ما اتحمل احد يطالع وجهي !!

السلام عليكم

مشكلتي اني ماني قادرة أعيش حياتي ، الخجل محطمني و السبب هو شكلي أو تقاطيع وجهي ، خشمي كبير و فكي الأسفل صغير و مرتد للخلف ..
كمان وجهي يوحي بالغباء و السذاجة و العصبية و القشرة و هذا يبعد الناس عني و ينفرهم مني ..
في مراهقتي تعذبت و كرهت دنيتي كنت في المدرسة انطوائية ما اكلم أحد و لا أحد يكلمني ، كنت أخاف أحد يطالع وجهي أرتجف و أحس بخفقان وراء عظمة القص و تعرق و دوار في الراس و ما ارتاح لين اكون لوحدي محد يطالعني ..
كثير كانوا يستهزئون بي و من الأقارب كمان للأسف ..
معد اقدر اتحمل تعبت كثير ، الحين تطورت حالتي لدرجة اني ماني قادرة حتى أشوف احد ، انعزلت عن الناس كلهم حتى في المناسبات المهمة زي العيد و غيرها ..
حتى طبيب الاسنان ماني قادرة أروحله و لا طبيب الباطنية و لا طبيب الأنف و الاذن و الحنجرة مع اني احتاجهم أحيانا ، أصبر على الألم و آخذ مسكنات و لا أروح الطبيب لأني أخاف و أتوتر لما احد يطالعني ..
يمكن تفكرون مشكلتي تافهة أو اني أبالغ لكن ما اقول غير اللي يده في النار مو مثل اللي يده في الماء ..
رحت لأخصائية نفسية و ما استفدت ..
كلمتني بسطحية شديدة بعدين عطتني دواء للرهاب الاجتماعي ، داومت عليه و ما جاب نتيجة

دايما أقرأ في مواضيع الخجل يقولون أول خطوة حدد السبب ، و أنا حددته هو في مظهري في وجهي تحديدا .. هو اللي مسبب لي كل هذا التعب ..

رجاء لا تقولون الجمال جمال الروح و مدري ايش ، يا أخواتي صدقوني أعرف انه الجمال جمال الروح و أنا لو اشوف بنت حلوة و بعدين اخلاقها سيئة تطيح من عيني لكن مو هذا اللي اقصده هنا
انا ما ابغى اكون جميلة ، ابغى بس شكلي يكون عادي ما ابغى الناس تبحلق في أو تستهزىء بي و تعلق علي ..

قولوا لي وش اسوي ، اسوي عملية تجميل ؟

تعبانة بشكل محد يقدر يتصوره ، نفسي أغمض عين و أفتح عين ألاقي مشكلتي انحلت ، احيانا احس كاني في كابوس بمجرد ما أصحى من النوم راح تختفي المشكلة و يرجع وجهي لطبيعته

اللي خلاني أكتب لكم بعد ما قطعت الأمل هو ان اختي راح تتزوج بعد شهرين ، و الوالدة تبي تفرح و ما تبي شي ينغص عليها فرحتها ، فكان لازم احضر الزواج تعرفون كلام الناس اللي ما يرحم لو اني ما حضرت فرح اختي ، مع اني ما يهمني كلامهم بس الوالدة يهمها ، عشان كذا رايح اغصب على نفسي و احضر مع اني تعبانة من مشكلتي و ما عندي صديقات و صاحبات ابدا يعني راح اتفشل في الزواج ، انا عن نفسي ما ابغى اروح بس عشان خاطر الوالدة ..

الحين المفروض اني اروح معها للسوق و اشتري قماش و بعدين اروح للخياطة ، تصدقون اني ماني قادرة اروح للخياطة .. أخاف أدخل وسط الحريم و اوقف عشان الخياطة تاخذ مقاساتي مع اني جسمي حلو و لله الحمد بس هي مشكلة وجهي هي اللي متعبتني و مسببة لي احراج فظيع

سامحوني على الاطالة
و ما أستغني عن آرائكم و تعليقاتكم

و شكرا جزيلا