مذكرات قروية في برايتن: عيد إبليس!!!!

من كم يوم وانا احاول أفهم سر هالقرع المسدّح بهالمحلات والبسطات وشين زين وراهي وشين متعرعر وريحته فايحة...

قال ابونا هذا الهولويين ماتعرفينه ياقروية ؟؟؟

هلحين ماهنا فيلم امريكي ماقد شفتيه ولاتعرفين الهولويين


قلت الا اعرفه ...عيد القرع اللي يحطون بهن شموع...اول ماعرفته يوم مسلسل سالي تذكرون يوم انا في رابع ابتدائي؟؟؟


:eek:



قال طيب...اشري لنا قرعة كودنا نحتفل ونصير زي الناس والخلق...

قلت بشتريها أزين عليها مرقوقي والله....:)

وهذا والله هولوين المسلمين....:)
..............................................

برايتن مدينة منتهية في الهدوء...


حتى في أيام السبت والأحد ماتسمعين الصخب والصوت العالي في الليل الا نادرا....

بالتالي مافي شي تسمعينه مثل صوت النوارس وزعاقها تقل فاقدتن ولدها...

من كثر هدوؤها استغربت كثير ان يكون فيه احتفال زي احتفال الهولويين من دون صخب او استعدادات ضخمة ...

انا توقعت انه يكون فيه حركة غير تكديس القرع والحركات اللي يسوونها فيه ...وبيع مستلزماته من ملابس سودا وشوكة حمراء حقت بليس ذيك..

انا استغربت جدا من هالملابس مع اني قد شفتها في الكتب والافلام بس مافهمت وشو الهولويين...انا حسبالي انه عيد كل القديسين...اسمع ترجمته بالافلام واحسبنه هو..بس انه ماطلع هو..



جا رجلي مسوين فيها مثقف :arb: قال شفتي بدورة


طلع عيد الهولوين عيد الارواح الميتة ....يعني يطلعون الموتي عليتس بالليل ان شالله ويشقلونتس معهم ويطيرون بتس على المكنسة ذيك...


:eek:

قلت هين والله مااخليك ....


المهم وادخل مسنجر واقابل صديقتي اللي عايشتن بامريكا

قلت هولوين وشو ياسعاد ابونا يقول فيه موتى يطلعون ويطيرون...

قال لالا هذا عيد الشياطين ...:30: :30:




بسم الله عظايم اسمه....






وشو شياطينه انا اقضي من رجلي تجيني انتي؟؟؟


قالت وهي تضحك :


ايه يطلعون الشياطين ومعهم شوك ويطقون على البيبان...


قلت وش يطقون يبون الله لايبيهم اخاف انهم المسيح الدجال...!!!!


قال لاتخافين يطقون يبون حلاو...


قلت ماظنتي شيطان يبي حلاو لو يبي حلاوة راح لاطرف محل وشقل له كرتون...








بس اخاف انهم يبون شي ثاني اما يبي يذبحوني ولا يغولوني..ولايكبون علي زيت ...


:eek:


قالت لاتخافين لاتخافين انتي ياكافي يروعتس ظلالتس...


ابد الهولوين سلمتس الله هو قرقيعان الانغليز...


يجون مبزرة الحي ويطقون ويغنون اغنية العيد:

تكتك تاك...تكتك تاك...وقامت تقولها لي وتخربط ...

قلت اقول ...يازين عطوني عييييييييدي...عادت عليييييييييكم....ترم ترم ترم...تمتمتم



والله لو جاني منهم لاافقع وجهه:22: واقول له رح لامك اللي ماعرفت تربيك تطقق على البيبان تشحذ تقل تكروني...



قالت ايه عشان يجونتس يشقلونتس مع شوشتس بتهمة العنف ضد البزران في الهولوين...


..............يتبع:)