كيف تعرف الزوجه أن زوجها يدخن؟!

السلام عليكم ...

حبيت استشيركم في موضوع تدخين الزوج..

أنا مالجه (عقد قران) وباقي على العرس شهر وشوي.. زوجي ما شفت منه هالفتره إلا كل خير.. وسمعته وأخلاقه زينه وأهلي وايد مرتاحين منه..

المهم اشترطت عند قبول زوجي انه ما يكون مدخن وأكدولي وهو أكد انه ترك التدخين من سنتين.. وعلى هالأساس قبلت

لكن.... من شهر ركب أخوي الصغير وياه السياره وقاللي ان ريحتها كلها دخااان!!! وأنا انصدمت!!!!!!! لأني كنت متأكده انه ترك هالشي ولو كنت اعرف انه ما تركها ما كنت قبلت فيه...

استشرت أخوي الكبير وقاللي أصارحه واسأله.. بس مب عارفه كيف اسأله وخصوصاً انه كم مره يكلمني وأثناء المكالمه يمر واحد يدخن عنده ويقعد يتأفف ويحش فيه وفي المدخنين.. يعني يعبرلي عن انزعاجه من المدخنين.. بس أنا بعدني شاكه..

إن طلع صدق يدخن.. فالمشكله مب بس تدخينه.. المشكله انه بيكون كذب على أبوي واخواني كذبه كبيره بأنه ترك التدخين وهو ما ترك.. لأني لو كنت اعرف ما كنت وافقت..

أخوي قاللي أتخذ القرار بروحي وأفكر عدل.. ما بقى عالعرس إلا شوي.. وأنا محتاره.. أخاف اسأله مباشره ويكون سؤالي جارح إن كان ما يدخن... وأخاف يكذب علي..

بشو تنصحوني؟؟ ويزاكم الله كل خير