قصيت شعري وندمت / شكرا

السلام عليكم ورحمة الله
إذا ما تحبي تقري قصتي تنزلي هتلاقي استنتاجاتي وايش استخدمت مباشرة ً .




أنا زي كل بنت تحب شعرها الطويل من الطفولة و شعرها مساعدها تفتخر وتنبسط بيه ( شعري مو ناعم :) لكنه كيرلي بطبيعته وطويل
جاء العيد وحبيت اغير مع حالة اكتئاب كنت امر فيها وحابة اغير نفسي وبداية التغيير قررت تكون شعري اخذت صورة قصة شعر عجبتني للمشغل
وللاسف سامحها الله وماقدرت اسامحها بسهولة شالت نصه و درجته تدريج عادي جدا ( نفس سعاد عبد الله في شبابها :/
رغم أن الصورة مدرج بشكل غريب ع طوله بالضبط وكنت ناوية اصبغه والخ..... كله دمرته وتحسسسسسفت جداً وابويا لو عرف ما حيقبل ابدا فمريت أخذت لي ربطة شعر ..!
ربطة شعر صارت تلم شعري , شعري لأذني واطول شي لبداية رقبتي بعد ماكان لاخر ظهري ....
طبعا دخلت الموقع هنا وقريت كتير قصص تشبه حالتي هونو عليا الي صار ,لكن في الواقع كثير ناس قالو ما حيطول ووحدة مغربية في مشغل تعرفني قالت لي الشعر عندنا معروف يغضب ومعاد يطول حيوقف طوله وكثييييييييير كلام وتحسفات امي بالرايح والجاي و في المناسبات الكل بيتحسف عليه في وجهي.
ما أخفيكم مافرحت به ولا استمتعت به لاني خفت ما يطول كنت لامته على طول بس ورحت العطار واشتريت كل حاجة تخطر عبالكم




>>>>>>>>هنا تجربتي العملية, <<<<<




>> رحت عطار المرواني واشتريت كل ما يخطر عبالكم أعشاب ( اكليل جبل , هيل افريقي اعتقد , سدر , حناء , آس , ... وما افتكر ايش كمان
واشتريت زيت خروع لوز الاثنين مر وحلو جرجير . زيتون , حتى عافية , ... ناسيه والله ايش كمان بس مجموعة كبيرة
للامانه ما جربت زيت الحية أو الحشيش أو بول الجمل ودي الحاجات الغريبة
تابعت خبراء شعر وشعبيين وكثير حاجات
وطبعا زي كل بنت في زمنا دا ما غاب عن بالي تكون عين تسببت لي فكنت اقرأ ايات العين والرقية بنفسي على كل زيوتي وانفث عليها بنفسي لما تخلص الكية اجيب ونفس الطريقة
ومن الصيدليه فشكول و مجموعة الترا دوكس من قارنيه بزبدة الشيا شامبو , بديل زيت و سيرم للشعر
لما مرة من المرات قريت لوحدة من الجنسية المصرية الله يجزاها الجنة كتبت عن زيوت عبد الصمد القرشي وانها مرتاحة عليها فرحت أخذتها كمان و زميلتي قالت لي انهم يطلبو زيت الارقان او الارغان المغربي علبة صغيرة 180 وطبعا طلبت
مرررررررة كتييير وذحين حسيت فيه وانا أكتب المهم دا الي سويته واعطيت شعري سنتين ونص يرجع لطوله ويقولو لما تقيسيه ما يطول بس صراحة كنت اقيسه ع طول
ملخصا بعد دي التجارب انصح الي صار لها زيي وحابة تطول شعرها تستفيد من ملخص قصتي
# شعري جدا ارتاح على الزيوت وفادتني لكن جهد كبير حوسة أكبر وريحة وغلبة #
1 )- زيوت عبد الصمد القرشي ممتازة أستخدمت المطول الاحمر والاخضر ضد التساقط والاسود بعدهم جربته لانو عندي ثقة فيهم
2)- السدر منظف للشعر ويشيل اي حساسيه او مشاكل تصير معايا فيه بس يخشن فما تستخدميه زي الحنة ابدا احطه في علبة مويه مع زيت زيتون ويعتبر مويه اكثر ارجها واحطه ما يطول ع الشعر لا هوا ولا الزيوت عن ساعتين عشان ما يضروكي
3)- زيت دابر املا الاصلي
4)- زيت الاغان الاصلي ولو تخليه ليله كامله واحيانا اخليه اكثر لانو خفيف ع الشعر جدا
5)- ارتحت ع شامبو الترا دوكس بزبدة الشيا مع بديل الزيت من نفس الشركة
6)- زيت جوز الهند مررررررة ممتاز بس ريحته مشكلة اشتريت خمرية للشعر وقت استخدمته
اقري المعوذات ولو حبيتي زيوت الرقيه ع زيوتك مع النفث بنفسك
وقبلها كلها اتكلي على الله و هو الوحيد الي يعلم مافي نفسك ويقدر يبلغك غاياتك كلها بذل اسباب بس الاتكال على ربنا
استمتعي بشعرك الحالي وحاولي تنبسطي بيه .
على العموم كانت تجربة مفيدة لي حسيت بالالتزام بشيء لقيت ميزاتي وجمالي في حاجات كثيرة بعيدا عن شعري وبس الحياة تجارب
والشعر و الا ظافر اشياء تطول مع الوقت