انهارده عملت جيلى بالكمبوت وتبلت فراخ بانيه عشان بكرة ان شاء الله اعملها كوردن بلو
تتبيبة الفراخ كانت بصلة و3 فصوص ثوم فرمتهم فى الكبة وشويه جنزبيل بودرة وبهارات وملح وعودين كسبرة خضرا فرمتها ناعم ومعلقتين كبار مسطرده وعصير لمونتين وخل وجبت تركى وشرايح شيدر للحشوة بكرة ان شاء الله

النهاردة عملت فراخ بانية ورز بسمتي بالخضار وسلط

الفراخ تبلتها بملح وفلفل سماق وجنزبيل بودة وبهارات وببريكا وبعدين في الدقيق والبيض والبقسماط وكنت ضايفة علي البقسماط

ثوم بودرة واريجانو وبهارات الكاري بتاعت النودلز بتاعت ماجي وكركم ادوها طعم مختلف وكانت حلوة قوي

الرز بيتنقع في مية وبعدين بشوح بصلة مكعبات صغيرة وفص توم مهروس واضيف الخضار المشكل ورشة فلفل اسود ورشة بهار وحبهان مطحون

وملح وكركم واضيف الرز والمية الخنة واسوية عادي

النهاردة كنت عاملة صينية كفته بالبطاطس

وسلطة ورز

وعايزة اعمل كشري بكرا انا زهقت من اللحوم خلاص :(

النهاردة كان كبسة ولحمة محمرة وسلطة خضرا وعملت الصلصة اللى بتتقدم مع الكبسة كانت حلوة
عبارة عن بصلة صغيرة-طماطماية-فص توم-ثلث فلفلة خضرا-2 م/ك صلصة-عصير ليمونتين كبار-معلقة كبيرة خل-فلفل حار حسب الرغبة
ملح-فلفل اسود-رشة كمون- ميه حسب الحاجة
ضربت كل المقادير فى الخلاط كويس وبقيت اضيف الميه حبة بحبة لحد ما وصلت للسمك المطلوب وحطيت الملح والكمون وبس

انهارده ان شاء الله هعمل سلطة برجر وكوردن بلو
الفراخ اللى تبلتها امبارح هفتحها من النص لقرب الاخر واحط شريحة جبنة شيدر وشريحة تركى واقفلها بخلة واعملها فى بيض وبقسماط واحمرها ومعاها بطاطس محمرة