بدّورة الحلوة
دلعدي هي حسب المنطقة اللي انتي فيها...اذا فيها مسلمات واجد ويتنقبون ليه لاماتتنقبين؟؟

لكن المشكلة لو كنتي في منطقة مافيها مسلمات او فيها مسلمات بس مايتنقبون اصلا..

وساعات افكر بيني وبين نفسي النقاب صراحة هو شي لي انا...شي انا احس انه هوية لي ليه استحي منه لما اروح لبلاد اخرى؟؟؟وليه من حق الناس هناك يتفصخون ويلبسون عاري ومايستحون وان ااستحي اني اغطي وجهي ؟؟؟هي مسألة هوية موب فتنة او حشمة لكن مسألة ليه انا وهم لا؟؟؟

لكن من جهة اخرى احط نفسي مكان اي واحد غربي مهما كان متسامح وهذا الي قاله لي راعي المحل اللي شريت منه الكنب قال لي انا زرت السعودية وفهمت ان دلالة النقاب عندهم تدل على الفضيلة والحشمة ولكن حنا غير ولاانصحك بلبس النقاب في مثل هالظروف لأن بعد حملة جاك سترو على الحجاب والنقاب في لندن صار فيه ناس مؤيدين له كتبوا في الجرايد وانتقدوا الحجاب وعدّوه ظاهرة من ظواهر تسلط الرجل المسلم على زوجته وبالتالي جعلوا منه مدخل للطعن في الاسلام وحنا موب ناقصين....كذا قال لي تخيلي...

لأن ترى دلالة النقاب عندهم ماهي طيبة اطلاقا لأنها تدل على التخفي واخفاء شيء سيء ماتشوفين الحرامية عندهم يتلثمون؟؟فهي مرتبطة بهالشيء السي ....

وهذا طبعا انتي ماودك اطلاقا انه يرتبط بالمسلمين عندهم وفي عقولهم لأن ديننا أمانة بعد...وحرام نعطي فكرة سيئة عن ديننا.....حتى لو كان بتطبيق امر جزئي من أحكامه...

واتذكر الشيخ سلمان العودة في فتوى قدييييييييمة قبل لاتصير له ذيك المشكلة افتى لوحدة كانت رايحة لكندا قال لا ابدا لاتتنقبين ولاتفكرين بذلك لأنه ممكن يسبب لك ضرر فمايجوز لك تضرين نفسك..

لكن انتي شوفي عن نفسك وين بتسكنين واستخيري وقرري اما تتحجبين او تتنقبين ...لندن ترا فيها كثييييير منقبات وبعضهم بريطانيات ...امريكا بعض الولايات فيها صارت ولله الحمد اسلامية يعني تشوفين النقاب كنك في الرياض....
لكن فيه مناطق اخرى يشوفونك بالحجاب العادي غطاء الراس بس يقعدون يبحلقون فيك تقل جاية من المريخ...وموب عن قصد المساكين لكن فعلا كانهم شايفين شي غريب...
وحطي في بالك انك اهم شيء اهم شيء انك مأجورة في كلا الحالتين لأن في كل الحالتين راح تكونين سفيرة لدينك ..


اختي الحبيبة ام دحومي العنصرية مازالت في امريكا مثلا معتقد ديني تخيلي...يعني مازالت فكرة ان الرجل الأبيض اللي هو لون يسوع (عيسى عليه السسلام) هو السائد وهو العنصر الأفضل مازالت فكرة دينية يعني اللي مايعتقد فيها يعتبر مرتد عن دينه!!!!


لكن هل هذا أثر في قانونهم؟؟؟تعالي شوفي لو واحد أسود ينداس على رجله أو يطرد من عمله او ينقال عنه يااسود وااااااااا...هات يامظاهرات وهات ياتوقيعات وشي يصدع الراس وفي نفس الوقت تحترمييييييييينه مهما حاولتي تتجاهلينه..

والله اني لما اشوف المظاهرات المناهضة للعنصرية والحرب والجماعات اللي تجمع توقيعات لمناصرة اخواننا في غوانتانامو وهم موب مسلمين تخيلي ...اللي تظاهرون موب مسلمين ترا...لكن نزيهين ومؤمنين بأن الحروب لازم تنتهي....

والله لما تشوفين هالشيء تقولين والله ياخجلنا حنا يالمسلمين اللي مازال عندنا تفرقة عنصرية وطبقية في المال وطبقية في الأقاليم...كل اقليم يحتقر الثاني وكل طبقة تستعر انها تتزوج من الثانية...

المشكلة حنا ديننا وأصل ديننا يجعل من الكبر موب بس شي يحرّم علينا دخول الجنة...لا...ولكن من الكفر تخيلي ان الانسان يطعن في النسب او يباهي بأصله ...

مو يقول النبي عليه السلام اربع في امتي هن بهم كر ...لايدعونهن...الطعن في الأنساب ...والنياحة ...والاستسقاء بالأنواء...يعني تخيلي ان الطعن في الأنساب بنفس منزلة الشرك بالله...


مع ذلك تخيلي شوفي كم واحد منا يقول عن الثاني انه ماله اصل....او قليل اصل...او خضيري او عبد ...وهالكلمة الاخيرة تراها من عظمتها وقذارتها النبي عليه الصلاة والسلام جعل يوبخ ابو ذر الغفاري رضي الله عنه لما شتم بلال وقال له يابن السودا...
لما قاله انه امرؤ فيك جاهلية ...وقعد يرددها الين ابز ذر ركع على وجهه من شدة الخوف وطلب من بلال انه يدوس على خده علشان يكفر عن خطيئته...


ورفض بلال وجعل يبكي زي مافي القصة ولكن ابو ذر اقسم انه مايرفع خده الين يدوس عليه بلال...


شوفي الاخلاق شوفوا يااخواتنا الاسلام الحقيقي موب اسلام آخر زمن اللي يجاسب الناس على الاغاني والمغازلات والمنكرات الأخرى ويترك المنكرات الاعظم والأفظع واللي فعلا تحرمنا من دخول الجنة...


طبعا المنكرات الصغيرة مانستهين فيها ولكن وين مكان المنكرات الأخرى اللي هي من الموبقات؟؟

متى قد سمعنا محاضرة يااخوات تتكلم عن الكبر؟؟؟وتتكلم عن التواضع؟؟؟متى قد سمعنا محاضرة او داعية تخصص جزء لو بسيط من محاضرتها عن معاملتنا للأجانب؟؟؟والشغالات؟؟؟متى قد سمعنا للأسف محاضرة تعظنا عن عظم أمر الغيبة واحتقار الناس؟؟؟والا التفاخر بالأنساب وسالفة الخضيري والقبيلي؟؟

كل اللي نشوفه للأسف محاضرات كاملة تروح على امور شكلية عن الحجاب وعن الزينة وعن النمص وعن التشقير ....والامور الحقيقية اللي يه جوهر الدين ..ألقلب النية التواضع الحب الطيبة احسان الظن بالآخرين كف اللسان كف الأذى اسلوب التعامل مع الناس ...


كلها للأسف ماتاخذ من تفكيرنا ولا واحد بالمية...


طولت عليكم يااخوات وبرجع اكلمكم عن مورين حبيبة ألبي...
أنسانية
أنسانية
الاحتقار ذنب عظيم احيانا نمارسه بدون شعور...والكبر نسويه ايضا بدون توقف...


حتى لو لبسناه وسميناه اسماء اخرى ...افتخار...او عزة....او أصاله..أو دلع...أو أي شي؟؟؟


هل يتغير الكبر لو غيرنا اسمه؟



الله ينور قبرك بدورة كلامك نور وحكمه مع انه يعور القلب لكنه عوار مبضع الجراح
مع المتعه في اسلوبك والربط

حاوي لكل مفيد

حكم ومواعض وعبر لا حرمناك ولا حرمنا الله طلتك الجميلة وسوالفك الرائعه
وسن&
وسن&
كملي يابدوره سالفتك مع مورين والله سوالفك ماتنمل

تصدقي يابدوره اني مادخل هل القسم غير علشان اقر سوالفك

وكتاباتك في اليوم اشيك عليكي مرتين صبح والليل

لاعدمناكي

دمتي بود
بدّورة الحلوة
الللللللللللللله يرضى عليكم يااخوات...وسن..انسانية...

كلماتكم تحسسني اني مازلت على قيد الحياة..


الله يرضى عليكم...وبس...


.............



أما مورين...ممدتن رجيلاتها تسنها عجيّزاتنا اللي بهن رماتيز...


عاد الحق يقال يوم انها تقوم وهي تضوكع تقول انها تسوي جلسة تدليك لرجيلاتها كل شهر ...

قلت ايييييييييه الله يجازيتس ويعظّم أجرتس....والمس ركبتها منتفخة من الكبر...

قلت اييييييييييه يالله العمل الصالح وعمرن يكسب عملن صالح..



عاد واقعد اسولف لها عن امي الله يعظم اجرها قلت امي اصغر منتس مالحقت الحرب العالمية الثانية أنتي لاحقتن عليها؟؟

قالت ايه انا يوم اولد وهي الحرب توها بادية كان في عام 1930

تشوفيني يوم اني عمري خمس سنين كانوا اهلنا بيروحون للشلترات (اماكن اللجوء ) حقت اللجوء بس امي عيّت لانروح وقعدنا ببيتنا وماجانا الا العافية....



ياحليلها...قلت لها يعني ماعندتس ذكريات سيئة عن الحرب قالت لا ...ماجانا في الجنوب قصفن واجد زي لندن وزي المناطق الشمالية...


قلت لها انا مالحقت على حرب ولله الحمد الا حرب الخليج يوم اني صغيرة ..

قالت لي ايه اجل انتي لاحقتن عليها قلت ايه تشوفيني يوم اني صغيرة وانا زي البزور اقول ودي اشوف الحرب ماقد شفتها يوم جت الصدقية وشفت الصواريخ ومير تشوفيني اسويها على نفسي كنت صغيرة عاد ام حدش سنة ....


وهات ياصراخ وصياح ونياح قالت ايه وانا خالتس مامن الحرب فود ..


:)



مايروح في الحرب الا البزران والضعوف...وتشوفين هالحريم المسيكينات اللي ميتن رجلها واللي ميتن ولدها وهو بعز شبابها...

من اللي يدفع الثمن الا الشعوب يابدورة؟؟؟

قلت والله انتس صادقة المفروض يحطونتس انتي الملكة انتي الي فاهمتن الدعوى موب ام تشارلز عسى مالها والي...


عاد انها قامت تونون تقول انها تبي تسو ديكور للبيت ان رجلها قبل يموت كان يدخن وكان موصخن البيت بالدخان وهلحين تبي تسوي ديكور وتنظف الشقة ....قلت ايه على طاري الدخان


هالعلبة اللي مرزوزتن بالسقف وشهي؟؟؟؟كاشف دخان؟؟؟

قالت ايه اجل...

قلت طيب اقدر اني اولع بخور؟؟

قالت وشو البخور...

قلت شوفي انا ورجلي منحب ندخن يارب لك الحمد بس اننا لازم عندنا تليد اننا نطيب البيت ونزين ريحته باحراق قطع غالية من الخشب...


مافهمت ...


قمت قلت شوفي....وافتح لها علبة العود قلت شفتي..

هاذا يبيعونه عندنا بآلاف....:)

قالت تسوون به بارببكيو؟؟؟

قلت الله يرحم حالتس صدق.....

واقوم اولع مبخرة الكهرب حقتي واحط العود...ويوم قامت تفواح الريحة اللي تهبل...

قلت الكاشف حق الدخان مايسوي لي مشكلة ؟؟؟

قالت مااظن لأنه دخان خفيف....:)


عاد يوم اني امعط فيش المبخرة واجيبها لها وهي تستاحش تحسبني باسحرها قلت تبخري يام وليام..



:)


وهي تطير عيونها قالت وشلون يعني؟؟؟

قلت حطيه تحت شعرتس زي كذه ..ماودتس؟؟؟متبين؟؟؟

قالت لاوالله ماابي .....ههههههههههههههههههههههههههه


فشلتني ام وليام .....قلت يام وليام بلاتس من ردى حظتس والا فيه احدن يحصل ريحة البخور..

واقوم اطيب هدوم صلاتي عاد وهي طايرتن عيونها ماتدري ليه اسوي كذه


قلت لها هذي هدوم صلاتي ...قلت ان ما حسبتني هندوسية ولابوذية الله يستر ههههههههههه


قلت ها يام وليام وش رايتس بريح البخور؟؟؟


قالت تشخف العقل بس ابعديه عني....:)




......................


يتبع
الوردة الفريدة
بدورة حبيبة قلبي .. بجد احتجت إني أقرى ردك عن علم العروض اكتر من مرة عشان أفهم الموضوع بس في النهاية توصلت لانه شيء شيق جدا ولما تقري أي بيت وتطلعي البحر بتاعه أعتقد الموضوع ممتع انا من زمان في الاعدادي كنت باحب اوي البلاغة والنصوص بس للأسف من أول ما درست ثانوي خلاص علاقتي بالشعر والأدب إنتهت وأحس بمعاناة كبيرة لو حبيت أصيغ فقرة بالعربية الفصحى

سبحان الله ازاي أصلا جت للفراهيدي الفكرة دي حاجة غريبة أوي إن شاء الله أقرى عن الموضوع أكتر وجزاك الله كل خير على الخلفية الجميلة المبسطة اللي اعطيتيهالي عن علم العروض

تصدقي بقيت احب مورين حاسة انها ست طيبة بس شكلها كانت خايفة من البخور :)

متابعينك بكل حب يا بدورة الأمورة