جريتو ريقى على الصبح يا بنات
طب انا عندى انهارده صدر فرخة وشوية لحمة مسلوقين ونص فرخة مسلوقة معمولة نسايل
يعنى كل واحده فيهم متنفعش تتعمل طبخة ... يبقى اطبخ ايه بيهم دول؟؟؟؟؟؟؟؟؟

شكرا ليكي يا اسبانش انتي و ام ملك بالنسبه للفراخ فماما و بابا مش بياكلوا فراخ يعني الاختيارات محصوره في اللحوم

هى العزومة لمين بالزبط؟ وردة ولا ام عمر؟ معلش بقى الاسامى دخلت فى بعضها

مادامت الاختيارات اتحصرت فى اللحوم ممكن تعملى القائمة دى:
شوربات: شوربة عدس او شوربة كريمة بالخضار واللمشروم او شوربة بصل او شوربة خضار بالكرفس, شوربة لسان عصفور, شوربة فريك

سلطات: فتوش, تبولة, سيزر سالات, كول سلو, فتة باذنجان, بابا غنوج ولو عندك سلطات كمان اكتبيها فى اختياراتك
بس انصحك اعملى مثلا 3 انواع سلطة ويكون التبولة اساسى واحدة منهم لان التبولة انسب حاجه للهضم مع اللحوم عشان مليانة بقدونس بتخلى الجسم ميمتصش الدهون اللى فى اللحوم
المقبلات: سمبوسه باى خلطة عندك مثلا خطلة البيتزا, جبنة وزعتر, جبنة ونعناع, لحمة مفرومة بالبقدونس, كيرى وسبرنج رول بالخضار او بالكيرى, خبز بالثوم, كبيبة
وانتى برضه لو عندك زودى ده اللى انا فاكراه دلوقتى

الرز: تعملى نوع رز ونوع مكرونة وممكن تعملى الرز: كبسة, رز بالخلطة, رز بنى, رز صينى بالخضار , رز كابلى أو رز معمر
والمكرونة ممكن مكرونة بشامل او لازانيا او مكرونة بالبطاطس زى البشامل

اللحوم: عندك كباب حلة, ورقة اللحمة, روستو, كتف او فخدة وتحطيها على وش الرز, كفتة محمرة , لحمة باردة, او ممكن تعملى فتة لحمة زى الفتة اللى بنعملها بس من غير رز يعنى تسلقى اللحمة وتسقطيها فى الصلصة اللى بالخل والثوم زى اللى بنعملها بتاعة الفتة

الخضار : ممكن صينية بطاطس فى الفرن باللحمة او ملوخية او تورلى فى الفرن او طاجن بامية

طبعا تلحقيهم بعدها بالمشروبات السخنة عشان تسيح الدهون دى كلها واديها شاى اخضر وجنزبيل باللمون والحلو اعملى حاجات خفيفة يعنى مهلبية جيلى كستر كريم كراميل لان الاكل عشان كله لحوم هتكون بطنهم مليانه مش هيقدرو يتقلو فى الحلو

لو عايزة طريقة اى حاجه من اللى فات اسالى وانا او حد من البنات هنقولك

نورا جبت طريقة البسبوسة اهو يا ستي

المقادير
3 كوب سميد هريسة - 1 كوب سكر - 1 كوب زبيب - 1 كوب لبن نستلة مكثف محلى - 2 كوب جوز هند (اختياري) - 2 ملعقة طعام سمن - 1/2 كوب زيت ذرة - باكو فانيليا - معلقة كبيرة بيكنج باودر - علبة قشطة

الطريقة تخلط جميع المقادير السابقة وتعجن باليد وتفرد في صينية مدهونة سمنة على خفيف ثم تقطع بالسكين وتزين بوحدات لوز مقشر وتدخل فرن حامي لحد ما تحمر ثم تخرج وتسقى بالعسل (الشيرة) وهي ساخنة
وبالهنا والشفا

يفضل عند العجن اليدين تكون مبلولة مياه عشان العجينة متلزئش في اليد وانا بعملها من غير جوز هند عشان مش بحب نكهته

ممكن تعملي الفراخ كفتة بالبطاطس وممكن الحمة تقطعيها وتعملي خلطة شاورماوتحطيها عليها وتعملي سندوتشات النهاردة مع شلطة زبادي ولا اي نوع تفضلي