قصتي مع وسواس الموت - احتاج نوافذ من الامل والتفاؤل -

السلام عليكم لي تقريبا 3 شهور ابكتب لكم حالتي بالتفصيل بس كل يوم اقول إن شاء الله فتره وتروح - وبإذن الله انه فتره وتروح - بس اليوم قررت اكتب لكم انا الله يحفظكم خوافه من يوم كنت صغيره يعني اخاف من السرعه او مثلا بالبحر ومن المستشفى لكن قبل تقريبا سنه بعد وفاة احد الاشخاص الله يرحمه - مايقرب لنا بس نعرفه - يمكن بثلاث ايام تعبت كنت مادري ايش فيني احس بضيقه وكتمه وخوف وخفقان وبطني وبالليل ماانام الاقبل الفجر بدقايق وانام واقوم وانا خايفه وكانت نفسيتي مره موب زينه ونروح للمستشفى يقولون مافيك شيء ورحت عند شيخ يقرا علي كنت مااعرف ايش فيني انام عند امي من الخوف رحت لم دكتوره نفسيه وعطتني علاج وبديت اهدئ شوي بعدين حسيت اني بديت ارجع لطبيعتي استمريت على العلاج فتره ثم قالت لي خوذي جلسات واخذت يمكن 6 جلسات وياربي لك الحمد والشكر تحسنت كثير وعرفت ان اللي فيني كان وسواس الموت مرت الايام وكذا وتركت العلاج انا طلبت منها قلت ماودي اتعود عليه وكذا قبل 3 شهور مات اخو وحده اعرفها الله يرحمه للاسف رجع لي وسواس الموت وبقوه طول الفتره اللي راحت وانا بس افكر بالموت تخيلو حتى الرسايل بالواتس والبي بي ماارسل اخاف اقول يمكن ارسل واموت لما احد يقول لي كلام حلو اخاف اقول يمكن ابموت وانا اصلي بعض الاحيان او اقر قران يعني تفكير 24 ساعه اذا قالو بكره بنطلع او بعد شهر او زي كذا اقول مادري ابكون موجوده او لا شفت بتويتر تغريده عن انسان مات اتعب كثير كثير وبس افكر كيف ابموت ومتى وخايفه من الموت نفسه حتى بالمدرسه اناظر الناس البنات يضحكون وكذا عسى ربي يسعدهم اقول ودي اصير نفسهم يعني اضحك واستانس ولا افكرادري انه لازم نفكر بالموت وكذا بس معدل طبيعي يعني انا تفكيري بالموت حرمني من اشياء - ثالث ثانوي إن شاء الله ابتخرج وسوينا حمله عن التسامح يعني ندور ع المدرسه ونتسامح منهم والله ادور وانا خايفه اقول يمكن ابموت والبنات عادي وانا بس خايفه عندي بالتويتر حساب دعوي وكذا عجزت ادخله اقول يمكن ابموت والبنات يرسلون وينك ودي ارد بس عجزت والاسك بعد مادخلته كله من هالخوف واذا جتني رساله او اتصال احد ع اهلي اقول يارب خبر زين اخاف ع اهلي واحبابي بسم الله عليهم بس متوتره بيحزن وكذا بس موب طبيعي انه يبدأ يخاف ويوسوس وكذا اذا سمعت احد مات يجيني شعور غريب عجزت اوصفه ودي اغير فكره الموت عندي ويصير شيء عادي مااخاف منه خوف موب طبيعي وبعض الاحيان تجيني نغزات بالصدر اخاف اقول يمكن شيء وبعض الاحيان احس ابدوخ يعني بس احس كاني ابدوخ ودي استمتع بطلعاتي وسوالفي وضحكي ودي استمتع بيومي اهلي يدرون ان بعض الاحيان تجين صيقه وكذا وافكار بس بالتفصيل انه يجيني وسواس الموت لامايدرون يعني اختي تدري شوي بس موب بقوه ولااحد يقول قولي لهم لانه بيزود علي ادري اذا قلت لهم اببد افكر يمكن ابموت وكذا خليني اسكت واقول لناس مجربين يعني مثل بعض البنات اللي بالمنتدى
مع اني ياربي لك الحمد والشكر ملتزمه وهالحين باديه اقر البقره بس ماختمتها بيوم كامل والدعاء يعني 3 ايام وكذا عمري انا 18
ابي اللي مرت بحالتي كيف عالجتها وايش الاعراض وكم استمرت وكذا طمنوني الله يخليكم مع انه قريت عن بنات جاهم مثلي بس ابي ناس بعد تطمني واسفه جداً جداً اني اطلت عليكم وكثرت الكلام بس ودي افضفض ل احد وكل اللي بيردون علي وبيطمنوني وبيعطوني امل راح ادعي لهم بثلث الاخير وواقات الاستجابه بإذن الله
- انتظركم -