اول وانا احسبني الوحيدة اللي تتهاوش مع رجلها في الشارع...

عاد يوم اني شفت هكاليوم واحد سيخي (هندي من ذولاك اللي يلبسون عمامة سودا يوحشون)...

والاه يجعب المكان يهوش طول بطنه....والحرمة وراه تلحقه تقول له يارجال اذكر الله...:)


عاد هي حرمتن حرمة ....والله ياهي كشخة...ولبس...وجميلة...ومع ذلك ناظري وش يسوي بها...

ويصارخ عليها:

اذا قلت لتس تسوين شي تسوينه ...واذا قلت لك ابيتس تكونين اي شي تكونينه...

وهي تون ترد عليه تقول موب من حقك تسوي بي كذه..

طبعا حنا تجاوزناهم وان عاد ملقوفة قلت لابونا طالع طالع موب بس حنا ...



قال تلقينتس ودتس تروحين تسألينها تقولين وش بتس همن تعصّينها على رجلها...


والله لانتيب مصلحتن بينهم...بس تبي تشوفين وش سالفتهم من اللقافة اللي قاطعتن قلبتس...


قلت طيب هي مزيونة وهو مزيون وراهم يتهاوشون؟؟؟


ويطالعني وهو يقول : وش قصدك يعني؟؟

قلت ابد ياحبيبي ...طرّاه رخص البصل...



:)



................


عاد وهو يبدا يون...وهو الامنه صخّن مابه ملح..

قلت تصدق يابونا؟؟؟تراها عين....


قال منهي عينه؟؟؟


قلت عيون هالانغليزيات عساهن للفضيخ....أكيد يوم شافن زينك وملحك قالن ودنا بالجمال العربي بس ماحصلنه...


قال وهو يبتسم وينشق فديته:


ارحم الله حالتس...حالماتن بي وبجمالي العربي وشهبتي بس؟؟؟

قلت انا( في قلبي طبعا) خابرتن انك اشهب الهب ياحبني لك...بس اني ابي اتميلح ولاالانغليز ماينظلون لأنهم مايعرفون العين...:)


صدق يابنات ليه العين والنظل بس عندنا؟؟؟؟:)

المهم واقول تبي ناخذ باص ياعمري بعيد عليك المشوار للبيت...

وبقدرة قادرمن يوم جبت طاري الباص طاب على طول...

قال لالا مايحتاج نروح كعابي أرخص واصرف... قلت ابد...

تعبت على رجيلاتك والارض...

................


وصلنا بحمد الله للشقة ونفتح الباب وهي شوي وينخمد تحت الغطا..

والحق يقال اني رحمته رحمتن ماقد رحمته اياها من قبل...

انا اللي يعرفني رحومة مهما كنت نذلة فاني ارجع للإهئ إهئ بس بمجرد اشوفه تعبان ويلهث..

وعاد هي دقايق وتبدا نفضة الصخنة والنخنخة ...قلت انا مابدهاش الدعوى يبيلها ليمون وبردقان وعسل...


بس منين اجيب عسل ياناس؟؟؟:)


طبعا انا ماعندي عصارة فواكه يدويه...

بس انا ماتعوق معي ماشالله علي ....

ابدا اخذت فنجال قهوة وحطيته وسط صحن وبديت اعصر...

صح طارت بعيني نقطة ليمونة وحرقتها بس ميخالف شسوي الا صرت احب رجلي..؟؟:)

وهشوى واجيبه له ويلطّه مع بريق زنجبيل حااااااااار قال هذا شلون بشربه ياحافظ ؟؟

قلت ابد ماعليك انت اقعبه وماعليك...
.............


سبحان الله يااخواتي الغربة والوحدة ممكن تحدث تغيير شديد في العلاقة بينك وبين زوجك


تخليك تتعلقين فيه ويتعلق فيك...


وتخافون انكم تفقدون بعض وانتم في هالفترة....


مافي احد حولكم تفزعون له ..لااصدقاء ولااهل...


ماهنا الا خشته وخشتس...واركدوا وخليكم عاقلين:)


هل توافقوني على ان الغربة تخليكم تتعلقون ببعض اكثر؟؟؟


:)



يتبع....

وعاد جتني الصيحة صدق يابعد عمر عمر عمري وم اني شفته طاح ناااااااااااام عقب حبتين الفيفادول...

تخيلوا طاح نااااااااااام نومة وحدة لين جا الليل ماقدر يتحرك ....


يابعد قلبي صدق ...عاد اني كل شوي اجي اشوف كانه حار ولاه يطبخ .....


وهي عاد يارب لك الحمد ابدا اقرا عليه وهو تقل مضروبن ابرة بنج...


ماغير ينخنخ وينتفض....


ويارب لك الحمد ...يارب لك الحمد ....هي يوم اني قريت عليه ويبدا يخف بشكل ملحوظ ....



وجا الليل عاد وقام وتعشى وانا ماغير اسمي عليه واسمي ...واسمي...

قال حشا ليتني مصخنن من زمان ....؟؟


:)


قلت في قلبي خل تطيب بس وأردها لك ....:)

..................



عاد ومن بكرة يارب لك الحمد كان طيب....



ادعوا لي وله ياعمري ...



احبكم...

وجايتكم بسالفة جديدة ...بحول الله

الله يقويتس والله اني صرت اطررربق لمنتدى الغربه عشان اقرا سواليفتس
جعلتس بالجنه وسعتي صدورنا

الله يرزقتس انشاءلله

عسللللللللللللللللللللللللللللللللللللللل
والله انك عسل ويني عنك من زمان ؟؟؟؟
ابدا اخذت فنجال قهوة وحطيته وسط صحن وبديت اعصر...
هذه خطيره ......:22:
الله يسعدك ..كلامك ذكرني بزميله لي من زمان ماشفتها ...هو انتي من القصيم ؟؟؟

ههههههههههههههههههههههههه
والله تينن سوالفج اول مرة اطيح لج على موضوع





انا اايدج وبقوة
وانا مب مغتربة
بس في السفرات خصوصا اللي توصل شهر
يصير مب ريلي:arb: واحد ثاني خخخخخخخخخخخخخخخخ
لدرجة ان لي رجعنا الدوحة اقولة

شرايك تبتعث برة واروح معاك :hahaha: ههههههههههههههههههههههههه