مرت عمي ........يانااااس وش تقولون فيها؟؟ ابي الكل يعطيي رايه لو تكرمتو

السلام عليكم ورحمه الله وبركاته
بطب على طول في المشكله بدون مقدمات
مرت عمي ...
هالحرمه ربي رزقها زوج مااظن كانت تحلم بيوم في مثله
مدلعها ومخققها ومايقصر عنها بشئ الا انه لظروف عمله والانتدابات
كثير السفرات فتضطر تقعد مع عيالها بسبب الدراسه
وما بنكر ان هالحرمه خدومه جدا وطيبه وذوقها بصراحة لايعلى عليه في الشياكة والاناقه
وكثير كنا نشاورها ويعجبنا ذوقها وناخذ برايها في اللبس والتصلح
وكثير بعد انا نبادلها الخدمات اذا احتاجت شئ
الى هنا تمام...
المشكله انها ماتعرف تنثبر في البيت دايم دوران في الاسواق وفي المحلات بداعي وبدون داعي
بتقولون وش عليكم منها حياتها وهي حرة فيها بسلامتها ماقلنا شئ
لكن انا اضطرينا نجيب سواق موب فخفخة ولانعفقة لكن لحاجتنا الشديده له
والظاهر انا جايبينه لها عشان يادي لها اغراضها على حسابنا!!
اولن تركب معه لحالها وبهالنقاب والعيون اخر حلاوه
وتركنه بالساعات يحتريها برى ومايرجع لنا الا وشو عقبه
ومع انه طلباتها له كثيييييره الا انها ولا مره حست على نفسها وقالت بدفع قيمة البنزين لو مره
ومشاويرها بعيييييييييييده وهي في خيييييير ولاعليها قصور
وكله كوووم وعيالها كوووم ثاني جن من الجن شياطيين موب اطفال
والله انا نشيل هم اذا جيت تسير علينا بسبة عيلانها تخيلو مره كنا تونا فارشين البيت
ومغيرين الاثاث وتجي بنتها شايلة رضاعتها بالمقلوب وتمشي والحليب يخرخر على الكنب والفرش
وامها تشوفها ولا همها
ولا تجي بنتها وتمسك القلم وتشخبط على الطاوله ولا توصخ الارض وتكبب واذا تكلفت قلت بس ياماما عييب
والمشكلة تزعل اذا حمقنا على عيالها ولا قلنا لهم شئ
ولا ولدها هالصعلوك الصغير داهية مجمعه الله يصلحهم ياربي
مره كنت اسولف معها ويجي ويمعط حلقي من اذني وينحاش وهي عيب يابابا <<تكلفت
ولا مره ماسك عباية وحده من خواتي ويفحط فيها على الارض الظاهر شايفها لعبة يستانس عليها
يعني بالعربي يدور أي شئ يرفع الضغط يسويه ويكذب بصوره ميب طبيعيه فلان طقني وهو ينصب لحد طقه ولاشئ
ولا يجي يقول لي التلفون يبيك واجي وماا القى احد على التلفون ودايم يتطاقون مع الصغار ويجلدونهم ويحلفون انهم ماسوو شئ
وهي مستحيل تصدق في عيالها تقول عيالي انا عارفتهم مستحيل يسوونها وترمي السبب على عيال غيرها
واذا ركبوا السياره مع امهم انوااع الوصايخ والرجة في السياره والطقاق والصراخ
حتى السواق تلقينه لي طلبت تروح معه تخنقه العبره والله انا مانلومه الضعيف
مره جاب لها سواق فترة مؤقته وقت سفره ولما رجع استغنى عنه ولا فكر يجيبه مره ثانيه
تدرون ليه لانها ماعاد قعدت في البيييت والمشكلة حجابها موب ذاك الزود الله يهديها والحرمه جمييله
واحيانا لي تعذرنا وصرفنا انه موب فيه السواق تدق على اخواني الشباب تخيلو احيانا تكون توها طالعه من زواج الساعة ثلاث الليل
وتدق تعالو خذوني
وهي في احلى زينه وعطور ومتكشخة واخواني شباااااااااب حتى لو كانت مرت عمه المفروض تتستر
وذابه الموانه معهم تمزح وتضحك وتسولف معهم وفلانه تطاقيت معها عشان وعشان
وحطينا كذا وصار كذا يعني هي يمكن معتبرتهم زي اخوانها بس ولو مايحق لها تسولف معهم
حتى في سواليف المفروض ماتنقال لهم لانهم مالهم دخل فيها سوالف حريم
واخواني والله مايجبونها الا تقدير لعمي
والله احيانا نضطر نقفل جوالاتنا كلنا عشان نفتك منها
ونتجاهل رقمها اذا دقت على الثابت بس ماتعوق معها تدق على السواق يعني ورانا ورانا
يعني نصرفها ولاتفهمها تلقينها ترجع وتطلبه ولاهمها
وياويلك ان قلتي لها عينك احسن من الثانيه
ولا نصحتيها ولاقتلي لها كلمه تحطها سالفه وتكبر وتصغر فيها وتعدنا اللي ماينفع فينا الكرامه وهذي تاليتها ول ل ل ل ل ل ل ل
وانا نراعي مشاعر عمي ولا ودنا يصير في الخواطر شئ لكن لي متى ..
ياشكوى الى الله الواحد له طاقه مايقدر يتحمل ازود منها
لا والشئ اللي من جد يرفع الضغط ويبط الكبد هو هالحركه:
انا مثل ماقلت لكم فوق ان ذوقها حلو ونقتنع باختيارها ودايم نشاورها ولها خبره في المشاغل والماركات والمكياجات والعطور
ونشاورها في الموديلات والالوان وبعض المرات تشتري شئ وتلزم علينا ناخذه وتحرجنا وتحلف
ومره قالت لها الوالده عن ناس محتاجين واذا عندك شئ زايد عن حاجتك وتبين تتصدقين به جيبيه نعطيهم اياه
المهم جابت عفشها
ولما رجعت كلمت الوالده قالت شفتي الفستان الموف (وكان مع الملابس اللي بتروح للصدقه) ترى هذا ناويته لبنتك (اللي هي انا0)
عشان تلبسه
تخيلو وصلت فيها انها تتصدق علينا تحسبنا في حاجتها ولا نبي منها شئ الحمد لله الخير واجد ولا علينا قصور
موب معناه قبلنا منها كم قطعه قامت خلاص تتوقع انه عادي لدرجة انها ترسل شئ ملبوس ومخلقن تقول هذا لكم
والله اننننني اغللللللي وكبدددددددي فاييييييحه على هالحركة وماراح اسكت لها على هالاهانه وش رايكم كيف اردها لها


وانتم وش رايكم في هالمره فيه احد قد قابل مثلها وكيف تصرف معها رجاءً عطونا حلولكم اللي تبرد القلب


انتظركم على احر من الجمر
تحياتي