شوفي ياقلبي ....انا هاذي الطريقة معتمدتها من سنيين وانا موظفة وماشاء الله تبارك الله ماعندي شغاله..اللي هي طريقة الكشنه وطعمها مايخرب ابدا في الفريزر بالعكس والله يطلع منها رز يجيب العافيه ماتشبعين منه .. طبعا خليها تبرد بعد التسبيك بعدين دخليها الفريزر انا احط قد ملعقتين غرف كبار في كل كيس..

تجين من الدوام تخرجينها من الفريزر علي طول وتحطين الدجاجة معها في القدر وشويه موية وتطبخينها الين ماتستوي اذا تبغين تضيفين هيل ومسمار وقرفه عشان الرز انتي ماحطيتيه في الكشنه عشان تقدرين تستخدمينها في طبخات ثانية عبال ماتستوي الدجاجة غسلي الرز ونقعيه شوي بعدين شيلي الدجاجة وحمريها في الفرن وحطي الرز وقللي المويه يادوب تغطي الرز وفي الضغط ..

علي فكرة انصحك تاخذي باميه علي الزيرو مكتوب عليها كذا تجي مجمدة في السوبر ماركت لانها جاهزة علي طول تطبخينها وكمان ملوخية مونتانا .عن تجربه

كمان السلطات بصراحه لما مايكون عندي وقت اكتفي احط مخللات شكلين علي السفرة تعجب زوجي بدل السلطة مع الرز مثلا مخلل خيار ومخلل هندي مشكل كله جاهز من بنده..

واذا تقدري تقنعي زوجك انكم علي طول تناموا واذا صحيتي تقومي تطبخي علي المغرب مثلا يصير غدا بعشا في نفس الوقت لان الطريقة هاذي قعدنا عليها فترة وناسبتنا مرة ..

موفقه..الله يكون بعونك

ما شاء الله البنات ما قصروا

وعندي لك طريقة اكل كفتة وخضار مشوية بكيس الفرن نص ساعة وهي مستوية والرز يطبخ فوق نص ساعة يعني غدا بنص ساعة انا الطريقة اسويها لما ابغى اسوي غدا سريع وشهي
وطبعا الخضار قطعيها وتبليها قبل بفترة والكفته بعد جهزيها قبل
ومثلها الكرونة باللحم المفروم البولنيز

هلا اختي غلا الروح بالنسبه لقدر الضغط سهل جدا استخدامه انا عندي اثنين تيفال ونوع اسمه سفلر او زي كذا بس مرتاحه على تيفال مره ممتاز وسهل التعامل معه عادي الدجاجه بعد ماتحطينها على الكشنه حطي المويه وسكري عليها ولفي المؤشر على صورة الدجاجه ربع ساعه تقريبا واللحم ياخذ وقت اطول تقريبا نصف ساعه بعدين كبي الرز وماياخذ وقت ولاتكثرين الماء لان قدر الضغط مايحتاج مويه كثير بينخبص الرز لو زادت المويه وتقدرين تسلقين الدجاجه في مويه وملح وماجي ابيض وبعد ماتنضج ارفعيها في صينية الفرن وحطي على وجهها خلطه مكونه من مايونيز وكاتشب وثوم ادهني الدجاجه وحمريها في الفرن وحطي على مرقة الدجاج كيس من ملوخية السنبله او مونتانا وبعد ماتطبخ اضيفي لها ثوم مفروم ومحموس مع كزبره وسوي معها رز ابيض وسلطه وممكن يوم تسوين مضغوط دجاج او لحم وممكن يوم تسوين برياني شوفي مواضيعي فيه طريقتي في البرياني سهله وسريعه ويوم سوي كبسة خضار ويوم رز ابيض وصينية دجاج وخضار في الفرن عطيتك خمس خيارات ان شاء الله تعجبك ولاتنسين اهم شي عند النوم سبحي الله 33 واحمدي الله 33 وكبري الله 34 وصدقيني بيتنظم وقت وبيخلص شغلك بسهوله وهذي وصية الرسول صلى الله عليبه وسلم لابنته فاطمه عندما ارادت خادم

مناية 21 ..
مشكورة يا قلبي وضحت الرؤية وبصراحه تشجيعكم لي حمسسسسسسسسسني جدا وان شاء الله راح اطبق عملي اللي قلتوه .. بس ما عليه خذيني على قد عقلي ولا تضحكين علي لان الكشنة اللي تقولون عنها احنا نسميها غير ... فبقولج طريقتها وقولي لي هاذي هي لو لا ؟
نفرم البصل او نقطعه شرايح ونحمسه اشويه لما يتغير لونه ونضيف له الفلفل البارد الاخضر ونقلبه لما يذبل ونضيف له الطماطم المقطعه ونقلب بعدها البزار والبهارات والملح .. صح هاذي الكشنة لان احنا نسميها الحمسه .. والبامية شاريه منها .. وفعلا اريح من الطازجه ..
واما فكرة النوم وبعدها نتعشى فمستحيلة على ابو الشباب هههههه ما يقدر يتحمل الجوع وانا بعد حامل ومو زين اجوع نفسي فترات طويلة .. والمخلل فكرته حلوة كنت ناسيتها لانها مرة سببت اسهال لابني وقطعناها فترة بس برجع اخلي منها .. جزاك الله خيرا ووفقك ما شاء الله عليك عيني عليك باردة راعية بيت سنعه وافكارك روووعه .. شكرا جزيلا ..


ينابيع الفجر ..
ممكن طريقة الكفته اذا ما عليك امر لاني ساعات احب اسويها بشوف نفس طريقتك لو انتي اسرع .. ومشكورة اختي على اقتراحاتك جزاك الله خيرا ..

حجابي عفافي ..
احيي فيك اختي روح المبادرة في مساعدة اخواتك والله اني سعيدة بردودكم لي واقتراحاتكم اللي ما حصلتها من القريب .. لكن ربي ان شاء الله يوفقكم ويرزقكم على قد نياتكم .. اختي بالنسبة للكشنة انا كتبت فوق طريقتها اللي اعرفها فياريت تشوفيها اذا هي لو لا ؟ لان احنا نسميها غير .. وبالنسبة لاقتراحاتك فأغلبها ياز لي وان شاء الله اجرب البعض منه .. وعاد اذا بغيت طريقة من الطرق ممكن اطرش لك عالخاص اسألك لاني من زماااااان لي فترة ما طبخت ونسيت بعض الاشياء .. وطريقة التسبيح والتكبير والحمد مجربة فعلا مفيدة جزاك الله خيرا اختي الكريمة .. وبارك الله فيك ..

هلا اختي بالنسبه للكشنه تقريبا هي نفس طريقتك الا اني ما اضيف لها فلفل اخضر لان بعض الاكلات ما اضيف لها فلفل اخضر يعني بس اقطع كمية بصل واحمسه بعدين اضيف عليه كمية طماط مطحون وصلصه واخليه يتسبك واضيف الملح والفلفل الاسود والبهارات وبعد ماتبرد اعبيها في اكياس صغيره على قد كل طبخه وادخلها الفريزر واذا احتجتها بس اطلعها وعلى القدر يعني مايحتاج حمس وحوسه وعلى طول اضيفي لها الدجاج او اللحم حسب طبختك
انا جربت هالطريقه في رمضان كانت تساعد كثير وتقدرين حتى تسوين صلصة البيتزا ونفس الشي على الفريزر واذا احتجتيها تكون جاهزه بس تذوبينها
ومشكوره على دعواتك الحلوه الله يسعدك ويوفقك