متزوجة عندك عيال ؟ :) طيب تتمنين لو كنتي موظفة ؟؟

مرحبا جميعا ً


أنا موظفة من سنين وراتبي كويس الحمدلله ووظيفة حكومية ، لكن دوامي طويل ، و حامل حاليا ً ، و تجيني أفكار و وساوس اني اترك الوظيفة !! و أستقيل


أفكر بالمولود و كذا ، أدري فيه حلول لكل شيء ، بس أحس الجلوس بالبيت أريح ، و أصبر سنتين و أحاول أخلف غيره بإذن الله


بس محد يؤيدني ، خصوصاً اني لو حبيت أرجع للعمل بعد مثلاً ست أو سبع سنوات بيكون مستحيل ، و محد بيرغب يوظفني بعمري ، وتروح علي سنوات الخبره الي تعبت بتحصيلها


والصراحة أنا ما احب قعدة البيت ، و أخاف اضطر أقبل بأي وظيفة ، ووقتها مارح ألقى الا مدارس أهلية


والموظفة تفقد أشياء كثيرة لو استقالت ، تفقد استقلالها المالي ، ودخلها المستقل، بس أشوف ربات البيوت يا بنات ماشاءالله تصير قنوعة ، ومصاريفها قليلة ، و أحس ربة البيت ما تحتاج مبلغ كبير كل شهر مثل الموظفة ، صح كلامي يا ربات البيوت ولا لأ ؟


حتى ربات البيوت الي أعرفهم ، رجالهم يصرفون عليهم وما أحسهم يفتقدون شيء إلا يمكن الشغالة إذا كان الزوج ضعيف مادياً و يمكن السفر ما يقدرون يسافرون كثير


أما الموظفة احتمال تساعد في السفريات + تساعد بمصاريف الشغالة


مدري أصلاً احترت أوجه سؤالي لمين


أبي رأي موظفات لكن شرط دوامهم طويل مثلي ، مابي معلمات لأن المعلمة غالباً 1 الظهر هي ببيتها


وأبي رأي ربات بيوت بس جامعيات، أو تركو وظايفهم ، هل تتمنين تتوظفين ؟ هل تركتي وظيفتك و ندمتي ؟ هل لما كبرو عيالك تحسين بملل ؟


أشوف الزميلات كلهم عندهم عيال ، سواء متزوجات أو مطلقات ، لكن ماشاءالله احسهم يتعبون ، صح يرتاحون كل ويكند و بالعطل ( إجازات الأعياد + إجازات من رصيدهم + الاضطراري + الوطني ) لكن بوسط الأسبوع تعب


حبيت أشوف آراءكم قبل ما أندم :)