لا حرام اظلمه يمكن كنت اتوهم حركاته
يوم قالت المدرسه اسمي...والله يابنات..رفع راسه ورجع ظهره على الكرسي..وقعد يطالع..
ونا استحيييت..قلت في خاطري اقوم افلعك ههههههههه


المهم مر تقريبا اسبوعين ماشفته...ومنهم اجازه دراسيه اسبوع هو خذها..

فيوم من الايام كنت في طابق عندي شغل..وكنت رايحه صوب اللفت..

المهم شفت واحد شكله من ورا..يشبهه..قلت غريبه..رجع ونا مادري..وبعدين قلت يمكن موب هو لان الطابق اللي كنت فيه..مو الطابق اللي يشتغل فيه

ماشي مريت..وهو كان يميني..حسيت هالشخص يتابعني بعيونه..انا ماتجرات الف واتاكد..

اتخيلوا ركبت اللفت..واللفت بابه يعكس نفس المرايه..اللفت بدا يسكر..تخيوا شو شفت؟؟

شفته واقف..لان حاجز جدامه اللي يفصل الموظفين ومكاتبهم اللي في النص عن بعض..طوله نص متر تقريبا..يعني لو تم يالس مابشوف..اتخيلوا شفته واااقف يطالعني..والله كشفه ان صورته انعكست في اللفت اول مابدا يسكر! ههههههه

موقف ثاني

كنت مره في قسمهم ادرب شخص..المهم طلعت..هو كان يالس مع شباب..واتخيلوا هو رافع رجل وحده على الكرسي..وعاق نعاله..ووزاره طالع(اللي تحت الكندوره) يعني شكله مبهددل..
هو ماكان يدري اني داخل المكتب..
طلعت سلمت ومنزله راسي ومريت يسار..هو انصدم يوم شافني..
قام بسررعه وعدل كندورته..ولحقني سار صوب البرنتر...اونه قاعد يطبع شي..مع انه لو راح من الجهه الثانيه كان اقرب له..بس هو مر من وراي ومشا ضعف المسافه..بس عشان يعدل صورته جدامي

ومره رحت..يلست عند ربيعتي..وماكان يقدر يشوفني..فشو سوى..تم كل شوي يطبع ورقه ويروح البرنتر..فوق الاربع مرات..ويوم يطلع من غرفه البرنتر يطالعني..حتى وحده من صديقاتي ماتعرف السالفه قالت اشفيه هذا يطالعج!! ماحيده جي..احيده مادب
انا خليت نفسي هب عارفه السالفه..قتلها منو!!ههههههه

ومره رحت بعد..كان عند صديقتي شغل..وقتلها بيلس بترياج..المهم..الفاصل بيني وبين محمد حاجز اللي طوله نص متر..المهم يلست..هو شاف ربيعتي عقب لف ورفع راسه شافني..اتخيلوا قام..وتم واقف يابنات فوق النص ساعه اونه قاعد يرتب اوراق وكله صاد صوبي..لانه لو تم يالس مابقدر يشوفني..حتى صديقتي يوم رجعت قالت والله انه حركاااات...يعني عباله نحن مانفهم ههههههههه

المهم هالحركه سواها مره ثانيه..انا يلست نفس المكان..وقلت لربيعتي اياني واياج تتكلمين..روحي بعيد ولاتخلينه يشوفج..لان لو شافج بعرف اني هني..قالت انزين..

عاد الهبله ربيعتي..شو سوت..راحت عند واحد وهي عبالها انا وراها..بس انا كنت يالسه..المهم مالقت اللي ادوره..قالت اففف فلاااانه محد هذا شو نسوي!!

عاد هو سمع..ماصدق وقف وشافني..وتم واااااقف وسوى نفس الحركه..تم اونه يعدل اوراق وصاد صوبي...انا بغيت افلع ربيعتي..

ومره كنت في مكتب وحده..اتخيلوا تم وااقف من بعييييد اشوفه يطالعني وخليت نفسي ماشوف..

واااايد المواقف...مافي مره يابنات والله مالف او صد صوبي اذا كنت موجوده..

واذا كان مثلا يكلم بنت في الشغل ونا دخلت..يخليها ويروح..يعني مايبا يصورته تخترب جدامي..من يشوفني ماييلس ابدا قايم واقف قايم واقف..جنه قاعد في سوق بورصه ههههههههههه

يعني من يدري اني موجوده احسه يحوم حوالي فهمتو عليه بنااات

ومرات اركب اللفت يكون هو فيه...اسلم..هو ينزل راسه ويرد السلام..يالله ينسمع صوته..يستحيي

وحتى صديقتي..اذا كانت بروحها عادي يسلم ويسالها اشحالج؟ اما اذا كنت معاها مايتكلم ولايخلي نفسه يعرفها..
يعني باختصاار واااااااااااايد يستحي مني..بس بتقولون ليش عيل يطالعج؟ لان عباله اني ماشوفه والا موب منتبهه..لان اتكلم عادي واخلي نفسي هب عارفه انه يشوفني..يعني اطنشه ^^


والله انا تعبت تعبت من هالحاله...هب عارفه شو اسوي..انا مابكذب عليكم..انا حابه حركاته...يعني مستانسه ان في حد عاطني سالفه هههههههههههه
<== هب شايفه خيرههههههه

لاتفهموني غلط..انا مابا تكون بينه وبيني علاقه..والحمد لله انا عارفه حدودي..وبصراحه ماااحب ابدا اتكلم مع الشباب المواطنين..كلهم..واذا ابا شي يا ارسل ايمييل او اخلي صديقتي تكلمهم

ترى الحمد لله انا جميله بشهادة البنات...والحمد لله على كل حال

وهو ما شاء الله عليه جميل...ووسيم....مستانسه واحد جميل عاطني سالفه هههههههههههه

يابنات شوروا عليه..ِ

ابا اعرف..هو يحبني والا لا...لاني ماعرف شو الحب..وماعرف شو علاماته

وشو اسوي..اطنشه؟؟

بنات لاتتوقعون اذا قلتولي انه يحبني راح اغير معاملتي معاه..بتم انا انا...ومابيتغير اي شي


ساعدوني الله يخليكم..حتى لو بكلمه وبدعاء..صار دايما يطلع باحلامي =(

وصرت اتضايق الحين من حركاته..عكس اول..مادري ليش =(