هههههههههههههههههههههههههههههههههههههههههههه ام لقمرين اجل جاكم ههههههههههههههههههههههههههههههههههه.............مفرق الجماعات ومخرب الوناسات ........

ياحبيبتي والله يانريم...


والله اني انا اللي بحاجة ان ناس يحبوني زيك ....طيبين ورائعين ومؤمنين...



انا الي بحاجة لكم موب انتم...

ان اجايتكم بس بروح شوي وارجع....


والله ماتدرين اش كثر دخلت قلبي كلماتك ....

توني جايتن من محل خردوات..واشياء سكند هاند..


أبونا البارح مر على هالمحل ولقى به فريشتن صغيرة (زولية)..

وبخمسة باوند؟؟؟


معقولة به شي بخمسة باوند؟؟؟


يعني 35ريال سعودي....معقول به شين تسذا ؟؟؟

عاد هو طايرن عقله على هالزولية ومن البارح يوصيني اذا قمتي الصبح روحي المحل وعاينيها واكيد بتنهبلين عليها...


قلت والله ماظنيت ان هاللي بخمسة باوند فيها خير...


قال هو ابد تهبّل ....بس بها بقيعاتن صغيرة ونغسلها انا وانتي بالحديقة...


قلت اشوف اشوف...

عاد ومن الحماس كلما تحرك بالليل يونون علي بدل مايقول لااله الا الله الواحد القهار يقول لاتنسين تروحين تشوفين الفرشة ام خمسة باوند...

لاتروح علينا...


انا رحت الصبح اليوم اشوف هالام خمسة باوند وش تصير من لحية ...

والمحل ماهوب بعيد عنا حذفت عصا...

ويوم دخلت المحل ولا تلاقيني ريحة الخورة والقدم...طبعا المحل للأمانة هو اللي شرينا منه دولابنا الي قعدت ابخّر فيه خمس ايام قبل ابدا احط به هدومنا...

اي والله منين نجيب شي جديد؟؟؟

كل شي هنا غالي ويقطع القلب ويدمي العين...

عاد يوم دخلت وانشد راعي المحل عن الفرشة قال اي فرشة ...؟؟؟

قلت ام خمسة باوند قال ايه ذيك؟؟

شفتوا اشلون مشهورة من رخصها :)...

وشكل وده يقول لاتتعبين نفسك مهب معجبتس...بس استسلم للأمر الواقع وغز اصبعه على شي مصفوط تقل جلد نعجة مصلوخة؟؟

قلت وش هي ذي تلبيسة ددسن؟؟؟

قال لا فرشة ...بس انها ماغسلت ولذلك عرضناها بخمس باوندات...

قلت لاياشيخ؟؟؟

وافرّها منا...واحركها منا...وافتشها ولا بوسطها بقع قهوة وشاهي وبقع اشيا اخرى حقت انغليز وع وع وع وع وع...


انا زي العادة اصابعي تشنجت لما اشوف مناظر من هالشكل بس جاملت وقلت ايه ايه تهبل ....بس ماتهقى به مغسلة قريبتن من هنا...؟؟

قال الا به بس ماظنيت انهم يغسلون الفرشات اجل تحسبينتس بالسعودية بين كل عمارة وعمارة مغسلة ؟؟وكل وحدة تخرب على الثانية تسوي تخفيضات ...؟؟؟


قلت اي والله انك صادز ..أجل وش اسوي؟؟؟ان امابه عندي متسان ولا (لي) حتى ولا كان حيل الله ياقوي نغسلها..بس وين نغسلها به؟؟

قال والله مدري عنتس ....

المهم واسمع حس احد جا من وراي ...المحل طبعا من ضيقة شبر بشبر مافي امل انك تمرين ومعك احد ولا حتى بزر او شنطة..المهم واسمع الحس يقول اكسيوز مي..اكسيوز مي...

واحسبنه رجال كبير عريض الصوت صوتن يوحش...والاها حرمتن نحيييييييييييفة كبر شطفة المفتاح ...

قلت انا هالصوت طلع منتس؟؟؟



قالت مدري انتي تبي تشرين هالفرشة؟؟


وانا تطير عيوني بهامتي قلت والله ماظنيت شوفي شوفتها هذي تشرى ؟؟؟؟هذي لو بيلقاها هندي مامعه فيزة بالشارع مااخذها..

قالت اجل فالتس طيب انا باخذها...


قلت وش تبي تقولين بها وهي عليها طولها وصخة وصخة يااختي في الله...

قالت ماعليتس فيه مادة يبيونها بابو باوند (اي والله عندهم محل أبو باوند...ومحل أبو 99بنس) تقومين وتفركين بها البقع وتطلع زي الفل....سلام ..


وتطلع بوكها وتدفع الثمن وتقعد تهرّج راعي المحل وخلوني لحالي بلا فرشة وبلا بقع....

اهئ...اهئ...


...............................يتبع

صخنة ابونا نسيتها...لأنه طاب..ياربي لك الحمد:)



بس لازم اقولكم وشولن صخّن...قام يسحّب رجيلاته يوم الاحد عقب مارحنا للشاطىء...

خرب علينا ويك إندنا عساه للمر..:)


والسبب فيما يبدو انه صحن الفول والبيض المسلوق الي صلحته له على الفطور قبل مانطلع...


موب يقولون البيض المسلوق مع الفول يجيب الصخنة؟؟؟:)



المهم عاد وهو يالله تخلف عليه ماهنا نشاط ولامناعة ولايشرب حليب ولافيتامينات ..

وادنات هبة هوا تجدعه من حيله...:)


مادريت يوم جلسنا عالشاطىء وتونا شارين فيش اند شيبس (سمك وبطاطس :) )وانا ابالع ريقي ماصمت عشانه وعشان ويك إنده هو ووجهه....


لوا اني داريتن انك تبي تصخن كان صمت عالاقل ارتاح لي من يوم....


يوم دريت مير يقوم يلملم راسه يقول :

أي أي ...احس بتعب...

قلت طيب وش تبيني أسوي؟؟؟بكيفك من قال لك تصخن (وحدة نذلة)...


قال قولي بسم الله عليك على الاقل...

قلت منب قايلة وين شايفني ؟؟؟بالسعودية تصخّن وأسمي عليك؟؟؟


انت هنا ببريطانيا ألا صخنت سم على نفسك....:)

أبوتس يالنذالة....

قال اااااه ياوجد قلبي لو انا بالبيت بس...كان ماجسرتي تقولين كذه لي...

قلت ايه اجل ويش أسد علي وفي الحروب مصخن؟؟؟:)

قال زين ابلعي سمكتس وبطاطستس جعلتس ماتحدرينه...وانهجي علينا نبي نروح البيت..


قلت وين نروح ماامدانا نقعد عساك الريح؟؟؟؟


قال اها عاد عن الدلع ترا يجيك الشغل لو انا على البيتش...



طبعا زوجي كان مخبي عني ورقة معطينها اياه السفارة السعودية وفيه توصيات للمقيمين والسياح العرب عموما والسعوديين خصوصا...


من ضمن هالتوصيات يوم اني سرقتها وقريتها :

ضرب الأطفال ممنوع...في الأماكن العامة وفي البيت...

وفي حال تم ضبط اي اعتداء على طفل فإنه يقبض على الأب فورا ويودع السجن في انتظار محاكمته، والطفل يحال إلى ملجأ رعاية ولايحق للوالدين كفالته بعدها...

قلت اهاااااااااا....واطير اوريه اياها قلت شفت دواك الملجأ وانا بنت ابوي...

وهويبالع ريقه يقول لاتصدقين كله خرط...


عاد اول وانا لاسويت شي قال لي ها ترا بجيب العقال....


والحين هو لاسوى شي قلت ها ترا بجيب الملجأ........


:):):)



يتبع...

:2thmup: :2thmup: :2thmup: :2thmup: