لو اكتب معاناتي قديم م يكفيها مجللللد ترى اختصرتها لكم قد م اقدر😂😂😂

والله بخاطري اقول بناتي م ازوجهم الا بعمر 25 تكون نضجت وفهمت الحياه زين والرجال م يقدر يضحك عليها ويستغلها لاهله ولمصالحه >>> تعقدت
بذات اني تزوجت صغيره والكل استغلني أولهم زوجي واهله

ماشاءالله تبارك الله والله إنك بنت حلال وطيبه وأجرك عندربك مايضيع. من جد صبر أيوب. أنا عايشه في غربه وزوجي له أخ واحد هنا عزابي يجي يسكن معانا طول شهر رمضان . وعشاني أشتغل عودتهم من أول رمضان بس أرجع من العمل أسوي الفطور والعشاء والسحور مره وحده. أطلع من المطبخ وأتروش وبعدها ماعاد أدخل المطبخ. زوجي وأخوه ينظفوه من وإلى هههههههه.
عندي ولد واحد

عارفه الحين تقولون هاذي اشبها انهبلت الموضوع بوادي وكلامها بوادي خلوني افضفض بذات من اشوف موضوع عن رمضان يجيني شعور غريب لان كانت مشاكلنا وهواشنا ونتصافق برمضان بسبت هالفطور ليش تاخرتي لين نمتي ليش هاذا تسوينه في أشياء كثيره سارت م كتبتها الله يعوضني والله الناس م تعذر وانا كنت مبسوطه اسوي لهم بس يستغلون الوضع يعني بيوم كنت تعبانه م يعذروني غصب اسوي لو مريضه لو حامل لو زوجي مداوم يدق علي من الدوام قومي سوي الفطور بذات هالحركه مدري كيف كنت متحمله حركاته لو يسويها معاي الحين اقسم بالله حتى فطور له م يذوق🤪🤪🤪كانو فرض علي مافي عذر لي انا ابدا يشفع عندهم والمواعين مافي شغاله اجلس عليها بالساعات اغسلها ويروح النهار بالطبخ والليل بالتنظيف ولف السمبوسه والسحور الحين اخوان زوجي اللي كانو عزابيه امهم جنبهم وربي م يفطرون معاها ولا حريمهم يطبخون لامهم امهم حرمه كبيره وربي يجونها زي الزوار بشهر مرا يفطرون ويروحون راحمين حريمهم وامهم وربي تاكل لوحدها بالبيت وهي جنبهم واحد معاها بنفس الحوش والثاني قريب منها
ولا شفتهم يظغطون ع حريمهم وحتى م يعزمون احد كانو بس علي يهاوشون ويسبون اذا تاخرت ب أكلهم ولا فطورهم
وب الايام العاديه كانت عمتي تروح لابوها بديره ثانيه بعيده عننا انا اغسل ملابسهم انظف بيت عمتي اذا راحو لدواماتهم اطبخ لهم والحد منهم كان يحط الملابس عند الباب بالليل ومرات كنت انسى اخذ الملابس يروح يشتكيني عنداخواني اختكم م تغسل ملابسنا مدري كيف له وجهه يتكلم ويجيني اخوي يهاوشني عيب عليك ليش مع ان عندهم غساله ببيتهم اخوي يهاوش م تغسلين ملابسهم م يقولون نستها بس البارح ينكرون كل شي وعمتي اذا جات يشتكون لها وتجي تقولي ليش م سويتي لفلان شاهي يحب الشاهي واذا ارسلت اكل من المنادون أعجبهم يرجعونه مع عيالي ويزعلون طيب انا بقلوبكم آدري وش تبغون للملعوميه عيالها وقتها كان اصغر واحد 18 الكبير كان 20

المشكله كلها امي كانت زيهم عمتك لاتقصرين معاها اخوان زوجك لا تقصرين معاهم حتى ب الايام العاديه تقول سوي قدر كبير كل يومين ايدام وحطي لعمتك بقدر واعطيها تاخذين اجر وكانت تنصحني انا عارفه تبغى الأجر وكنت انفذ كل نصائحها زوجي من جهه وامي من جهه لين الكل من اهل زوجي طمع فيني امي م كانت تقول اذا حسيتي نفسك فاضيه سوي لا كانت نفس نظام زوجي اظغطي ع نفسك وصحتك وعيالك اهم شي ام زوجك وعيالها امي نظام قديم م تدري بكذا تعبتني جسديا ونفسيا عارفه ان قصدها زين بس كان المفروض تقولي اذا فضيتي لا تقصرين مع ام زوجك وانا بحكم صغر سني انفذ كل كلام امي أحسه صح م دريت ادهور صحتي ونفسيتي
والله مو كرهه ب الاجر والطبخ بس ولنفسي علي حق
لين الكل صار يشوف فرض واجب انفذ اوامرهم


جاتني فتره وربي م احب اسمع من امي نصيحه ابدا لو لصالحي احس تنقلب علي
حتى اخواتي م شالله تزوجو واخذو مني عظه وعبره>> دروس بالمجان😂😂 يقولون لبعض لا تسمعون لامي شوفو جروح نفذت كلام امنا وكل شي طاح ع راسها وشافو وضع اهل زوجي معاي مو بس برمضان حتى ب الايام العاديه بس انا تكلمت عن رمضان