اهلين يا بنات

شو هالغنية يا ساجدة والله بتطقق من الضحك بس من وين النغمة

يمكن هي غنية جديدة بس أنا ما شفتها ولا مرة

على فكرة يا بنات أنا صايرة عم اتعب بالصيام كتييييييييييييييير يعني عم موت من الجوع والنعس وحططان البدن
ولما بيجي وقت الفطور باكل شوي وراحت معي لتاني يوم خلص
دخلكم انتو هيك ولا بس انا

هيلين الله يقويك يا رب والله العزايم بتهد الحيل

شو رأيك بصينية شيش طاووق معها هالمخلل والمايونيز بقى سيدي أو ممكن تعمليه سندويشات بصحن مرتب وفوقه حلقات البندورة والخس والتبولة بجنبه

يميميميم شهيتكم مهيك

اليوم انا عاملة شيش طاووق معه تبولة وفول مدمس وعاملة مايونيز أصلي بيا لطيف شو طيب بس مساواته صعبة وبتلبك وبتمشي الدنيا

ايه

شو بدي قلك يا عروستنا

ابقى عطينا آخر اخبار المشاريع سواء فيلات مصايف أو سكن

اتصلنا بالموضوع اللي حطيتيه وقالوا انو سكروا التسجيل والتسليم بعد سنتين

يعني راح علينا

الله يوفقك ويجزيك الخير

شاي ومزاج ميت اهلين

والله باين عليك صاحبة مراق

الله يهدي بالك ويفتح عليك ويلهمك الخير

فتاة حال الولاد من بعضه والله هديك اليوم رح ابكي من كتر الأوضة مو كلها غراض على الأرض يعني حتى الألم والمحاية والشنتة والمخدات ما بيقدروا يعدوا على الصوفاية

الله يهديهم هالجيل

هنودة ..ميت اهلين والله

بطة ... الله يقومك بالسلامة يا رب

طيب لو ولدت بتركيا ما فيك تنزلي ابنك على جوازك
انا هيك عملت ضفته على جوازي بالسفارة السورية كمرافق وخلصت السيرة

والله يخترلك الخير والحكمة وتقومي مجبورة الخاطر

دانية سلامة ابنك يا رب الله يحميه ويسلمه

لوليا شو اخبارك يا حلوة

نور الدرب طلي علينا

لاتنسوني من دعاؤكم

تسلمي هيلين عيونك القمر يا أحلى قمر ,,, والله اشتقتلك كتير يا حلوة ,,,
أنا موجودة بس ما شاء الله البنات كتير متنشطين ،، ما عدت لحقت أقرأ الردود وبدي أعرف كل شي البيضة من باضها والجاجة مين جاجا قبل ما رد على الكل بس لهلأ ما عم يصحلي :)
ويسلمو كتييييييييييييييييييييييييييييييييييييييير على السوكسيه ورح جربها ,,,

هيك صار ما فيني رد على الكل عن جد ,,,

المزة
ألف الحمد لله ع سلامتك يا رب وإن شاء الله أجر وعافية وعن جد استفقدنالك كتير

ست الحسن
مية أهلين فيكي نورتينا كتير فرحت بمشاركتك وخليكي دائما معنا ,,,

الملكة الباكية
وأخيرا طليتي علينا ،، من زمان يا بنات بعتلها عن موضوعنا ،، والله يخترلك الخير وكتير فرحت برجعتك وادعيلنا كلنا,,

شاي ومزاج
مية أهلين فيكي بجد شكلك بتعرفينا وحدة وحدة ،، هاتي لشوف ما عرفنا شي عنك لسة ,,, الله يهدي سرك

عروس الشام ,,, أحلى مايا
لك والله كتير لابقلك هالاسم من غير ما شوفك ،،، وشهيتني اعمل الستروجانوف يمكن بكرى بس طريقتي غير آخدتها من كتاب المطاحن الكويتية إذا بتعرفيه ,,, وع فكرة أنا اسمي نور وكلكن بتعرفو :)

ساجدة
تئبشيني شو دماتك خفاف جد فرطت من الضحك على المسجات وعلى غنية نانسي عجرم تبع شاطر كمان واصلتني ع الإيميل شو ضحكت عليها كنت بدي ابعتها لزوجي بس خفت ينيشنني هههههههههه، وبالنسبة للطبخ طابخة ملوخية خضرا ورز بشعيرية وشوربة جزر ومنيح كتير مني والله ما عم اقدر اعمل شي بالبيت

نايس سميل
لك وينك يا قمر اشتقنالك ،، جد رائع هالموقع رائع بكل معنى الكلمة الله يجزيك الخير

آية وهنودة ولوليا وبطة وشام وفتاة ودانية ,,, انتو بالبال ورح رد عليكن بعد ما أفطر لأني ما عدت شفت طريقي ،،، واللي سقط اسمه سهوا لا يزعل قايمة حضر الفطور ،،،

شام عم اكتب معك جربت المايونيز وما ضبط معي جد اكتبيلنا طريقته بالتفصيل الممل يا حلوة ،،، شهيتيني على الأكلات ميتة من الجوووووووووووووووع

صباح الخير.. شو هالهمة :) الله يديمها علينا..
أنا بعد ما اتسحرت مع جوزي و صليت الفجر قلت لحالي لقوم ساوي البيت اسمه ابني نايم و خلص فقست نومتي متل العادة ما بعرف نام بعد ما صلي الفجر إلا للساعة 6.. طبعاً عنا الفجر بيأذن على ال 4 الصبح..
المهم, قمت شغلت هالغسالة و ساويت الحمام و مسحت القعدة و ضبيتها.. صفيان المطبخ أعمله جولة سريعة و هلأ عم اتسلى شوي لبين ما تخلص الغسالة لانشر الغسيل.. هيك أحسن لأنه عم انعجق بالنهار و ابني ما بيفيق لآذان الظهر و جوزي بيرجع على ال3 العصر.. فبنام على راحتي و بيتي نظيف..

شام.. أكيد وقفوا التسجيل بقرية الشيخ زايد.. احزري ليش؟؟ لأنه اسعارهم روعة.. يعني الفيلا كلها على بعضها بتكلف 3 مليون, 4 مليون... على حسب المساحة.. بس بتستلميها على العظم.. و في كذا مشروع هيك كمان أسعارهم حلوة و خالص فيهم التسجيل.. بس اذا بدك تشتري فيهم جيبي جريدة الوسيط أو الوسيلة.. موقعهم على النت اذا بدك أعطيكي ياه.. و شوفي كتير عالم بدهم يبيعوا أرقام اكتتابهم بربح بين 800000 و المليون.. و كل ما قرب تسليم المشروع كل ما الناس زادت من الربح يللي بيطلبوه..
في عندك جمعية الولاء بدمر.. كذا بناية بجزيرة 11... و أسعارهم معقولة.. اذا بتلاقي حدا يبيعك رقم اكتتاب ما تقصري لأن دمر صارت و تصورت..
و عندك جمعية درة الشام.. كمان عندهم فلل و خالص الاكتتاب بس في ناس بتبيع أرقام اكتتابها..
اعملي بحث بالنت على اسماء الجمعيات هي و شوفي المساحات و التصميم و الموقع.. و شوفي شو بيعجبك و روحي دوري على حدا بدو يبيع رقم اكتتابه..
هلأ قرية الشيخ زايد صعب تلاقي بالمرحلة الأولى يللي حتتسلم بشباط.. بس ممكن تلاقي من المرحلة الثانية و الثالثة..
و لساتني عم اسئل على دوحة ستي و ان شاء الله اذا بلاقي أخبار بقلكم..
و ليش هيك عم تتعبي بالصيام؟ شو الهيئة ما عم تتسحري.. على الأقل تفاحة و موزة و كاسة عصير قبل الفجر.. و الله بتقيتك.. أنو أحياناً ما بيكون الي مزاج آكل عالسحور, فبقضيها فواكه خصوصي التفاح بينفخ..

فتاة, أنا خايفة يطلع ابني متل ابنك لأن جوزي متل جوزك :) بيستتقل يعلق جاكيت البدلة بس يرجع من الشغل.. و لو شو ما بده بيندهلي.. صار ابني هلأ اذا قاعد عم يتفرج على التلفزيون و لعبته شوي بعيدة عنه ما بيقوم يجيبها, بيناديني لأعطيه ياها!! بلش يتعلم من أبوه.. بس ما عم اسكتله.. كل ما يعمل هيك بياكل بهدلة و بقومه يجيبها لحاله.. خايفة يتعود على الكسل..

بطة أسبابك مقنعة :) حسيتك عم تردي على سؤال بامتحان.. مرتبتيهم بنقاط..

هيلين يسلموا على الوصفة.. بس فيها كتير أشياء ما بحبها.. أنا بحب شوربة الدجاج مع الذرة و الكريمة.. أو الفطر, أو الشعيرية.. أما شوربة الخضر فبعملها باللحمة أطيب..

نور :) أخجلتي تواضعنا.. بيني و بينك, أكيد لابقلي اسمي.. جوزي ما حبني الا على اسمي.. ههه.. لا تصدقي بس.. أنا من قد ما بحب اسمي كنت أنا و صغيرة قول بدي جيب بنات و سميهم كلهم مايا..
و هاتي طريقة الكتاب يللي عندك.. بركي بتعجبني طريقتك..

مين سألت عن الخل؟؟ أنا بستخدم دائماً خل التفاح الطبيعي... ما بقرب على الخل الأبيض بنوب.. لأنه صناعي و ما بعرف شو حاطين فيه.. بتعرفوا الخل بينخاف انه يستخدموا فيه كحول.. مشان هيك بعدوا عن الشر و غنوله.. خليكن على خل التفاح الطبيعي.. و تأكدوا انه ما فيه اضافات..

شوفي هذا هاينز أكيد في منه بأوروربا و أمريكا.. خل تفاح طبيعي


و هي مكوناته
Ingredients:
Made from the juice of apples diluted with water to a uniform pickling and table strength of 5%(50 grains) acidity
يعني ما فيه كحول الحمد لله

كيفكم بنات

انا كتير زعلانة .. ابني حكى لي عن ان في مدرسته ما عنده اصدقاء وان دائما بيزعل لما بيلعب لوحده وبقول للي بصفه تعوا لعبوا معي ما حدا بيرضى واذا راح هو ولعب معهم بيعملوا عليه "boss" وقال لازم هو يسمع كلمتهم ....كان عم يحكي لي هالشي وغص وكان رح يبكي وانا قلبي والله اتقطع عليه وماعرفت شو اقول له ...لفلفت الموضوع ورحت احكي لابوه كان الله يهديه معصب وطالع خلقه.. فما حكيت له ودخلت على غرفتي وصرت ابكي لعنت الغربة واسبابها .... يعني لو كنت ببلدي مع اهلي كان ممكن احكي للبابا او للماما او حتى اخواتي مو اقعد حط وجهي بوجه هالحيط وابكي .....

قلت ما عندي غيركم احكي لكم وافضفض لان لو حكيت لاهلي وانا بعيدة عنهم رح يغلي البهم ويزعلوا وما يطلع بايدهم شي ...

بقى سامحوني هي كلمتين ما قدرت خبيهم