من 110 الى 83

مساكم الله بالنور والسرور..
سبق وكتبت تجربتي وماعرف وين طارت :(
عالعموم أبشركم واصلت المشوار والحمدالله الله وفقني وحققت حلمي
السالفه ومافيها يالطيبات إني ماكنت داريه إني دووووووبه ..
وكنت أظن نفسي رشيييقه وماحد قدي ..
لين اكتشفت إن وزني 110 :mad:
من يومها عزمت عالريجيم
والخطوه الاولى أشتريت ميزان إلكتروني يكون معي ليل نهار..
وبديت في الريجيمات ماخليت ريجيم ماسويت
بديت فالتخفيف وماعطاني نتيجه سريعه وأختكم ماعندها صبر
غيرته للصيام العكسي وماجاب أي نتيجه
جربنا دشتي وجاني هبوووط حاد وظنيت إنه الموت جاا
غيرته للبن والتمر وزاد الوزن بشكل غريب مع إني إلتزمت بعدد التمر وكمية اللبن بالضبط
بعدها ركزت على النت بشكل أكبر ودخلت منتديات وشفت تجارب ومني مناك توصلت لأحلى وأروع ريجيم على الاطلاق..
والحمدالله مشى الحال وبدا الوزن العنييييد بالنزول بشكل ملحوظ ..
طبعا الكل بيستغرب يعني هالريجيم ماله سلبيات أبداً؟
لأ ليه سلبيات وأولهم شعري راح ضحيه الرشاقه ..
بس حبيته لأنه مش متعب كثير وما أثر على بشرتي أبدا يمكن بالعكس تحسنت
نظم الدوره خلها تمشي عدل بدون دلع..
والشكل طبعا تغير 180 درجه
طيب نجي للريجيم..
أول شي ريجيمي مافيه رياضه بالمره..
يعني لوتحبي تمارسي أي رياضه أتوقع النتيجه راح تكون أسرع وأحلى...
الحين نجي للريجيم هو عباره عن وجبه وحده فاليوم تتاكل العصر ..
المشروبات ثلاثة انواع
1- ماي
2- وشاي أخضر مع زنجبيل ونعناع وكمون وينسون وشمر
3- وعصير كيوي واناناس وتفاح أخضر وليمون
والحين أهم نقطه وهي الوجبه الوحيده فالريجيم
وهي عباره عن خبزتين توست أسمر محمصات مع علبة تونه وأحط معاها ملعقة مايونيز لايت وجلاص عصير برتقال المراعي وبس..
نجي للتفاصيل ..
أول ما أصحى أشرب نص لتر ماي وبعدين أبدا فتجهيز الشاي والعصير وهذي الطريقه بالتفصيل الممل..
الشاي .. أجيب ترمس وأحط فيها ملعقتين شاي أخضر صيني ماركة تونجنز / وأقطع عرق زنجبيل - تقريبا زي نص الكف -قطع صغيره / وملعقه نعنعاع / وملعقة كمون / وملعقة ينسون / وملعقة شمر / وأكب فوقهم ماي مغلي وأخليهم على جنب كم ساعه
العصير ..
احط فالخلاط 3 شرايح اناناس طازج و3 كيوي وتفاحه خضره مع ماي واخلطهم زييييين ولما اخلص احطهم بالجيك وأعصر عليهم ليمونتين بو زهير- على فكره ما أصفي العصير اخليه بقشوره..
الحين طول اليوم أشرب بالتناوب من المشروبات الثلالثه
كنت أستخدم أعشاب الدكتور عبد الباسط السيد وأشتريتهم من العطار مخلوطين وجاهزين للاستخدام وهذي طريقته أحط ملعقتين من ألا عشاب وأصب عليهم ماي مغلي وأخليهم تقريبا نص ساعه واصفيه وأشربه قبل الوجبه بنص ساعه ..
والريجيم أستمر عليه اسبوعين بعدين أخذ لي يوم أجازه أكل وأكل وأكل حتى أدووووخ
وأحيانا كنت أمل وآخذ لي أجازه من الريجيم شهر شهرين بس الزياده ماتكون كثير كلوين أربعه بالكثير وأول ما أرجع للريجيم ينزلون فأول يومين ..
مع هالريجيم وصلت 83 وكان إحساسي ماينوصف وكل من شافني أنصدم وكثير ماعرفوني فالمناسبات..
الحين موقفه الريجيم لي فترة طويله ورجعت 85 وبعدها 88
المصيبه إني تماديت ولا أهتميت ماخليت لابيبسي ولا حلى ولا كبسه ولا ولا ولا كل شي كليته
حتى وصلت 92
بس تصدقون احس كذا احلى من 83 وماعندي نيه أرجع للريجيم
الحين تقريبا لي شهرين ووزني ثابت 92 مع إني ماخليت البيبسي ولا الحلى ولا اكل أخر الليل
اليوم قررت إني أبدا فالتخفيف وأبعد الحلويات والغازيات واكل اخر الليل عالاقل أنزل 3 كيلو
عشان بس أفتك من طاري التسعينات
على فكره كل من عرف إني زدت هالفتره يقول إنه مش مبينه علي الزياده..
أكبر غلطه إرتكبتها إني ماخذيت فيتامينات أعتمدت إن أكلي فيه بروتين ونشوي وفاكهه وظنيت إنه مابيأثر علي
بس شعري راح ضحيه للريجيم وتساقط بشكل كبيييير وأضطريت أقصه
وعلى فكره أنا أرضع .. لما بديت الريجيم كان عمر بنتي 8 شهور والحمدالله ما أثر عليها أبدا
بالعكس أنا من الحريم إللي مافيهم حليب بس مع الاعشاب زاد الحليب بشكل غريب
والحمد والفضل والشكر لله وحده لا شريك له..
أتمنى إني أفدتكم وأدعوا للجميع بالتوفيق
ورجااااااء كل من تعاني من السمنه لاعد تتأخرين أكثر حرام. العمر يروح ونحن فوسط هالشحوم
فكي نفسك وتحرري من الهم وبعون الله مع أول 5 او 8 كيلو تنزليهم راح تحسي بالفرق وتندمي إنك تأخرتي كل هالفتره..
دعواتي لكن بالرشاقه والجمال مع الصحه والعافيه والسعاده الدايمه يارب.