كوسا وباذنجان محشي بصلصة الثوم والنعناع(طريقه شاميه)

السلام عليكم ورحمة الله وبركاته...
حابه اقدم لكم هالطبق اهو وايد لذيذ وكان غدانا اليوم بس ما احط مقادير تقديري والي متعوده تسوي محشي ما راح يفرق معاها وانا جديده بالمنتدى ماعرف انزل صور والا لو عرف من عيوني.
طبعا اول شي تزهبين الكوسا والباذنجان النوع الي يصلح للمحشي باذنجان اسود ضعيف وطوال موجود بالخضارين وينظف ويحفرويغسل بالماء والملح ويترك بشكل مقلوب بمصفاة حتى ينزل الماي لتحضير الحشوة.
نحتاج للحشوة لحم مفروم + عيش يعني رزمغسول يخلطون مع بعض وتقدر الكميه المناسبه بحيث يتساوى المقدارين مو شي اكثر من شي. نضيفله فلفل اسود ناعم+قرفه دارسين مطحون+ملح+قطعة زبده تسيح وتصب فوق الحشوة يخلط الجميع وتحشى حبات الكوسا والباذنجان على الراحه لا تضغطين عالحشوة وكل حبة تحشى الي النص لا تملينها حشوة الى انتهاء المقدار .
تصفين الحبات في جدر كافي بشكل دائري وتضعين فوقهم طبق وفوقه ثقل لكن مو ثقيل حيل حتى لا تتكسر الكوسا.تحضرين في وعاء ماء مضافله معجون طماط وتحركين بحيث تكون مو خفيفه لا ثقيله وتصب فوق الكوسا والباذنجان وتملح ويرش قليل من القرفه ولطعم الذ اضيفي قليل من عصير الطماط اتركيه يغلي ولا تغطينه ابدا لمدة تقريبا ساعه .
النهايه في مقلاة تقلين بقليل من الزيت اوالزبدة كميه من الثوم تكون كثيرة الذ ويقلى ونضيفله النعناع الناشف الى ان يتحمر شوي واصبه فوق الكوسا واتركه 5 دقايق واسكر النار .
وتاكلونه بالعافيه واسفه عالاطاله وعالاسلوب بس ملاحظه بس تسكرين النار على طول عزلي الصلصه عن الكوسا لان اذا ظل راح يتفكك وتطلع الحشوة وشكرا وعلموني بالنتايج واذا في استفسار انا حاضرة وممنونه.:)