م ق ف ب...يابردي برداااااااااه...بيتي الجميل الحلقة الثانية..

م ق ف ب : هو الاختصار اللي من يوم ورايح راح اكتب فيه (مذكرات قروية في برايتن)...

ياناس وش ذالبرد بالله عليكم؟؟؟


اعوذ بالله من غضب الله...
...............................


الحلقة الثانية:

ويووووووووووووم إننا تسفتنا بالشقة..

وشفت الكشخة والفرشة البيج والحركات واللمبات الصفر اللي حاطين عليهن اباجورات ورق (أي والله) :)


بس كل شي فاضي...

قلت لابونا ياليتنا طالبين فورنشد قال اقول انثبري...

ماحصلناها الا بشيب الراس وتقول فورنشد ..اها بس...

الانغليزي اللي جابنا تاكسي كانت نفسه بين بين ..لاهيب في طرف خشمه ولاهيب في بلعومه...

بس انه نزل الشناط ولبخ فيهن قدام الشقة....مادخلهن يعني..

عساك للحراويل تبينا انا ورجلي الضعيفين ندخلهن ...
؟؟؟

طبعا ياجاية على بريطانيا انسي ان يجيك ديلفري لحد باب البيت ويدخله لك راعي الدلفري نفسه لو مساعدة من نفسه حتى لو هو عربي ..الكل هنا خلاص يفهم لغة وحدة ...دور تو دور وبس...

انا احسبنه حركات وشغل السعودية تقول للهندي يمين يروح يمين تقول يسار يروح يسار...

بالريموت كننترول..

هنا مافي لاهندي ولاعامل تقول له وتامره وتنهاه زي ماتبي...ماهنا الا من هالوجه الودر وأردى...

...............................

وعندما وضعنا شناطنا فوق أرض الغرف الفاضية..لم يكن هناك الا انا وزوجي.....والفرشة البيج..

والهيتر...!!!


آه يالهيتر....الحق يقال انا قد شفت الهيترز في التلفزيون ايام الثمانينات الميلادية...وكنت اشوفهم يحطون عليها الشراريب مدري ليه بالذات الشراريب..

لكن ماكنت ادري انها تشتغل على غاز زي الفرن ولاكنت ادري بطريقة عملها ولاادري وين زرها اصلا...


رحنا للمطبخ نتفقد الرعية لقينا فرن يهبببببببببببل بس انه كهرب ...(لحد الحين صرفنا 60 باوند بس على فاتورة كهرب حقت شهر واحد بس حسبي الله ونعم الوكيل )

ولقينا ثلاجتن يعود عهدها إلى عهد الملكة إليزابث الأم أيام ماكانت إليزابيث الثانية توها آخذتن فيليب و تشارلز توه يخطّي... :)...



يعني مايكمل الحلو..الغسالة فل اتوماتيك وحركات والفرن بس الثلاجة لو بيشوفها هندي كان دمعت عيونه رحمة بنا..

قلنا يالله...مب مشكلة نمسحها من داخل وبره وترجع فل الفل...منين بعد نبي نجيب حق ثلاجة عقب المبلغ الهائل اللي دفعناه عشان نسكن الشقة ...؟؟؟

أول يوم كان بالنسبة لنا عيد (مع انه كان رمضان)...اول شي سواه ابونا قبل لانقول ربنا الله....

محل الحلااااااااااااااااااااااااااااااااااااااااااااااااال....يالله قدامي على محل الحلااااااااااااال...


قلت خير خير ان شالله...


محل الحلال في برايتن اسمه تاج....وفيه واحدن ثاني اسمه تاج محل عشان ماتضيعين بين الاسماء يعني....

:o

ونطير بالباص هناك....طبعا المطبخ مافي الا فرن ..مواعين مافي الا كاسين موغ شريناهن وحنا في فندق ثلاثة نجوم ماقبلنا نشرب في كاساتهم المروحة...

ونطير لتاج ونتقضى (رز_دجاج_ بهارات_سمبوسة جاهزة ياسلام هذا احسن مافي رمضان برايتن انك ماتلفين سمبوسة_وش بعد؟؟؟_ مادري...

المهم ونروح لابو ريالين ونشري منهم قدرين وبريق وقلاية...هكاليوم كان يوم عالمي جايين تقل غجر عدتنا فوق ظهورنا..وهف ..هف هف...

اول مرة شفنا مورين هكاليوم قالت ماشالله أجل انتم شارينن كل ذا قال رجلي اجل سارقينه؟؟؟



:o المهم وأبدا أول مغامراتي في الشقة...يوم الجمعة لأننا سكنا يوم جمعة...

وتقوم بدورة...وتعين من الله خير....وتكبس هكالكبسة اللي ...اللي ...اللي ...

وابونا طبعا له حول خمسطعش يوم مااكل رز....

زين اللي ماجاه انهيار عصبي ...انا عني كنت مبسوطة بحياة الحرمان في الفندق الكحيان...

لأني نزل وزني نزول سريييييييييييييييييييع اطالع في بناطيلي صارت تنزل وحركات وشي ....

:o فقلت ياليتنا نبتل في الفندق كان يوصل وزني الخمسينات وانا ماكملت شهر ...


حياة الحرمان في الفندق الكحيان هي قصة اوعدكم وعد لاأنزلها لكم ولااخليكم تغشون من الضحك عليها..


بس خلونا في اول يوم في شقتي ....يامال السيل ياشقيقتي...


................



موب بدورة كبست الكبسة وقلت السمبوسة وصلحت الشوربة وكل مقومات الفطور الرمضاني...هيييييييه...


الرجال قام يغصص مايدري وش يبدا به ...لحسنا كبستنا وكانت شهية جدا رغم ان الرز اللي شريناه كان بيشاور وانا مااعرف اتعامل مع البيشاور ...


مااعرف الا للمزة...

المهو وهي نقعد شوي نلتقط انفاسنا بعد الفطور المعتبر...

ومير فجأة تطير في بالي...قم ..قم توض وصل....


بصلي وراك جماعة...!!!!


الرجال طبعا يحسبني العب زي البزور قام يلعبني قلت منب العب....قم ابيك تصلي بي جماعة...يالله...


:o هو يطالع يمين يسار قام توضا ...وكبر وانا وراه ...وهو يمسك نفسه من الضحك...

لعن ابو بليسك وش يضحكك بالصلاة؟؟؟؟

قال شسوي منب متخيل انتس مأمومة قلت يعني حاقرني عساك للبلش الشهرة موب عليك الشرهة على الي يحطك امام انت وخشتك المرت الجاية انا اللي بأمّك على مذهب المالكية ...قال هذا مذهب موب عربي قلت اللي هو بس انا بأمّك المرت الجاية:)



ماتدرون يابنات هالحركة اللي انا سويتها على بساطتها وغرابتها ونادر من الزوجات من تفكر بهالطريقة لإضفاء جو إسلامي على البيت...خصوصا في رمضان...



طبعا لما يجي الحديث عن رمضان +بدورة...

فمعناته ان رمضان عندي لازم يتكون من كثير من الأجوااااااااااااااااء الروحانية..ولا مايصير رمضان...

يعني..على الاقل لابد من تراويح ومسجد واسمع حس مآذن وقراء والحرم المكي والمدني...ولاكف يصير رمضان؟؟؟

طبعا هالاجواء انحرمت منها وبشكل كبير في هالسنة...منين نجيب لك مسجد بعد في برايتن؟؟؟:)

مباركن صلاة الجمعة وفيها منة بعد رجلي كل يوم يقول لا باتسر منتب رايحة....


فكيف عاد بالتراويح والقيام؟؟؟

طبعا رجلي مهوب متروحن بي الله مير يرحم الحال...قلت اقله نحس بروح الجماعة وناخذ اجر الجماعة في رمضان لو بالقليل ...

تصدقون عاد رجلي اللي كان يضحك في البداية ويتململ من شدة الضحك وهو يصلي...


صار عقب هو يقيم للصلاة ويقول لي يالله يالله استووا ....وهو جاد هالمرة مايقولها لاعب...

مافي شي زي صلاة الجماعة يغذي شعورك بروح الإسلام والأمة المسلمة...


........................


وهي نخلص الجماعة الأولى في بيتنا...وحنا مانقوى نتنفس من البلع والرز...


وفجأتن...

فجأة يعني..


فجأتن لاحظت ان البيت صارت ريحته طببببببببببببببببخ....


ورز ...صارت ريحة البيت رز...

طبعا تعرفون انتم شعور الواحد لما يكون شبعاااااااااااان وشم ريحة اكل ...وييييييييييه..
ابن آدم ايها الكفور الجحود ..قبل شوي تشمشمها زي القطو الأجرب...

:hahaha:
يتبع....