انا كمان عملتها يا بنات :) لولولولوووووووووووووووووى

بس مالحقتش اصور كنت اتهديت بصراحة ربنا يسامحك يا ام مهند ويجزايك كل خير صراحة

طلعت روحى بصراحة مع العلم انى اختصرت خطوات القرمشة الاخيرة

سامحينى يا دينا انتى معلمانى ان اى وصفة جديدة لازم امشى عليها بالنص ومرة تانية ابقى احور


المهم صحيت الصبح جهزت الفطار ونزلت على السوبر ماركت جبت اغلب البهارات المطلوبة بمبلغ وقدره


المهم رجعت على المطبخ وفاتحة الكمبيوتر على الصفحة على الوصفة كل شوية اروح اقوم العيال ابص بصتين واسمع جزء واجرى على المطبخ قبل ما انساه معلش ملحقتش اصور ولا اكتب


ااقولكوا خطواتى المختصرة وبعدين تعليقى عل الماتش قصدى الطبخة


انا كنت مطلعة طبق وراك فراخ حظوظ قمت غسلته كويس ونشفتة وقطعته كل ورك 2 قطعة دبوس وجزء تانى

بعدين فصلت الدهون والجلد لان كانت اكتر حاجة بتقرفنى فى كنتاكى انى بحب خلطة القرمشة بس مستحيل اكل الدهن والجلد اللى فيه فكنت اقعد افصص دى عن دى لما تطلع روح

المهم عملت خلطة الشطة والبابريكا والحقنة واشتغلت ولا اجدع تمرجى ودى فى راى اهم خطوة

وتبلتها من برة ومن جوة وبين العضم وبين اللحم

بعدين بصراحة كنت مستخسرة خطوة اللبن وبعدين ارمية وبعدين توابل فى مية ساقعة

قمت حطة التوابل مع الرايب ونقعت فيهم القطع هى الست نفسها ناس سالتها قالت ينفع مفيش مشكلة

وحطيتها فى التلاجة وكملت باقى شغل المطبخ وجهزت غدا احتياطى فى حالة فشل التجربة


قعدتها بتاع 3 ساعات بس كنت مستعجلة اشوف اللى هيحصل وكمان الناس جعانة وعمالة اقولهم استنوا بس خلاص اهو


بصراحة خطوات القرمشة دى موال واستصعبتها وعكة قمت جبت طبقين واحد فيه خليط تمبورة جاهزة الدقيق المجعد اللى رشا كانت قايلة علية من فترة وطبق فيه دقيق درة

والطبقين حطيت عليهم من التوابل اللى فى الوصفة

وقلب فى ده لدة وبعدين على الزيت طاسة صغيرة عميقة عشان يبقى الزيت كتير وقليت قطعة قطعة وبقيت اغطى الطاسة عشان متحمرش بسرعة

القطعة اخدت فى المتوسط 8 ل 10 دقايق

طلعتهم على ورق نشاف وبعدين الست كانت قايلة اننا نسيبهم شوية السوائل تتوزع ونقليهم تانى


برضه استصعبت الحكاية دى وزيت تانى وقطعة فطعة اقليها

هى الفكرة اية انها تكمل سواها من جوة قمت بعد ما سيبتها هديت شوية حطيتهم فى طبق وفى الميكروييف 7 دقايق وخرجتها


النتيجة الحمد لله كنت مرضية جدا عجبتنى اوى انا وجوزى واخت جوزى وبنتها

بناتى الحلويين سلمى عيانة ربنا يشفيها ويمنى ملهاش فى الحاجتا دى من حزب رز وملوخية او رز وشوربة فمادقوهاش

البنت قالت قريبة لكنتاكى بنسبة 85%
انا اديها نسبة 80%

مع الفرق يا ام مرام الفراخ انتى عارفة جايباها منين والزيت منين بالاضافة ليا انا شخصيا كنت باكل القطعة ومش خايفة من دهن او جلد لانى منضفاها كويس

الودن بالذات اوعى تجربى فيها اجرى على اى مستشفى او دكتور يكشف عليكى

ما اتحطيش فيها حاجة لا بعد الشر يكون في ثقب يعمل مشكلة

دينا انا راى بعد ما تتحمر معقول وقبل ما تنشف طلعى الفراخ نشفيها من الزيت كويس وسيبها تهدى وتشرب سوايلها كويس وبعدين دخليه الميكروويف او الفرن تكمل سواها من جواه

انا بقى حصل حاجة غريبة لما حطيتها فى الميكروويف الطبقة الخارجية كانت ناشفة اوى فعلا لما حطيتها فى الميكرو خرجت طرية ومنزلة صوص بسيط مش ده لا الفراخ كانت مستوية هايل الحمد لله

لكن زيت تتبيلة حاجة كده تتغمس المرة الجاية هققل شوية وقت الميكرو

او ممكن حطى الطبق كلة بالقطع فى كيس بلاستيك اول ما تطلع من على النار هيطر ي الطبقة الناشفة الخارجية

على فكرة ملقتش طرخون فى السوبماركت بس مااعتقدش كان هيفرق كتير فى وسط كل التوابل التانية