لا أحد يقول أسم أمي ولا أختي ..

..

السلام عليكم ورحمة الله وبركاته

هلا بنات وش أخباركم
وش علومكم .. عساكم بخير
مبارك عليكم دخلوا الخريف >> متابعة الأحوال الجوية زين..
بعد أنا ذهبت القواليل ولهب الصيف .. عاد تدرون ليش باركت لكم بدخلوا الخريف .. لأني أعرف أنكم تحزبونا ما برحنا في الصيف مثل حالتي أول أحزب كلش صيف وكلش شتاء ؟؟!!
عاد إلي فوق تمهيد للموضوع بعد شوي بدخل في المقدمة للموضوع موضوي يتكون من
تمهيد
مقدمة
الموضوع الأساسي
خاتمة
لاتلموني على ذا الطريقة .. كله من ذا الدكتور حقنا كل ماجيت أزين له بحث ونسيت فقرة من هذا الفقرات نقصني دراجات .. عاد أهو أهم شيء عنده البحث راسبة أو ناجحة .. عشان كذا تبرمج عقلي على ذا الطريقة ؟؟!!

المقدمة
ولد جيرانا يوم دخل المدرسة في أول يوم له كان ساكت ولا يتكلم أبد يحاولون معه المدرسين يبونه بنطق لو كلمة وحدة ولا كلمة تكلمها .. فكروا المدرسين بحلّ قام واحد منهم قال بسأله عن أسم أمه أهو عنده أعز من أمه أكيد بقولها ..
قال ميده يا شاطر .. وش أسم أمك ؟؟
تدرون وش قال

تدرون ودي أمط الموضوع مط(ن) مثل بعض البنات
بس بقول ما أصبر
قال أسم أمي ( لمبـــــــــــــــــــــــة )
سكت دهراً ونطق عجباً ..
المدرسين ماتوا من الضحك عليه
هذا كله عشان مايقول أسم أمه الحقيقي ؟؟

بعد موقف ثاني
كان أولاد المدرسة يتطاقون كا العادة طبعاً .. كان معهم وليد ضعيف ماله حيلة أبد .. جاء جمع غفير من أولاد المدرسة يتزعمهم قائد يردون أن يهلكوه ضرباً .. فلمّا بدأوا بالأنقظاظ عليه فكر في حيلة تخلصه من هذا المأزق .. فكر وفكر .. قال أيه وجدتها .. مافيه غيرها ؟؟!!
قال لزعيمهم أو قائدهم ؟؟
أن ضربتني فسوف أخبر الأولاد عن أسم أمك وأسم أختك .
طلعت عيون القائد محمرة قال خلاص مانيب طاقك >> ما تلاحظوا العامية تدخل على العربية ؟؟!!
بس تكفى لا تقول أسم أمي ولا أختي
يهوه داهية ذا الوليد عرف كيف يتخلص منهم

أرأيتم كيف أن ذكر أسم أمه أو أخته يشكل رعباً بالنسبة له ..
على فكرة القصة حقيقة بس فربكتها من رأسي للأمانة .


ندخل في
الموضوع الأساسي ..
أنا محدثتكم في هذا الصيف وصلتني أوراق للمشاركة في المسابقة الصيفية لهذا العام .. فقلت ليش ما أشارك دام أنّي فاضية وعندي الكتب للأجابة على الأسئلة .. وجلست أكرف في حلّ هذه الأسئلة .. من سؤال إلى سؤال .. قلت منها أتثقف منها أفوز مع أنّي ما توقعت أفوز لو وحد بالمية >> أجل ليش مشاركة !!
وأرسلت الإجابات
جاء اليوم الموعد وهو يوم توزيع الجوائز .. والله أني ناسية هذا اليوم من زود أني ماكنت أتوقع أني أفوز
حضر الجمع وأخذوا في ذكر أسماء الفائزين .. كان من بين الفائزين أنا وذكر أسمي .. وللأسف كان أصدقاء أخوي حاضرين هذا اليوم .. هؤلاء الملاقيف ذهبوا إلى أخي وقالوله أنكم فزتوا ..
أتصلت أحدا صديقاتي : قالت مبروك فزتي .
قلت: هاه في إستغراب .
قلت لها الله يبارك فيك .>> إلي يشوفني يجزبني فزت بمليون .
جاء أخوي.. من الفرح قلت له رح جب الجائزة تراني فزت >> على نياتها .
قال الله يفشلك فشلتني عند الناس ..
قعدت أهوجس في نفسي وش أني مسويه ؟؟
ومن الذكاء إلي فيني فهمت أن الأخ متفشل من أسمي
قال المفروض الحريم ما يقلون أسميهم عند الرجاجيل .. يحطونهم في مكان ثاني..
أنا محمقة قلت أنتم يالرجاجيل عندكم عنصرية وجاهلية بغيضة >> كبرة الموضوع
رد علي أخوي مثل الصاروخ : لا هذي مهب جاهلية هذي غيرة
قمت أفر رأسي أفكر كيف أرد عليه
أيه قلت
زوجة الرسول عائشة وبنت فاطمة ذكر أسمهم الرسول صلى الله عليه وسلم ما قال غيرة وإلى يفشلوني >> أخس عرفت أرد عليه .
قال : أنتي عاد مثل عائشة أو فاطمة .
قلت له : أنا لو أجلس لين السنة الجاية مستحيل تستوعب .
وقمت من المجلس .. وطبعاً خسرت الجائزة .

أخوي أصغر منّي عشان كذا تجرأت عليه

الخاتمة
إذا عندكم ومواقف مثل هذي المواقف قلوها .. عشان نوسع صدورنا قبل ماتجيء الدراسة
شكلي نكدت عليكم
أجل قبل لا تخلص العطلة
بعد نكدت عليكم
أقول أنطم أحسن
المهم قولوا مواقف ..
بعد عندي سؤال :
هل أنتم من المؤيدين لمثل هذه الظاهرة أولا ؟؟
يعني الواحد يستحي من ذكر أمه أو أخته أو زوجته ..
أدري أني ثقيلت دم بس وش أسوي ربّي خلقني كذا ..
عاد لا تفشلوني مثل أخوي شاركوا في الموضوع على الأقل أحس أني سويت شيء بعد ما خسرت الجائزة >> أهو ماذبح قلبها إلا الجائزة .
سلامتكم .. أختكم نورة نت :23::23:.