اذن أنت تحكي لاخوتك وليس لأطفالك ..

الحمد لله أن القصة أعجبتك .. كنت خائفة أن تريها سخيفة ..

في المرة القادمة سأحكي لك قصة الغول .. وهي طويلة قليلا .. لكنها كانت قصتي المفضلة عندما كنت صغيرة .. وكنت دائما أطلب أن تقص علي .. حتى حفظتها عن ظهر قلب .. وهي أول قصة تخطر على بالي عندما أفكر أن أحكي لابني شيئا .. لكنني أغير رأيي لعلمي بأن بها بعض الخرافات ..

كان ياما كان .. كان في 3 شقيقات قرر أبوهم يسافر .. فسأل كل وحدة اش تبغى يجبلها ..

قالت الكبيرة : أبغى ذهب .. وقالت الوسطى أبغى حلويات .. أما الصغيرة فقالت : أبغى دجاجة ..

سافر الأب وجاب لكل وحدة اللي تبغاه ..
طلبت البنت الصغيرة من أخواتها انهم يعطوها شوية من الذهب والحلويات فرفضوا وقالوا : ليش ما طلبت من أبويا ؟؟ تستاهلي .....:31:

صارت الدجاجة كل يوم تبيض بيضة .. تقوم البنت تطبخها وتاكلها لوحدها ..
وبعد أيام اشتهت أخواتها انهم ياكلوا بيض زيها فطلبوا منها .. قامت قالتلهم : أنا لمن طلبت منكم ما أعطيتوني .. عشان كدة ما راح أعطيكم ..

حقدت الأختين .. واستنوا الين راحت أختهم المدرسة .. قاموا أخدوا الدجاجة ورموها في بيت الغول ..

رجعت البنت الصغيرة وسارت تدور على دجاجتها .. ولمن ما لقيتها جلست تبكي ..

جووا أخواتها وقالولها احنا نعرف فين الدجاجة ..

فرحت البنت وقالتلهم : فينها ؟؟؟ قالوا ( الكذابين ) لما رحت المدرسة شفنها طارت ونزلت بيت الغول ..

رجعت البنت تبكي وتقول : كيف أروح بيت الغول .. بعدين ياكلني ..
قالوا أخواتها : احنا عندنا فكرة .. نربطك بحبل .. وننزلك بيت الغول .. ولما تاخدي الدجاجة تشدي الحبل مرتين نقوم نسحبك لفوق ..

وافقت البنت على طول .. وربطوها ونزلوها .. ولما أخدت الدجاجة .. شدت الحبل .. لكن أخواتها بدل ما يرفعوها رموا الحبل وقالوا : خليك ياكلك الغول عشنك ما رضيت تعطينا بيض ههههههههههه :23:

وتركوها وراحوا .. جلست البنت تبكي .. بعدين حست انها لازم تسوي شي .. طالعت في البيت لقته مكركب ووسخ .. والدنيا كلها فوضى .. قامت رتبته ونظفته .. وبعدين دخلت المطبخ .. لقته فاضي وما فيه أكل قامت ذبحت دجاجتها وطبختها مع الرز .. وفتحت الثلاجة ما لقت موية .. قامت عبت الجك من الزير وحطته في الثلاجة ..

وبعد ما خلصت دخلت في الزير وجلست تستنا ..

جا الغول واستغرب من نظافة البيت وريحته الحلوة .. كان جيعان مرة .. وشم ريحة الأكل .. دخل المطبخ وفرح مرة لما شاف الطبخة الشهية .. أكلها كلها وبعدين حس بالعطش .. فتح الثلاجة وأتفاجأ بالموية .. شربها كلها .. وبعدين جلس على الزير يفكر .. مين اللي سوى كل هادا ..

( هنا مقطع أتحفظ على ايراده .. أرجو المعذرة )

اتكلمت البنت وقالت :
السلام عليكم يا أبونا الغول ..

نط الغول من فوق الزير .. وقال : وعليكم السلام مين يتكلم ؟؟

خرجت البنت من الزير وقالت أنا ..

وحكته حكايتها .. وجلست تبكي وتقول :

أخواتي قالوا انك حتاكلني ..

حزن الغول عليها وقال :

لا تخافي .. أنا محا آكلك .. من اليوم انت زي بنتي .. تعيشي معايا وتجهزيلي كل شي وأنا حأعطيك سبعة مفاتيح لسبعة غرف .. كل غرفة في شي .. وكل الأشياء اللي جوات الغرف ملكك .. بس لا تفتحي الغرفة السابعة .. والا راح أزعل منك ..

أخدت البنت المفاتيح وسارت تفتح الغرف غرفة غرفة .. الأولى مليانه ذهب .. والثانية حلويات .. والثالثة فساتين .. والرابعة شنط .. والخامسة جزم ( أكرمكم الله ) .. والسادسة بكلات .. والسابعة ...................

فرحت البنت مرة بكل الأشياء .. بس وقفت عند الغرفة السابعة .. وما قدرت تستحمل انها ما تفتحها .. جلست تفكر وفي الأخير ........ فتحتها ..

لقت الغرفة فاااااااااااااااضية .. ما فيها غير طاقة صغييييييييييرة .. فتحت بنت الغول الطاقة .. قامت شافت نعامة السلطان ..

- سلام عليكم يا نعامة السلطان ..
- وعليك السلام يا بنت الغول .. ياللي أبوك يربيك ويربربك ويستدير عليك وياكلك ..
- أبويا يربيني ويربربني وعلى سيدك السلطان يجوزني .. ويجعل من ريشك فرشي ودمك نقشي ليلة عرسي ..

انقهرت النعامة وسارت تنتف ريشها ..

جا السلطان لقا نعامته منتف ريشها .. سار يسأل الخدم مين نتف ريش نعامتي ؟؟ ومحد عرف ..

جات البنت تاني يوم

- سلام عليكم يا نعامة السلطان ..
- وعليك السلام يا بنت الغول .. ياللي أبوك يربيك ويربربك ويستدير عليك وياكلك ..
- أبويا يربيني ويربربني وعلى سيدك السلطان يجوزني .. ويجعل من ريشك فرشي ودمك نقشي ليلة عرسي ..

انقهرت النعامة وسارت تنتف ريشها ..

جا السلطان لقا نعامته منتف ريشها مرة ثانية .. سار يسأل الخدم مين نتف ريش نعامتي ؟؟ ومحد عرف ..

قال : أنا لازم أعرف السر ..

ثالث يوم جات البنت :

- سلام عليكم يا نعامة السلطان ..
- وعليك السلام يا بنت الغول .. ياللي أبوك يربيك ويربربك ويستدير عليك وياكلك ..
- أبويا يربيني ويربربني وعلى سيدك السلطان يجوزني .. ويجعل من ريشك فرشي ودمك نقشي ليلة عرسي ..

انقهرت النعامة وسارت تنتف ريشها ..

وكان السلطان متخبي ورا شجرة وشاف البنت وعجبته ..

راح للغول وطلب يد البنت منه .. وافق الغول .. واتزوجت البنت من السلطان .. وخلفوا ولد ..

عرفوا أخواتها بالخبر .. قاموا أتنكروا وحدة في زي الكوافير ووحدة في زي الخدامة ..
وجوا لأختهم عشان يمشطوا شعرها .. وفجأة غرسوا دبوس في راسها ..

- أي .. اش هادا ..
- هادي فرشة الشعر ..

وساروا يغرسوا دبابيس في راسها وكل مرة يقولوا هادي الفرشة .. الليييييين اتعبا راسها كله دبابيس .. ولما حطوا آخر دبوس اتحولت اختهم حمامة وطارت ..

واتنكروا مرة تانية وحدة سوت نفسها مرت السلطان والتانية وصيفتها ..

أما الحمامة فراحت لطباخ السلطان ( أبو الفرج ) وصارت تغني :

- طباخنا يابو الفرج .. سيدي في ولا خرج
صغيري مين يربيه ؟؟ وفراشي مين يرقد عليه ؟؟

اتفجع الطباخ وصار يلخبط الأكل .. حط الشاي على الرز .. والعصير على اللحم .....
( اخترعي تخبيصات )

وودا الأكل للسلطان ........

- ييييييييييييع .. اش هادا يابو الفرج ؟؟
سكت الطباخ وما رد ..

( يتكرر مجيء الحمامة 3 مرات وتغني نفس الأغنية .. ويمزج الطباخ الطعام عشوائيا )

أستغرب السلطان .. وقرر يمر على الطباخ وهو بيطبخ .. ولما وصل لقا حمامة حلوة .. قام مسكها وسار يمسد على راسها .. وحصل دبوس قام خرج .. وبعدين أكتشف انه راسها مليان دبابيس .. قام سار يخرجها واحد واحد .. ولما خرج آخر دبوس .. اتحولت الحمامة الى زوجة السلطان .. وحكته اش صار ..

سجنت الأختين .. وعاشت بنت الغول حياة سعيدة مع زوجها وابنها .. وخلفوا صبيان وبنات ..

وتوتة توتة خلصت الحدوتة ..

( لقد أجهدت جدا .. أعتقد أن هذه آخر قصة أكتبها لك يا دونا )

:34:

لا لا لا لا لا لا لا لا لا لا لا لا لا لا لا لا لا لا لا لا لا لا لا
كذا تيمه تروحي وتخليني....
تيمه لقد استفدت من قصصك كثيرا ...ويؤلمني رحليك سريعا هكذا ....
عزيزتي يبدو أنك كنت طفلة أكثر من رائعة ...
أتمنى أتعودي ....تيمه
************************************
لعل هذا يجعلك تغيرين رأيك .........
لقد قصصت القصة على إخوتي..وكنت ألعب بأعصابهم ...
فعندما وصلت إلى
فرحت البنت مرة بكل الأشياء .. بس وقفت عند الغرفة السابعة .. وما قدرت تستحمل انها ما تفتحها .. جلست تفكر
قلت لهم حأكمل بكرة ما سابوني إلا لما كملت القصة إلى النهاية...
تيمه ألا تريدين أن تتذكري أحلى الأيام...
أيام الطفولة ...بقصصها الرائعة....
على كل أهم شي عندي راحتك ...
وتسلمي لي ...يكفيني أنك أول من رددت علي..
////////////////////////////////////////////////////////////////////////////////////////////////////////

أشكرك جدا على حماسك .. ولكن أخبريني .. هل راقت لهم القصة فعلا ؟؟
أتمنى أن تطلعيني على تعليقاتهم لو سمحت ..

وقد أحرجتني فعلا .. لذلك سأحاول أن أبحث لك في ذاكرتي عن بعض القصص ..

وبالنسبة لتذكر أحلى الأيام .. فلا يمكنك أن تتصوري مدى سعادتي وأنا أكتب لك القصة السابقة .. لقد بدوت لنفسي تلك الطفلة قديما ..

انتظريني .. في المرة القادمة .. فلدي قصة جميلة .. الى اللقاء

هنا موقع حلو فيه حكايات حلوه للأطفال....

طفشوك ...حكيهم حكاية...(دعاية):32:

للأطفال فقط